বিশ্বৰ এখন দেশৰ ১৮টা সমাধিত শেহতীয়াকৈ উদ্ধাৰ হৈছে সোণৰ জিভাসহ আন বহুতো সামগ্ৰী। প্ৰাচীন ইতিহাসৰ অমূল্য ঐতিহ্য বহন কৰা ইজিপ্তৰ এখন চহৰত পুৰাতত্ত্ববিদসকলে ১৮টা প্ৰাচীন সমাধিক্ষেত্ৰ উদ্ধাৰ কৰিছে। এই তথ্য ইজিপ্তৰ পৰ্যটন আৰু প্ৰাচীন সম্পদ মন্ত্ৰালয়ে আনুষ্ঠানিকভাৱে প্ৰকাশ কৰিছে। মন্ত্ৰালয়ৰ তথ্য অনুসৰি, ভূমধ্যসাগৰৰ উপকূলত অৱস্থিত মাৰিনা আল-আলামেইন অঞ্চলত, আলেকজান্দ্ৰিয়াৰ পৰা প্ৰায় ১০০ কিলোমিটাৰ পশ্চিমে এই সমাধিক্ষেত্ৰসমূহ আৱিষ্কাৰ কৰা হৈছে। পুৰাতত্ত্ববিদসকলৰ অনুমান অনুসৰি, এই সমাধিসমূহ টলেমি বংশ অথবা ৰোমান সাম্ৰাজ্যৰ শাসনকালৰ।
টলেমি বংশ আৰু ৰোমান শাসনৰ ইতিহাস
টলেমি বংশই খ্ৰীষ্টপূৰ্ব ৩২২ চনৰ পৰা খ্ৰীষ্টপূৰ্ব ৩০ চনলৈকে ইজিপ্ত শাসন কৰিছিল। এই বংশৰ শাসকসকল আছিল বিশ্ববিজয়ী আলেকজাণ্ডাৰৰ এজন সেনাপতিৰ বংশধৰ। টলেমি বংশৰ অন্তিম শাসক আছিল বিখ্যাত ৰাণী ক্লিঅ’পেট্ৰা। তেওঁৰ মৃত্যুৰ পিছতেই ইজিপ্ত ৰোমান সাম্ৰাজ্যৰ অন্তৰ্ভুক্ত হয়। ইয়াৰ পিছত খ্ৰীষ্টপূৰ্ব ৩০ চনৰ পৰা খ্ৰীষ্টাব্দ ৩৯৫ চনলৈকে ইজিপ্তত ৰোমান শাসন অব্যাহত আছিল।
সমাধিক্ষেত্ৰত উদ্ধাৰ ‘সোণৰ জিভা’
পুৰাতত্ত্ববিদসকলে সদৰী কৰা অনুসৰি, উদ্ধাৰ হোৱা ১৮টা সমাধিক্ষেত্ৰৰ ভিতৰত ১১টা মাটিৰ গভীৰত খনন কৰা হৈছিল, আনহাতে বাকী ৭টা তুলনামূলকভাৱে কম গভীৰতাত আছিল। এই সমাধিক্ষেত্ৰসমূহৰ ভিতৰত আটাইতকৈ বিস্ময়কৰ আৱিষ্কাৰ হৈছে ‘সোণৰ জিভা’ (Gold Tongues)। বিশেষজ্ঞসকলৰ মতে, এই সোণৰ জিভাবোৰ মামীসমূহৰ মুখত ৰখা হৈছিল। ইয়াৰ উপৰিও এটা বেদী (altar) উদ্ধাৰ কৰা হৈছে, যাৰ আধাৰত কাঠৰ এখন দুৱাৰৰ নক্সা খোদিত কৰা দেখা গৈছে।
‘অন্য জগতলৈ যোৱাৰ দুৱাৰ’
প্ৰাচীন মিচৰীয় এই স্থাপত্যত এই ধৰণৰ দুৱাৰৰ বিশেষ গুৰুত্ব আছিল। ইজিপ্তৰ পৰ্যটন আৰু প্ৰাচীন সম্পদ মন্ত্ৰালয়ৰ আণ্ডাৰ ছেক্ৰেটাৰী হাশ্বাম হুছেইন-এ Live Science-ক জনোৱা মতে, প্ৰাচীন মিচৰীয় বিশ্বাস অনুসৰি এই দুৱাৰ জীৱিত আৰু মৃ*তলোকৰ মাজৰ সংযোগৰ প্ৰতীক আছিল। তেওঁলোকৰ বিশ্বাস আছিল যে, মৃ*তসকলে এই ‘দুৱাৰ’ৰ জৰিয়তে জীৱিতসকলে আগবঢ়োৱা উপহাৰ বা উৎসৰ্গ গ্ৰহণ কৰিব পাৰিছিল।
কিয় ৰখা হৈছিল সোণৰ জিভা?
ইজিপ্তত ইয়াৰ পূৰ্বেও বহু মামীৰ সৈতে সোণৰ জিভা উদ্ধাৰ হৈছে। প্ৰাচীন মিচৰীয়সকলৰ বিশ্বাস আছিল যে সোণ হৈছে দেৱতাসকলৰ মাংস। সেই বিশ্বাস অনুসৰি, মৃ*ত ব্যক্তিৰ মুখত সোণৰ জিভা ৰখাৰ অৰ্থ মৃ*ত্যুৰ পিছত তেওঁ দেৱতাসকলৰ সৈতে কথা-বতৰা পাতিব পাৰিব আৰু পৰলোকৰ যাত্ৰা অধিক সহজ হ’ব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
