আহি গ’ল নিয়ম, ১৬ বছৰৰ তলৰ শিশু-কিশোৰে ব্যৱহাৰ কৰিব নোৱাৰিব ছচিয়েল মিডিয়া
এতিয়াৰ পৰা সামাজিক মাধ্যম ব্যৱহাৰকাৰীৰ ওপৰত কঠোৰ হব অষ্ট্ৰেলিয়া চৰকাৰ। দেশ খনত এতিয়াৰে পৰা ১৬ বছৰৰ তলৰ শিশু আৰু কিশোৰে ব্যৱহাৰ কৰিব নোৱাৰিব ছচিয়েল মিডিয়া। যুৱ সমাজৰ মাজত সুৰক্ষাৰ দিশটোৰ প্ৰতি লক্ষ্য ৰাখিয়েই এই নিয়ম জাৰি কৰিছে অষ্ট্ৰেলিয়া চৰকাৰে।
বৃহস্পতিবাৰ ২৮ নৱেম্বৰ তাৰিখে সদনত এই সিদ্ধান্ত গ্ৰহণ কৰে দেশখনৰ চৰকাৰে। সংসদৰ নিম্ন সদনে সপ্তাহটোৰ আৰম্ভণিতে গৃহীত কৰিছিল এই নিয়ম। এতিয়া সেই সিদ্ধান্ত আইনত পৰিণত। এতিয়াৰে পৰা দেশ খনৰ ১৬ বছৰৰ তলৰ লোকে লোকেই সামাজিত মাধ্যমত একাউণ্ট ৰাখিব নোৱাৰিব।
অষ্ট্ৰেলিয়াৰ দূৰ-সংযোগ মন্ত্ৰী মিচেল ৰ’লেণ্ডে কয় যে, “এয়া যুৱক-যুৱতীসকলক সুৰক্ষা দিয়াৰ কথা – শাস্তি বা পৃথকীকৰণৰ কথা নহয়।” মন্ত্ৰী ৰ’লেণ্ডে , ড্ৰাগছ সেৱন, খাদ্যাভ্যাসৰ বিকাৰ আৰু হিংসাত্মক বিষয়বস্তুৰ সংস্পৰ্শৰ কথা উল্লেখ কৰি কয় যে শিশুসকলে অনলাইনত সন্মুখীন হোৱা কিছুমান ক্ষতিৰ বাবেই এই সিদ্ধান্ত।
ছ’চিয়েল মিডিয়া প্লেটফৰ্মসমূহে ব্যৱহাৰকাৰীৰ বয়স পৰীক্ষা কৰিবলৈ “যুক্তিসংগত পদক্ষেপ” ল’ব লাগিব। এই আইনখনে টিকটক, ফেচবুক, স্নেপচ্যাট, ৰেডিট, ইনষ্টাগ্ৰাম আৰু এক্সৰ দৰে ডাঙৰ ডাঙৰ প্লেটফৰ্মসমূহ সামৰি লোৱাৰ সম্ভাৱনা আছে। অৱশ্যে এই ক্ষেত্ৰত মেছেজিং এপ, গেমিং প্লেটফৰ্ম আৰু শিক্ষামূলক বিষয়বস্তু প্ৰদান কৰা সেৱাসমূহ ৰেহাই দিয়া হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
