মানৱেন্দ্ৰ কুমাৰ দাসঃ যোৱা সময়ছোৱাত নবীন-প্ৰবীণ বহু নেতাই কংগ্ৰেছ দল ত্যাগ কৰিছে৷ আৰু অন্য ৰাজনৈতিক দলত নতুন সমীকৰণ আৰম্ভ কৰিছে৷ এই সংবাদ এতিয়া অসমত বা সামগ্ৰিকভাৱে সমগ্ৰ দেশতে বহুল প্ৰচাৰিত৷ কংগ্ৰেছ দলৰ সাংগঠনিক ব্যৰ্থতা অথবা দুৰ্বলতাৰ বাবে এচাম লোকে দল ত্যাগ কৰা বুলিও চৰ্চা চলিছে৷ ঠিক সেই সময়তে আৰু এচামে কংগ্ৰেছ নেতৃত্বৰ বিৰুদ্ধেও ক্ষোভ প্ৰকাশ নকৰাকৈ থকা নাই৷ তেনে এচাম নেতাই সংবাদ মাধ্যমৰ ওচৰত ৰাজহুৱাভাৱে আৰু মুকলিকৈ নেতৃত্ব ব্যৰ্থ হোৱা বুলি অভিযোগ উত্থাপন কৰে৷
এনে উদাহৰণ অসমতো কম নহয়৷ প্ৰসংগক্ৰমে ইয়াকো উল্লেখ কৰি থোৱা ভাল হ’ব যে যিসকলে কংগ্ৰেছ দল ত্যাগ কৰি অন্য ৰাজনৈতিক দলত নতুন সমীকৰণ ৰচনা কৰিব বিচাৰিছে, সেইসকল নেতাৰ মূল অভিযোগটো হ’ল যে কংগ্ৰেছৰ বৰ্তমানৰ নেতৃত্বৰ বিজেপিৰ আগ্ৰাসী ৰাজনীতিক প্ৰতিহত কৰিব নোৱাৰে৷ অৰ্থাৎ দলত্যাগী নেতাসকলে একপক্ষীয়ভাৱে কংগ্ৰেছ নেতৃত্ব আৰু কংগ্ৰেছৰ সাংগঠনিক দুৰ্বলতাকে জগৰীয়া কৰিছে৷
অতি সম্প্ৰতি এই ধাৰণাটো ৰাইজৰ মাজতো প্ৰতিষ্ঠিত হৈছে৷ কিন্তু প্ৰকৃত তথ্য দৰাচলতে অন্যহে৷ প্ৰধানমন্ত্ৰী নৰেন্দ্ৰ মোদী নেতৃত্বাধীন বিজেপি চৰকাৰৰ ৰাজনৈতিক আৰু সাংগঠনিক আগ্ৰাসনৰ বাবে ২০১৪ চনৰ পাছত সমগ্ৰ দেশতে কংগ্ৰেছ তীব্ৰ প্ৰত্যাহ্বানৰ সন্মুখীন হয়৷ পৰিণতিত ২০১৪ চনৰ পাছত বহু কেইটা গুৰুত্বপূৰ্ণ নিৰ্বাচনত দলটো শোচনীয় ধৰণে পৰাজিত হৈছে৷ এই পৰাজয় ইমানেই ব্যাপক আৰু সৰ্বমুখী হৈ উঠিছে যে কংগ্ৰেছ একপ্ৰকাৰ বিধ্বস্তপ্ৰায়৷
লগতে পঢ়ক আলফা(স্বা)ৰ ওচৰত ক্ষমা ভিক্ষা মন্ত্ৰীৰ, মুখ্যমন্ত্ৰীয়ে মন্ত্ৰীক কি সকীয়নি দিলে?
বৰ্তমান ৰাজনৈতিক আৰু সাংগঠনিকভাৱে তীব্ৰ সংকটত কংগ্ৰেছ দল৷ সংকট মোচনৰ বাবে নিখিল ভাৰত কংগ্ৰেছ কমিটীয়ে শীৰ্ষ বৈঠকো বহুবাৰ অনুষ্ঠিত কৰে৷ বৈঠকসমূহত বিভিন্ন ৰণকৌশল লোৱাও হয়৷ নিখিল ভাৰত কংগ্ৰেছ কমিটীয়ে ৰচনা কৰে ন ন ৰাজনৈতিক সমীকৰণ৷ বিজেপিক প্ৰতিহত কৰাৰ লক্ষ্যৰে বিভিন্ন দলৰে নিৰ্বাচনী মিত্ৰতাও কৰা হয়৷ কিন্তু তাৰ পাছতো প্ৰত্যাহ্বানক কংগ্ৰেছে নেওচিব নোৱাৰিলে৷
শেহতীয়াভাৱে ৰাজস্থানৰ উদয়পুৰত কংগ্ৰেছ দলে নৱ সংকল্প শিবিৰ অনুষ্ঠিত কৰে৷ এই শিবিৰত উপস্থিত থাকে দেশৰ আটাইকেইখন ৰাজ্যৰ প্ৰদেশ সভাপতিসহ অন্য বহু শীৰ্ষ নেতা৷ যোৱা ১৪, ১৫ আৰু ১৬ মে’ত অনুষ্ঠিত হোৱা সংকল্প শিবিৰত কংগ্ৰেছে বহু গুৰুত্বপূৰ্ণ সিদ্ধান্ত গ্ৰহণ কৰে৷ এই সিদ্ধান্তৰ বাবে কংগ্ৰেছ দলৰ বহু নেতাৰ ৰাজনৈতিক ভৱিষ্যৎ ৰুদ্ধ হোৱাটো নিশ্চিত হৈছে৷ সেইসকল নেতাই এতিয়া নেতৃত্বৰ বিৰুদ্ধে ক্ষোভ উজাৰি কংগ্ৰেছ দল ত্যাগ কৰিছে৷ কিন্তু কি সেই প্ৰত্যাহ্বানপূৰ্ণ সিদ্ধান্ত?
