অসম লাইভ২৪ঃ মোদীৰ পদবীক লৈ বিতৰ্কিত মন্তব্য কৰি চৰম বিপদৰ সন্মুখীন হৈছে কংগ্ৰেছ নেতা ৰাহুল গান্ধী। ২০১৯ চনৰ লোকসভা নিৰ্বাচনৰ প্ৰচাৰত কৰ্ণাটকলৈ গৈ ৰাহুলে কৈছিল, ‘মোদী পদবীৰ সকলো ব্যক্তি চোৰেই হয়। সেয়া লাগে নীৰৱ মোদীয়ে হওক বা ললিত মোদীয়ে হওক বা নৰেন্দ্ৰ মোদী।’ ৰাহুলৰ এই মন্তব্যৰ পাছতেই ৰাহুলৰ বিৰুদ্ধে ফৌজাদাৰী মানহানিৰ গোচৰ ৰুজু হয়। চুৰাটৰ বিজেপি বিধায়ত পুৰ্ণেশ মোদীয়ে এই গোচৰ ৰুজু কৰে। সেই গোচৰতেই বিগত ২৩ মাৰ্চত চুৰাট মেজিষ্ট্ৰেট আদালতে ৰাহুল গান্ধীক দোষী সাব্যস্ত কৰিছে। ২৩ মাৰ্চত চুৰট আদালতে ৰাহুল গান্ধীক দোষী সাব্যস্ত কৰি ২ বছৰৰ কাৰাদণ্ড বিহিছে। এই শাস্তি ঘোষণাৰ পাছতেই ৰাহুলৰ আবেদন চুৰট আদালতে আজি খাৰিজ কৰি দিয়াৰ পাছতেই দেশজুৰি চলিছে ৰাহুলৰ চৰ্চা। এইবাৰ ৰাহুলৰ কি হ’ব? ৰাহুলৰ কপালত জে’লৰ ভাত খোৱাই লেখা আছে নেকি? ৰাহুলে এই পৰ্যন্ত এইসম্পৰ্কে একো জনোৱা নাই যদিও কংগ্ৰেছ কৰ্মীসকলে আইনৰ যাৱতীয় ব্যৱস্থা গ্ৰহণ কৰাৰ কথা প্ৰকাশ কৰিছে। সন্মুখত কৰ্ণাটক নিৰ্বাচন। আগন্তুক ২৪ ত আছে লোকসভা নিৰ্বাচন। কিন্তু মানহানিৰ গোচৰত দোষী সাব্যস্ত হোৱাৰ কাৰণে নিৰ্বাচনত ঠিয় দিব নোৱাৰিব ৰাহুলে। দোষী সাব্যস্ত হোৱাৰ পাছতেই লোকসভাৰ সদস্যপদো হেৰুৱাইছে ৰাহুলে।
ৰাহুলে বাচিবৰ বাবে কিবা ৰাস্তা খোলা আছেনে?
বৃহস্পতিবাৰে চুৰাট আদালতে ৰাহুল গান্ধীৰ আবেদন খাৰিজ কৰাৰ পাছতেই বৰ্তমান ৰাহুল গান্ধীৰ হাতত এটাই পথ খোলা আছে সেয়া হৈছে উচ্চ ন্যায়ালয়ত আবেদন কৰা। এই ক্ষেত্ৰত ৰাহুল গান্ধীয়ে দায়ৰা আদালতৰ বিৰুদ্ধে গুজৰাট হাইকৰ্টত আৱেদন কৰিব পাৰে।
মানহানিৰ গোচৰত চুৰাট আদালতৰ ৰায়ৰ পাছতেই কংগ্ৰেছ নেতা জয়ৰাম ৰমেশে জনাই যে, মানহানি গোচৰৰ পৰা ৰাহুলে যাতে অব্যাহতি পায় তাৰবাবে তেওঁলোকে সমূহ বিকল্প ব্যৱস্থা গ্ৰহণ কৰিছে।
স্থগিতাদেশ মানেই ৰাহুল শাস্তিৰ পৰা মুক্ত নেকি?
উচ্চ ন্যায়ালয়ে যদি চুৰাট আদালতৰ ৰায়ৰ উপৰত স্থগিতাদেশ দিয়ে তাৰ অৰ্থ এয়া নহয় যে ৰাহুল গান্ধীৰ কাৰাদণ্ডৰ শাস্তি বাতিল হ’ল। ভাৰতীয় দণ্ডবিধি ৩৮৯ অনুসৰি গোচৰৰ শুনানি বাকী থাকিলেও উচ্চ আদালতে শাস্তি বাতিল কৰিও দিব পাৰে। এয়া জামিনত মুক্তি পোৱা ধৰণৰেই কথা।
সাংসদ পদ ৰাহুলে উভতাই পাবনে?
যদি আজি ৰাহুল গান্ধীে চুৰাট আদালতৰ ৰায়ক চেলেঞ্জ কৰি গুজৰাট হাইকৰ্টত আবেদন কৰে আৰু হাইকৰ্টে সেই শাস্তিৰ ওপৰত স্থগিতাদেশ জাৰি কৰে তেতিয়া ৰাহুলে সাংসদ পদ উভতাই পোৱাৰ সম্ভাৱনা আছে। ২০১৮ চনত উচ্চতম ন্যায়ালয়ে ‘লোক প্ৰহৰী বনাম কেন্দ্ৰীয় চৰকাৰ’ গোচৰৰ ৰায়দানত কৈছিল যে যি দিনাৰ পৰা আদালতে শাস্তিৰ ওপৰত স্থগিতাদেশ জাৰি কৰিব সেই দিনাই পৰাই সাংসদ পদ উভতাই পাব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
