অসম লাইভ ২৪ঃ ক’ৰোনা মহামাৰীৰ মাজতে স্বাস্থ্য বিভাগে অনুষ্ঠিত কৰিব খোজা লখিমপুৰ মেডিকেল কলেজৰ ষ্টাফ নাৰ্ছৰ সাক্ষাৎকাৰ স্থগিত ৰখাৰ দাবী জনাইছে সদৌ অসম নাৰ্ছ সন্থাই। সন্থাৰ সম্পাদিকা জুনু চুতীয়া দিহিঙীয়াই ক’ভিড-১৯ৰ জটিল পৰিস্থিতিৰ প্ৰতি লক্ষ্য ৰাখি সাময়িকভাৱে সাক্ষাৎকাৰ স্থগিত ৰখাৰ লগতে জ্যেষ্ঠতাৰ ভিত্তিত বিভাগীয় ৱেবছাইটৰ যোগেদি নিযুক্তি প্ৰদানৰ দাবী জনায়। সংবাদ মাধ্যমলৈ প্ৰেৰণ কৰা এক বিবৃতিত দিহিঙীয়াই সাম্প্ৰতিক পৰিস্থিতিত এই সাক্ষাৎকাৰ অনুষ্ঠিত কৰাটো মুঠেও সমীচীন নহয় বুলি মন্তব্য কৰে। ৰাজ্যৰ বিভিন্ন প্ৰান্তত NHMত সেৱা আগবঢ়াই যোৱা সৰহসংখ্যক নাৰ্ছে ষ্টাফ নাৰ্ছৰ পদত আৱেদন জনাইছিল। NHMৰ এই নাৰ্ছসকল এনে সময়ত সাক্ষাৎকাৰ অনুষ্ঠিত কৰিলে বঞ্চিত হোৱাৰ শংকা প্ৰকাশ কৰে সন্থাৰ সম্পাদিকাগৰাকীয়ে।
উল্লেখ্য যে ক’ৰোনা মহামাৰীৰ বাবে ৰাজ্যৰ স্বাস্থ্য বিভাগে ইতিমধ্যে সকলো স্বাস্থ্যকৰ্মীৰ ১০০ শতাংশ উপস্থিতি নিশ্চিত কৰাৰ লগতে কৰ্তব্য সম্পাদন কৰি যোৱাৰ নিৰ্দেশ জাৰি কৰি থৈছে। তদুপৰি স্বাস্থ্যজনিত আৰু প্ৰসূতিকালীন ছুটীৰ বাবে আন সকলো ছুটী বন্ধ কৰি ৰাখিছে। তদুপৰি NHMৰ নাৰ্ছসকল ক’ভিড-১৯ আক্ৰান্ত ৰোগীৰ চিকিৎসাৰ লগত জড়িত হৈ থকাৰ সমান্তৰালকৈ বিভিন্ন ঠাইৰ কোৱাৰেণ্টীন চেণ্টাৰসমূহতো কৰ্তব্য আগবঢ়াই আছে। সেয়ে ১৪ জুলাইৰ পৰা ২১ জুলাইলৈকে চলিবলগীয়া সাক্ষাৎকাৰৰ বাবে NHMৰ নাৰ্ছসকলে ছুটী নোপোৱাটো খাটাং। এনে পৰিপ্ৰেক্ষিতত এই নিযুক্তি প্ৰক্ৰিয়াৰ পৰা দেখদেখকৈ NHMৰ নাৰ্ছসকল বঞ্চিত হ’ব বুলি গুৰুতৰ অভিযোগ আনে সদৌ অসম নাৰ্ছ সন্থাই। একেটা বিবৃতিত সম্পাদিকা জুনু চুতীয়া দিহিঙীয়াই বিভিন্ন জিলাত চলি থকা লকডাউনৰ প্ৰসংগ উত্থাপন কৰি ক’ৰোনাৰ হটস্পটৰূপে স্বীকৃত গুৱাহাটীত অনুষ্ঠিত হ’বলগীয়া সাক্ষাৎকাৰত বৃহৎসংখ্যক প্ৰাৰ্থী সমবেত হ’লে ক’ৰোনা বিয়পাৰ সন্দেহো ব্যক্ত কৰে। সন্থাই সজোৰে দাবী কৰে জ্যেষ্ঠতাৰ ভিত্তিত লখিমপুৰ চিকিৎসা মহাবিদ্যালয়ৰ বাবে আৱেদন জনোৱাসকলক ৱেবছাইটযোগে নিযুক্তি দিয়াৰ ব্যৱস্থা চৰকাৰে কৰিব লাগে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
