পৰিয়াল তথা অভিভাৱকসকলৰ চিন্তা আৰু শংকাত পেলাই ৰাজ্যত যুৱক-যুৱতীয়ে নিষিদ্ধ ঘোষিত আলফা(স্বাধীন)ত যোগদানৰ সংখ্যা ক্ৰমশঃ বৃদ্ধি পাবলৈ ধৰিছে৷
যোৱা মঙলবাৰে নাহৰকটীয়া আৰু শিৱসাগৰৰ পংকজ গগৈ আৰু পংকজ মেচ নামৰ দুজন যুৱকে আলফা(স্বাধীন)ত যোগদান কৰাৰ দিনাই নামনি অসমৰো এজন যুৱকে আলফা(স্বা)ত যোগদান কৰাৰ খবৰ আহিছে৷
প্ৰকাশিত খবৰ অনুসৰি পাঠশালা অঞ্চলৰ এজন প্ৰতিভাৱান খেলুৱৈ বিভাকৰ কলিতা(২৩)ই আলফা(স্বাধীন)ত যোগদান কৰাৰ কথা পোঁহৰলৈ আহিছে।
লগতে পঢ়ক এমাহৰ পিছতে বিয়া : ভাবী স্বামীৰ ডিঙিত ছুৰিকাঘাত কইনাৰ! কিন্তু কিয়?
যোৱা ৯ মাৰ্চত বিভাকৰ কলিতাই বাক্সা জিলাৰ শিমলাৰ কমলা শইকীয়া নামৰ যুৱকজনৰ সৈতে তিনিচুকীয়াৰ খুৰাকৰ ঘৰলৈ ওলাই যোৱাৰ পিছত ১০ মাৰ্চত ভগ্নীলৈ ফোন কৰাৰ পিছৰে পৰা মোবাইল ফোন বন্ধ কৰি পৰিয়ালৰ সৈতে যোগাযোগ বিচ্ছিন্ন কৰে।
ইয়াৰ পিছতে আৰক্ষীয়ে বিভাকৰ কলিতাৰ পিতৃ পুৰুষোত্তম কলিতাক পুত্ৰই আলফা(স্বা)ত যোগদান কৰাৰ কথা অৱগত কৰে৷ একমাত্ৰ পুত্ৰই আলফা(স্বা)ত যোগদান দিয়াৰ খবৰে পৰিয়ালটোৰ লগতে সমগ্ৰ পঠাশালাবাসীকে শোকত ম্ৰিয়মান কৰি তুলিছে৷
বিভাকৰ কলিতা মিক্সড মাৰ্চিয়েল আৰ্টৰ এগৰাকী প্ৰতিভাৱান খেলুৱৈ৷ তেওঁ ৰাষ্ট্ৰীয় পৰ্যায়ৰ প্ৰতিযোগিতা অংশগ্ৰহণ কৰি ৰাজ্যলৈ গৌৰৱ কঢ়িয়াই আনিছিল। এই প্ৰতিভাসম্পন্ন খেলুৱৈগৰাকীয়ে নিষিদ্ধ ঘোষিত সংগঠনত যোগদান কৰা খবৰে পাঠশালাবাসীক শোকস্তব্ধ কৰি তুলিছে।
লগতে পঢ়ক বিবাহস্থলীতে দৰাৰ গালত দুটা পূৰ্ণতীয়া চৰ কইনাৰ, কিয় দিলে এই চৰ? চাওক ভিডিঅ’
একাংশ স্থানীয় ৰাইজৰ মতে প্ৰতিভাৱান খেলুৱৈগৰাকীয়ে চৰকাৰৰ তৰফৰ পৰা কোনো ধৰণৰ সহায়-সহযোগ লাভ নকৰি হতাশা আৰু ক্ষোভতে আলফা(স্বা)ত যোগদান কৰা বুলি প্ৰকাশ কৰিছে৷
ইফালে একমাত্ৰ পুত্ৰই আলফা(স্বা)ত যোগদানৰ খবৰ লাভ কৰিয়ে ৰুগীয়া মাতৃ আৰু পিতৃয়ে পৰেশ অসমক তেওঁলোকৰ পুত্ৰক ঘৰলৈ ঘূৰাই পঠিয়াবলৈ কাতৰ আহ্বান জনাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
