বিভিন্ন কেলেংকাৰী ৰোধ কৰাৰ বিৰুদ্ধে সময়ে সময়ে আন্দোলন হৈ থাকে। আমাৰ দেশত বিভিন্ন বিভাগত হোৱা কেলেংকাৰীৰ তালিকা দীঘলীয়া। বিভিন্ন চৰকাৰী বিষয়া-কৰ্মচাৰীৰ পৰা আৰম্ভ কৰি একাংশ নেতা-পালিনেতা, ঠিকাদাৰৰ দ্বাৰা সংঘটিত এই কেলংকাৰীৰ বিৰুদ্ধে আমি জনসাধাৰণে আন্দোলনত নামো। কিন্তু এটা ৰাষ্ট্ৰীয় সংবাদমাধ্যমে শেহতীয়াভাৱে এনে এক ঘটনা পোহৰলৈ আনিছে যিটো ঘটনাৰ বিষয়ে শুনিলে সচেতন নাগৰিক হিচাপে আপোনাৰো চকু কঁপালত উঠিব।
ৰে’লৰ AC দবাৰ পৰা ১০৪.৫১ কোটি টকাৰ সামগ্ৰী চুৰি
বিগত ৪ বছৰত ভাৰতীয় ৰে’লৱেৰ বিভিন্ন ৰে’লৰ AC দবাৰ পৰা ১.২৭ কোটিৰো অধিক বিচনা সামগ্ৰী—যেনে বিচনা চাদৰ, কম্বল, গাৰুৰ কভাৰ, গাৰু আৰু টাৱেল—নিখোজ বা চুৰি হৈছে। চুৰি হোৱা এই সামগ্ৰীসমূহৰ মূল্য প্ৰায় ১০৪.৫১ কোটি টকা। ইণ্ডিয়ান এক্সপ্ৰেছৰ এক প্ৰতিবেদন অনুসৰি, তথ্যৰ জনাৰ অধিকাৰ আইন (RTI)ৰ জৰিয়তে ভাৰতীয় ৰে’লৰ ৬৯টা বিভাগৰ ভিতৰত ৫৪টা বিভাগৰ পৰা সংগ্ৰহ কৰা তথ্য বিশ্লেষণ কৰা হয়। RTIৰ পৰা সংগ্ৰহ কৰা তথ্য অনুসৰি, ২০২২ চনৰ জানুৱাৰীৰ পৰা ২০২৬ চনৰ মে’লৈ অৰ্থাৎ কোভিড-১৯ৰ পিছত AC দবাত বিচনা-সামগ্ৰী পুনৰ নিয়মীয়াকৈ বিতৰণ আৰম্ভ হোৱাৰ পিছৰে পৰা কমেও ১.২৭ কোটি বিচনা-সামগ্ৰী নিখোজ হৈছে। এই সামগ্ৰীসমূহৰ ভিতৰত আছিল বিচনা চাদৰ, কম্বল, গাৰু, গাৰুৰ কভাৰ আৰু মুখ মচা টাৱেল। RTIৰ তথ্য অনুসৰি, এই নিখোজ সামগ্ৰীৰ মূল্য আছিল প্ৰায় ১০৪.৫১ কোটি টকা। মূলতঃ বিচনা-সামগ্ৰী যোগান ধৰা চুক্তিভিত্তিক সংস্থাসমূহে এই লোকচান বহন কৰে। বহু ক্ষেত্ৰত এই ক্ষতিপূৰণ সংশ্লিষ্ট সংস্থাসমূহে কোচ এটেণ্ডেণ্ট বা কৰ্মচাৰীৰ দৰমহাৰ পৰা কাটি লোৱাৰ অভিযোগো উত্থাপন হৈছে।
AC দবাত দিয়া টাৱেলেই সৰ্বাধিক চুৰি
RTIৰ তথ্যত পোৱা গৈছে যে চুৰি হোৱা সামগ্ৰীসমূহৰ ভিতৰত মুখ মচা টাৱেলই আটাইতকৈ বেছি চুৰি হৈছে। ইয়াৰ পিছত আছে বিচনা চাদৰ, গাৰুৰ কভাৰ, কম্বল আৰু গাৰু। ২০২২ চনৰ তুলনাত ২০২৫ চনলৈ এই ধৰণৰ চুৰি হোৱা ঘটনা প্ৰায় ৫৬ শতাংশ বৃদ্ধি পাইছে। এই ঘটনাক গুৰুত্ব সহকাৰে লৈ ৰে’ল মন্ত্ৰালয়ে বিষয়টোত উদ্বেগ প্ৰকাশ কৰি চুৰি ৰোধৰ বাবে অধিক নজৰদাৰী, CCTV ব্যৱস্থা, Coach Mitra এপৰ ব্যৱহাৰ, কৰ্মচাৰীক সজাগ কৰা আদি ব্যৱস্থা গ্ৰহণ কৰাৰ কথা সদৰী কৰিছে।
সকলো ক্ষেত্ৰতে কেৱল চৰকাৰী বিভাগসমূহকে দায়ী কৰাৰ পূৰ্বে এগৰাকী সচেতন নাগৰিক হিচাপে এনে ধৰণৰ ঘটনা ৰোধৰ তৃণমূল পৰ্যায়ৰ পৰাই পদক্ষেপ লব লাগিব। ৰেলৱেৰ এই ঘটনাটো অত্যন্ত চিন্তাজনক।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
