উত্তৰ প্ৰদেশ বিধানসভাৰ নিৰ্বাচন উপলক্ষ্যে প্ৰতিদ্বন্দ্বী ৰাজনৈতিক দলসমূহৰ মাজত বাক-যুদ্ধই চূ়ড়ান্ত ৰূপ পাইছে৷
ইয়াৰ মাজতে সমাজবাদী পাৰ্টিৰ প্ৰধান তথা উত্তৰ প্ৰদেশৰ প্ৰাক্তন মুখ্যমন্ত্ৰী অখিলেশ সিং যাদৱে দাবী কৰিছে যে সমাজবাদী পাৰ্টি আৰু ৰাষ্ট্ৰীয় লোক দলৰ মিত্ৰশক্তিয়ে উত্তৰ প্ৰদেশৰ আগন্তুক বিধানসভা নিৰ্বাচনত ক্ষমতা দখল কৰিব৷
কেৱল ইমানেই নহয় অখিলেশ যাদৱৰ মতে তেওঁলোকৰ মিত্ৰশক্তিয়ে উত্তৰ প্ৰদেশ বিধানসভাৰ ৪০৩ খন আসনৰ ভিতৰত ৪০০ খনেই লাভ কৰিব৷
‘‘জনতা খঙত ক্ষুব্ধ হৈ আছে৷ মিত্ৰজোঁটে (সমাজবাদী পাৰ্টি আৰু ৰাষ্ট্ৰীয় লোক দল) ৪০০ খন আসন লাভ কৰিম৷ বিৰোধীয়ে মাত্ৰ ৩ খন আসনহে লাভ কৰিব৷’’ অখিলেশ সিং যাদৱে কয়৷
শনিবাৰে আলিগড়ত নিৰ্বাচনী প্ৰচাৰ চলোৱা অখিলেশ সিং যাদৱে AIMIMৰ প্ৰধান তথা সাংসদ আছুদুদ্দিন ওৱেছীলৈ গুলীচালনা কৰাৰ ঘটনাটোক তীব্ৰ গৰিহণা দিছে৷
‘‘ঘটনাটোৰ বিষয়ে জ্ঞাত হোৱাৰ লগে লগে সমাজবাদী পাৰ্টিয়ে গৰিহণা দিছিল। যদি এজন মাফিয়াই এজন ৰাজনৈতিক নেতাক দেখি গুলী চালনা কৰিছিল বিজেপিয়ে ইয়াৰ উত্তৰ দিব লাগিব। এয়া আইন আৰু শৃংখলাৰ আটাইতকৈ ডাঙৰ বিফলতা। আমি তেওঁলোকৰ এনে আইন-শৃংখলা বহুবাৰ দেখিছোঁ৷’’ সমাজবাদী পাৰ্টিৰ প্ৰধান গৰাকীয়ে লগতে কয়৷
ৰাজ্যখনৰ শাসনাধিষ্ঠিত বিজেপি চৰকাৰক আক্ৰমণ কৰি সমাজবাদী পাৰ্টিৰ প্ৰধান অখিলেশ সিং যাদৱে আৰু কয় যে যদি হাথৰাছ ধৰ্ষণৰ ভুক্তভোগীয়ে সঠিক চিকিৎসা লাভ কৰা হ’লে এতিয়াও জীয়াই থাকিলহেঁতেন৷
‘‘হাথৰাছৰ কিশোৰীগৰাকীৰ পৰিয়ালে ন্যায় বিচাৰিছিল, পৰিয়ালে ভুক্তভোগী কিশোৰীগৰাকীৰ নশ্বৰদেহ সন্মানসহকাৰে অন্ত্যেষ্টিক্ৰিয়া কৰিবলৈ বিচাৰিছিল। কিন্তু এই চৰকাৰৰ মানুহে কি কৰিছিল? তেওঁলোকে এইটো হ’বলৈ দিয়া নাছিল। যদি তাই চিকিৎসালয়ত সঠিক চিকিৎসা লাভ কৰিলেহেঁতেন, হয়তো আজি জীয়াই থাকিলহেঁতেন,’’ যাদৱে লগতে কয়।
উল্লেখ্য যে ৪০৩ আসনযুক্ত উত্তৰ প্ৰদেশৰ বিধানসভাৰ নিৰ্বাচন অহা ১০ ফেব্ৰুৱাৰিৰ পৰা ৭ মাৰ্চলৈ সাতটা পৰ্যায়ত অনুষ্ঠিত হ’ব আৰু অহা ১০ মাৰ্চত নিৰ্বাচনৰ ফলাফল ঘোষণা কৰা হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
