অসম লাইভ২৪ঃ কৰ্ণাটকৰ নতুন বিধায়কসকলৰ মাজত ৯৭ শতাংশই কোটিপতি। ইয়াৰোপৰি নতুনকৈ নিৰ্বাচিত হোৱা বিধায়কসকলৰ ৫৫ শতাংশৰ বিৰুদ্ধেই আছে অপৰাধৰ গোচৰ। এছচিয়েছন অৱ ডেমক্ৰেটিক ৰিফৰ্মছৰ এক সমীক্ষাত প্ৰকাশ হৈছে এই তথ্য। এই তথ্য প্ৰকাশ হোৱাৰ পাছতেই একাংশই মত প্ৰকাশ কৰিছে যে বিজেপি আৰু কংগ্ৰেছৰ বিধায়কৰ মাজত বিশেষ পাৰ্থক্য নাই।
কোটিপতি বিধায়কৰ তালিকাত তৃতীয়স্থানত আছে কৰ্ণাটকৰ ৰাজনৈতিক দল জেডিএছ। নিৰ্বাচনী আয়োগৰ নিয়ম অনুসৰি নিৰ্বাচনত প্ৰতিদ্বন্দিতা কৰা এজন প্ৰাৰ্থীয়ে তেওঁৰ শিক্ষাগত অৰ্হতা, সম্পত্তি আদিৰ বিষয়ে সমূহ তথ্য দাখিল কৰিব লাগে। এই তথ্যৰ ওপৰত ভিত্তি কৰিয়েই এডিআৰে এই ৰিপৰ্ট প্ৰকাশ কৰিছে। ৰিপৰ্টত প্ৰকাশ পোৱা অনুযায়ী ৰাজ্যখনৰ ২২৩ জন বিধায়কৰ ২১৭ জনেই কোটিপতি।
জয়ী বিধায়কসকলৰ গড় সম্পত্তি ২০১৮ চনলৈ আছিল ৩৪.৫৯ কোটি। ২০২৩ চনত সেই পৰিমান বৃদ্ধি হৈ হৈছেগৈ ৬৪ কোটি। কংগ্ৰেছৰ ১৩৫ জন বিধায়কৰ ১৩৪ জনৰ তথ্য পৰীক্ষা কৰা হৈছে। এই তথ্যত প্ৰকাশ পোৱামতে ১৩৪ জনৰ ১৩২ জনেই কোটিপতি। আনহাতে বিজেপিৰ ৬৬ জন বিধায়কৰ ৬৩ জনেই কোটিপতি। জেডিএছৰ ১৯ জন বিধায়কৰ ১৮ জনেই কোটিপতি। নতুন বিধায়কৰ মাজত মাত্ৰ দুজনৰ সম্পত্তি ৫০ লাখতকৈ কম। সম্পত্তিৰ তালিকাত আগবাঢ়ি আছে মুখ্যমন্ত্ৰীৰ দৌৰত চামিল হৈ থকা ডি কে শিৱকুমাৰ। তেওঁৰ ঘোষিত সম্পত্তিৰ মুঠ পৰিমান হৈছে ১,৪১৩ কোটি টকা।
উল্লেখ্য যে এডি আৰৰ ৰিপৰ্টত প্ৰকাশ পোৱামতে নতুন বিধায়কৰ মাজত এক তৃতীয়াংশৰ বিৰুদ্ধেই আছে গুৰুতৰ অপৰাধৰ গোচৰ। কংগ্ৰেছ বিধায়কৰ মাজত ৩০ শতাংশৰ বিৰুদ্ধে আছে গুৰুতৰ অপৰাধৰ গোচৰ। বিজেপিৰ ক্ষেত্ৰত ৩৫ শতাংশৰ বিৰুদ্ধে আছে এই গোচৰ আৰু জেডিএছৰ ক্ষেত্ৰত ৩৭ শতাংশৰ ওপৰত আছে অপৰাধৰ গোচৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
