এটা মহৰ ওজন কিমান হ’ব পাৰে? ১০০ কিঃগ্ৰাঃ, ২০০ কিঃগ্ৰাঃ, তাতোকৈ বেছি হ’লে ৫০০ কিঃগ্ৰাঃ৷ কিন্তু সকলো ধাৰণাক ভুল প্ৰমাণিত কৰি হাৰিয়ানাৰ পুষ্কৰ মেলালৈ আহিছে ১৫০০ কিঃগ্রাঃৰ এটা মহ৷ সেই মহটো এতিয়া সকলোৰে নজৰত৷ মহটোক গৰাকীয়ে দিয়া নাম আনমোল৷ এই মহটোৰ দামেই পুষ্কৰ মেলাত সকলোৰে দৃষ্টি কাঢ়িছে৷ এই মহটোৰ দাম গৰাকীক ২৩ কোটি টকালৈকে অফাৰ কৰা হৈছে৷ কিন্তু কিয় ইমান দৰ উঠিছে এই মহৰ?
আনমোলৰ চেহেৰাৰ বাবেই তাৰ এই দৰ উঠা নাই৷ আনমোলৰ বংশবিস্তাৰৰ ক্ষমতা অসাধাৰণ বাবেই তাৰ দৰ বাঢ়িছে৷ ৩০০ৰ পৰা ৯০০ টা পশুৰ প্ৰজননত এতিয়ালৈকে সহায় কৰিছে আনমোলে৷ এই লাভজনক ব্যৱসায় কৰি প্ৰতিমাহে ৪ৰ পৰা ৫লাখ টকা আয় কৰিছে আনমোলৰ মালিকেও৷ আনমোলৰ দৈনিক খৰচো যথেষ্ট৷ লাইফষ্টাইলো যথেষ্ট ব্যয়বহুল৷ দৈনিক আনমোলৰ নামত গৰাকীয়ে খৰচ কৰে প্ৰায় ১৫০০ টকা৷
আনমোলৰ খাদ্য তালিকাত দৈনিক থাকে শুকান ফল, ডালিম, কল, গাখীৰ, কণী আৰু অন্যন্য কিছু পশুখাদ্য৷ ইয়াৰোপৰি আনমোলে দৈনিক খাই কেক, সেউজীয়া ঘাঁহ আৰু দেশী ঘিঁ৷ মুঠতে পুষ্টিকৰ ডায়েট প্লেনত চলে আনমোল৷ ইয়াৰোপৰি আনমোলক দৈনিক দুবাৰকৈ বিশেষ বাদাম আৰু সৰিয়হ তেল মিহলাই গা ধুওৱা হয়৷ আনমোলক বিক্ৰি কৰাৰ বাবে ২৩ কোটি গৰাকীক অফাৰ কৰা হৈছে যদিও মালিকে এতিয়াও বিক্ৰি কৰিবলৈ ৰাজী নহয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
