মুম্বাইৰ সমীপৱৰ্তী নৱী মুম্বাই অঞ্চলত শিশুৰ সুৰক্ষাক লৈ উদ্বেগ সৃষ্টি কৰা এক ভয়ংকৰ ঘটনা পোহৰলৈ আহিছে। অভিযোগ অনুসৰি, এখন ব্যক্তিগত স্কুলৰ ভানৰ চালকে ৩ বছৰীয়া এগৰাকী শিশুক নিৰ্যাতন চলায়। ঘটনাৰ পিছতে পৰিয়ালৰ এজাহাৰৰ ভিত্তিত আৰক্ষীয়ে অভিযুক্ত চালকজনক গ্ৰেপ্তাৰ কৰে। জানিব পৰা মতে, ৩ বছৰীয়া কণমানিটিয়ে প্ৰতিদিনৰ দৰে সেইদিনাও স্কুললৈ গৈছিল। স্কুল ছুটী হোৱাৰ পিছত ভান চালকজনে ছাত্ৰ-ছাত্ৰীসকলক নিজ নিজ ঘৰলৈ লৈ গৈছিল।
বাটত আন শিশুসকলক ঘৰত নমাই দিয়াৰ পিছত ভানখনত কেৱল ৩ বছৰীয়া শিশুটিয়েই বাকী আছিল। কণমানিটোৰ ঘৰটো পথটোৰ শেষৰ ফালে থকাৰ সুযোগ লৈ চালকজনে নিৰ্জন স্থানলৈ নি জঘন্য কাণ্ড সংঘটিত কৰাৰ অভিযোগ উঠিছে।
ঘৰত উপস্থিত হোৱাৰ পিছত শিশুটিয়ে কান্দি কান্দি পৰিয়ালৰ লোকক ঘটনাটোৰ বিষয়ে জনায়। লগতে ঘটনাৰ পিছতে পেটত তীব্ৰ বিষ অনুভৱ কৰা বুলিও পৰিয়ালক জানিবলৈ দিয়ে কণমানিটিয়ে। ঘটনাটো জানিব পাৰি শিশুটিৰ পিতৃ-মাতৃয়ে ততাতৈয়াকৈ আৰক্ষীৰ কাষ চাপে আৰু অভিযুক্ত স্কুল ভানৰ চালকজনৰ বিৰুদ্ধে এজাহাৰ দাখিল কৰে। এজাহাৰৰ ভিত্তিত আৰক্ষীয়ে তদন্ত আৰম্ভ কৰি অভিযুক্তজনক গ্ৰেপ্তাৰ কৰে।
এই ঘটনাই স্কুললৈ অহা-যোৱা কৰা কণমানি শিশুসকলৰ সুৰক্ষা আৰু স্কুল ভানৰ চালক তথা পৰিচালনাৰ ব্যৱস্থাক লৈ পুনৰ গুৰুতৰ প্ৰশ্ন উত্থাপন কৰিছে। শিশুসকলক বিদ্যালয়লৈ অনা-নিয়া কৰাৰ সময়ত তেওঁলোকৰ সুৰক্ষা নিশ্চিত কৰিবলৈ অধিক কঠোৰ ব্যৱস্থা গ্ৰহণৰ দাবীও উত্থাপিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