নিখিল ভাৰত কংগ্ৰেছ কমিটীৰ এক শীৰ্ষ সূত্ৰৰ পৰা সম্ভেদ পোৱা অনুসৰি সংকল্প শিবিৰত ৫ টা গুৰুত্বপূৰ্ণ সিদ্ধান্ত লোৱা হৈছে৷ প্ৰথম সিদ্ধান্ত— কংগ্ৰেছ দলৰ কোনো নেতাই ৫ বছৰোধিক কাল দলীয় পদত থাকিব নোৱাৰিব৷ দ্বিতীয় সিদ্ধান্ত— কোনো নেতাই কংগ্ৰেছ দল অথবা চৰকাৰত দুটা পদ দখল কৰিব নোৱাৰিব৷ তৃতীয় সিদ্ধান্ত— কংগ্ৰেছ দল আৰু চৰকাৰৰ ৫০ শতাংশ পদবী ৫০ বছৰ বয়সতকৈ কম বয়সৰ নেতা–কৰ্মীৰ বাবে সংৰক্ষিত থাকিব৷ চতুৰ্থ সিদ্ধান্ত— দলীয় পদবী আৰু প্ৰাৰ্থিত্ব প্ৰদানৰ ক্ষেত্ৰত মহিলা, অনুসূচীত জাতি, অনুসূচীত জনজাতি, অন্যান্য পিছপৰা জাতি আৰু সংখ্যালঘু সম্প্ৰদায়ৰ নেতা–কৰ্মীক অগ্ৰাধিকাৰ দিয়া হ’ব৷ পঞ্চম সিদ্ধান্ত— কংগ্ৰেছত জিলা পৰ্যায়ৰ পৰা মণ্ডল পৰ্যায়লৈ সকলো পদবী নিৰ্বাচিত প্ৰতিনিধিয়েহে দখল কৰিব পাৰিব৷
লগতে পঢ়ক জুন মাহত কোন কোন ৰাশিৰ ওপৰত পৰিব মা লক্ষ্মীৰ কৃপাৰ বৰষুণ?
এই ৫ টা সিদ্ধান্তৰ উপৰিও একদফীয় অৰ্থাৎ একমাত্ৰ ৰাজনৈতিক উদ্দেশ্য আৰু সমীকৰণেৰে কংগ্ৰেছ দলে দেশত পূৰ্ণ তৎপৰতা চলাব৷ আৰু দলৰ সেই একমাত্ৰ এজেণ্ডাটো হৈছে কেৱল বিজেপিক ৰাজনৈতিক আৰু সাংগঠনিকভাৱে পৰাজিত কৰাৰ৷ দৰাচলতে কংগ্ৰেছ সভানেত্ৰী ছোনিয়া গান্ধীয়ে ২০২০ চনতে এই নীতি মানি চলিবলৈ দলৰ শীৰ্ষ নেত্ৰীবৃন্দক আহ্বান জনাইছিল৷ কিন্তু সেই আহ্বান বিশেষভাৱে কাৰ্যকৰী হোৱা নাছিল৷
গতিকে, যোৱা মে’ মাহত নৱ সংকল্প শিবিৰ অনুষ্ঠিত কৰি ৫ টা সিদ্ধান্ত দলে আনুষ্ঠানিকভাৱে গ্ৰহণ কৰে৷ এই সিদ্ধান্তৰ বাবে কংগ্ৰেছত বহু নেতাৰ ৰাজনৈতিক যাত্ৰা যটি পৰাতো নিশ্চিত হৈ পৰে৷ বহু নেতাই এই সিদ্ধান্তসমূহৰ উমান প্ৰায় পূৰ্বেই কংগ্ৰেছ দল ত্যাগ কৰিছে৷ দৰাচলতে দলত্যাগ কৰিবলৈ সেইসকল নেতা বাধ্য হৈছে অথবা দলে তেওলোকক বাধ্য কৰিছে৷
কংগ্ৰেছৰ এনে পৰীক্ষামূলক কঠোৰ সিদ্ধান্তৰ বাবে আগন্তুক সময়ত অসমতো কংগ্ৰেছ দল ত্যাগ কৰিবলৈ বহু জ্যেষ্ঠ নেতা সাংসদ-বিধায়ক-প্ৰাক্তন মন্ত্ৰী বাধ্য হ’ব৷ কিন্তু কোন তেওঁলোক? ইয়াৰ পৰৱৰ্তী লেখাত আমি উল্লেখ কৰিম কাৰ বাবে স্তব্ধ হৈ পৰিব কংগ্ৰেছত ৰাজনৈতিক যাত্ৰা? অন্য অৰ্থত বহু নেতা-কৰ্মীৰ বাবে হয়তো স্থান নাথাকিব কংগ্ৰেছ দলত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
