অসম লাইভ ২৪ঃ যোগী আদিত্যনাথৰ ৰাজ্যত এতিয়া হিংসাত্মক কাৰ্যকলাপে সংবাদ শিৰোনাম দখল কৰিছে। বিগত ২২টা দিনত ৪টাকৈ হত্যা আৰু যৌন নিৰ্যাতনৰ ঘটনা সংঘটিত হৈছে যোগী আদিত্যনাথ নেতৃত্বাধীন ৰাজ্যখনত। এইবাৰ এগৰাকী প্ৰাক্তন বিধায়কক গণপ্ৰহাৰ কৰি হত্যা কৰিলে একাংশ লোকে। উত্তৰপ্ৰদেশৰ লক্ষিমপুৰ নামৰ ঠাইত সংঘটিত হৈছে এই ঘটনা। এক সংবাদমাধ্যমত প্ৰকাশিত খবৰ অনুসৰি, দীৰ্ঘদিন ধৰি প্ৰাক্তন বিধায়ক নিৰ্বেন্দুকুমাৰ মিশ্ৰৰ সৈতে ভূমিকেন্দ্ৰিক বিবাদত লিপ্ত হৈছিল কিষাণকুমাৰ গুপ্তা নামৰ এজন স্থানীয় বাসিন্দাই। লক্ষিমপুৰ খেৰীৰ ত্ৰিকোলিয়া বাছ আস্থানৰ সমীপৱৰ্তী এডোখৰ মাটিক লৈ সৃষ্টি হোৱা এই সংঘাতে আদালতৰ মজিয়াও পাইছিলগৈ। অভিযোগ অনুসৰি তাৰমাজতেই দেওবাৰে কৃষাণকুমাৰ গুপ্তা নামৰ ব্যক্তিজনে সেই ভূমি দখল কৰিবলৈ দলে-বলে যায়। ইয়াৰ পাছতে প্ৰাক্তন বিধায়কগৰাকীয়ে মিশ্ৰক বাধা প্ৰদান কৰে আৰু ইয়াতেই ক্ষুব্ধ হৈ গুপ্তাৰ দলটোৱে বাঁহ-লাঠীৰে উপৰ্যুপৰি প্ৰহাৰ কৰে নিৰ্বেন্দুকুমাৰ মিশ্ৰ আৰু তেওঁৰ পুত্ৰক। সংকটজনক অৱস্থাত নিৰ্বেন্দুকুমাৰক হাস্পতাললৈ লৈ যোৱা হয়, যদিও হাস্পতালতে মৃত্যু ঘটে প্ৰাক্তন বিধায়কগৰাকীৰ। প্ৰাক্তন বিধায়কগৰাকীৰ মৃত্যুৰ পাছতে সৰৱ হৈছে সমাজবাদী আৰু কংগ্ৰেছ দল। স্থানীয় ৰাইজেও প্ৰতিবাদ-বিক্ষোভ কাৰ্যসূচী হাতত লৈছে। ঘটনা সন্দৰ্ভত যোগী আদিত্যনাথৰ প্ৰশাসনৰ বিৰুদ্ধে প্ৰশ্ন উত্থাপন কৰিছে স্থানীয় ৰাইজৰ লগতে সমাজবাদী পাৰ্টী, কংগ্ৰেছ দলে।ৰাজ্যখনৰ কংগ্ৰেছে টুইটযোগে কয় , ‘আৰু এজন ব্ৰাহ্মণৰ হত্যা হ’ল। উত্তৰপ্ৰদেশৰ জংঘলৰাজে ক্ৰমান্বয়ে ভয়ানক ৰূপ লৈছে।’
উল্লেখ্য যে প্ৰাক্তন বিধায়কগৰাকীৰ পুত্ৰৰ অৱস্থাও সংকটজনক। নিৰ্বেন্দুকুমাৰে দুবাৰকৈ নিৰ্দলীয় তথা ১৯৯৩চনত সমাজবাদী দলৰ পৰা নিৰ্বাচনত জয়ী হৈছিল। অৱশ্যে ইয়াৰ পাছত তেওঁ সক্ৰিয় ৰাজনীতিৰ পৰা আঁতৰি আছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
