অসম লাইভ২৪ঃ প্ৰায় চাৰি দশক ধৰি অভিনয়ৰ সৈতে তেওঁ যুক্ত হৈ আছে৷ থিয়েটাৰৰ ওপৰিও ৫০০তকৈও বেছি ছবিত অভিনয় কৰিছে অনুপম খেৰে৷ কেৰিয়াৰৰ আৰম্ভণিৰ বছৰতেই অভিনেত্ৰী কিৰণ খেৰৰ সৈতে বিবাহপাশত আৱদ্ধ হৈছিল অনুপম খেৰ৷ কিন্তু কিৰণৰ পূৰ্বেও বলীউডৰ অন্য এগৰাকী অভিনেত্ৰীক বিয়া কৰাইছিল অনুপমে৷ ১৯৮৪চনত মহেশ ভাট্ট পৰিচালিত ‘সাৰাংশ’ ছবিত পোনতে অভিনয় কৰিছিল অনুপম খেৰে৷ কেৰিয়াৰ আৰম্ভ হোৱাৰ পূৰ্বেই তেওঁ কিন্তু সংসাৰ কৰিছিল৷
১৯৭৯ চনত বলীউড অভিনেত্ৰী মধুমালতী কাপুৰৰ সৈতে বিবাহপাশত আৱদ্ধ হৈছিল অনুপম৷ কিন্তু বিয়াৰ এবছৰৰ ভিতৰতেই দুয়োৰে মাজত বিচ্ছেদ হয়৷ বিচ্ছেদৰ পাছতেই কিৰণৰ সৈতে বন্ধুত্ব, তাৰপাছত বিবাহ৷ কিন্তু মধুমালতীৰ সৈতে কিয় বিচ্ছেদ হ’ল অনুপম খেৰৰ?
অনুপমতকৈ দুবছৰ ডাঙৰ আছিল মধুমালতী৷ ১৯৫৫ চনৰ ১২ জানুৱাৰী মুম্বাইত জন্ম মধুমালতীৰ৷ শৈশৱৰ পৰাই অভিনয়ৰ প্ৰতি ভালপোৱা আছিল মধুমালতীৰো৷ ১০বছৰ বয়সত ‘মহাৰাজা বিক্ৰম’ নামৰ এখন হিন্দী ছবিত প্ৰথম অভিনয় কৰিছিল মধুমালতীয়ে৷ ১৯৬৫ চনৰ এছ এন ত্ৰিপাঠিৰ পৰিচালিত ছবিয়ে মুক্তি লাভ কৰিছিল৷ মুম্বাইৰ এখন বিদ্যালয়ত শিক্ষা লাভ কৰাৰ পাছত ছিমলাৰ এখন কলেজত অভিনয় বিষয়টোক লৈ পঢ়াশুনা আৰম্ভ কৰে৷ তাৰপাছতই অভিনয় বিষয়তেই উচ্চশিক্ষা লয় মধুমালতীয়ে৷
দিল্লীত উচ্চশিক্ষা ল’বলৈ গৈয়েই অনুপমৰ সৈতে প্ৰথম দেখা হৈছিল মধুমালতীৰ৷ দুজনেই সহপাঠী আছিল৷ সহপাঠী হৈ থাকোতেই দুয়োৰে মাজত প্ৰেমৰ সম্পৰ্ক গঢ়ি উঠে৷ পৰিয়ালৰ সৈতে চা চিনাকি হোৱাৰ পাছত দুয়োৰে সামাজিক বিয়া হয়৷ কিন্তু তেওঁলোক বেছি দিন একেখন ছাদৰ তলত থাকিব নোৱাৰিলে৷ অনুপম আৰু মধুমালতীৰ প্ৰায় সকলো কথাতেই মত বিৰোধ হৈছিল৷ প্ৰতিসময়তে কাজিয়া হোৱাতকৈ বিচ্ছেদেই শ্ৰেয় বুলি দুয়োৱে বুজাবুজিৰ মাজেৰে বিচ্ছেদ লয়৷ মধুমালতীৰ সৈতে বিচ্ছেদৰ পাছত ১৯৮৫ চনত কিৰণৰ সৈতে দ্বিতীয় বিবাহ কৰে অনুপম খেৰে৷
বিচ্ছেদৰ পাছত অকলে নাছিল মধুমালতীও৷ বলীউডৰ অভিনেতা অনু কাপুৰৰ ভায়েত ৰঞ্জিত কাপুৰৰ সৈতে বিবাহপাশত আৱদ্ধ হয় মধুমালতী৷ অভিনেত্ৰীক বিয়া কৰোৱাৰ পূৰ্বেও বিবাহ কৰাইছিল ৰঞ্জিতে৷ দুটি সন্তানৰ পিতৃও আছিল ৰঞ্জিত৷ অভিনেত্ৰী মধুমালতীও এতিয়া এগৰাকী কন্যা সন্তানৰ মাতৃ৷ অৱশ্যে ৰঞ্জিতৰ সৈতেও বিবাহ বেছি দিন নিটিকিল মধুমালতীৰ৷ তেওঁৰ কন্যা মিশা কাপুৰ এতিয়া বলীউড অভিনেত্ৰী৷ বহু হিন্দী ধাৰাবাহিকত তেওঁ অভিনয় কৰিছে৷ ইয়াৰোপৰি গড্ডৰ এক প্ৰেমকথা. দ্যা হিৰো, লাভ ষ্টোৰি অফ এ স্পাই, দে দে প্যাৰ দে, চনো কে টিটো কে চুইটি, এক লড়কি কৌ দেখা তৌ এইছা লাগা, ব্ৰহ্মাস্ত্ৰৰ দৰে ছবিতো তেওঁ অভিনয় কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
