প্ৰেমত ঘূৰে ভূমণ্ডল, প্ৰেমত ফুলে শতদল। প্ৰেম হেনো কৰা নাযায়, প্ৰেম হৈ যায় নিজে নিজে। প্ৰকৃত প্ৰেম দুৰন্ত, ইয়াৰ নিজস্ব গতিক বাধা দিয়াৰ ক্ষমতা কাৰো হাতত নাথাকে। প্ৰেমৰ অনন্য শক্তিৰ জৰিয়তে অসম্ভৱ কামো সম্ভৱ হৈ উঠিছে।
সেই প্ৰেমত হাবুডাবু খায়েই এজন যুৱকে একেলগে দুই প্ৰেমিকাৰ শিৰত পিন্ধালে সেন্দূৰ। ভাৰতত হিন্দু বিবাহ আইন অনুসৰি একে সময়তে এখন বিবাহৰহে অনুমতি দিয়া হৈছে। প্ৰথম সংগী থকাৰ পিছত দ্বিতীয় বিবাহ কৰাটো অবৈধ গণ্য কৰা হয়। কিন্তু ঝাৰখণ্ডৰ সন্দীপ নামৰ এজন যুৱকে দুই প্ৰেমিকাক একেলগে সামাজিকভাৱে পিন্ধালে সেন্দূৰ।
ঘটনা অনুসৰি ঝাৰখণ্ডৰ লোহৰদগাৰ এখন গাঁৱৰ বাসিন্দা সন্দীপ ওৰাং নামৰ এজন লোকে তেওঁৰ দুই প্ৰেমিকাৰ সৈতে একেলগে বিবাহপাশত আবদ্ধ হয়। সন্দীপে দুয়োগৰাকী প্ৰেমিকাৰ পৰা গোপনে এই বিবাহ কৰা নাই, গোটেই পৰিয়াল আৰু গাঁৱৰ সন্মুখত দুয়োজনী প্ৰেমিকা একেলগে বিয়া কৰাইছে।
লগতে পঢ়ক আজিৰ পৰা অম্বুবাচী পূজা, ষাঁঠৰ উপলক্ষ্যে কি কি নিয়ম মানি চলিব?
দুয়োজনী প্ৰেয়সীক বিয়া কৰাই সন্দীপে কয় যে তেওঁ আইনৰ প্ৰতি কোনো গুৰুত্ব নিদিয়ে, তেওঁ মাত্ৰ জানে যে তেওঁ দুয়োজনীকৈ ভাল পাইছে আৰু এতিয়া দুয়োৰে কোনো এজনীকে এৰিব নোৱাৰে।
সন্দীপে বিগত তিনি বছৰ ধৰি প্ৰথম প্ৰেমিকাৰ সৈতে লিভ-ইন সম্পৰ্কত বাস কৰি আছিল। কুসুম আৰু সন্দীপৰ এটি সন্তানো আছে। সকলো ঠিকেই চলি আছিল। কিন্তু এবছৰৰ আগতে পশ্চিমবংগৰ এটা ইটাভাটাত কাম কৰিবলৈ যায় সন্দীপ। তাতে এগৰাকী যুৱতীৰ সৈতে চিনাকি হয়। যুৱতীগৰাকীও ইটাভাটত কাম কৰিছিল। পিছৰ পৰ্যায়ত গঢ়ি উঠিছিল দুয়োৰে প্ৰেমৰ সম্পৰ্ক।
কেইমাহমান কাম কৰি সন্দীপ পুনৰ নিজৰ গাঁৱলৈ ঘূৰি আহে। কিন্তু ঘৰলৈ অহাৰ পিছতো যুৱতীগৰাকীৰ লগত কথা পাতি থাকিল। আনকি প্ৰেমিকাক লগ কৰিবলৈও ধৰিলে। সন্দীপৰ প্ৰথম প্ৰেমিকাৰ বিষয়ে পৰিয়ালৰ সকলোৱে জানিছিল। কিন্তু সন্দীপৰ দ্বিতীয় প্ৰেমিকাৰ কথা জানিব পাৰি সকলো খঙাল হৈ উঠে।
লগতে পঢ়ক ব্লেক টিয়ে ওজন হ্ৰাস কৰে নে? শৰীৰৰ বাবে ই কিমান উপকাৰী? জানিবলৈ চাওক…
পৰিয়াল তথা গাঁৱৰ মানুহে সন্দীপৰ দ্বিতীয় প্ৰেমৰ বিৰোধিতা কৰিলে। তেওঁক এই দ্বিতীয় প্ৰেয়সীক এৰিবলৈ ক’লে। কিন্তু সন্দীপ নিজৰ মতত অটল। তেওঁ প্ৰথম প্ৰেমিকাকো নেৰে আৰু দ্বিতীয়া প্ৰেমিকাকো নেৰে।
অৱশেষত বহু কাজিয়া আৰু বিতৰ্কৰ অন্তত গাঁৱত পঞ্চায়ত সভাৰ আহ্বান কৰিলে। সভাত সিদ্ধান্ত লোৱা হ’ল যে সন্দীপে দুয়োগৰাকী যুৱতীকে বিয়া কৰাব লাগে। পঞ্চায়তৰ এই সিদ্ধান্তৰ বিৰোধিতা নকৰিলে দুই প্ৰেমিকা তথা তেওঁলোকৰ পৰিয়ালে।
তাৰ পিছত সন্দীপে সকলোৰে সন্মুখত দুই প্ৰেমিকাক একলগে পিন্ধালে সেন্দূৰ। এতিয়া দুই প্ৰেমিকা আৰু সন্দীপ একেলগে বাস কৰি আছে। সন্দীপৰ এই ঘটনাৰ পৰা এইটো কথা আকৌ এবাৰ প্ৰমাণিত হ’ল যে নিজস্ব গতিক বাধা দিয়াৰ ক্ষমতা কাৰো হাতত নাথাকে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
