অসম লাইভ২৪ঃ উত্তৰাখণ্ডত ভয়াৱহ প্রাকৃতিক দুৰ্যোগ। হিমস্খলনৰ ঘটনাত আৱদ্ধ হৈ পৰিছে ৩০ৰো অধিক পৰ্বতাৰোহী। উত্তৰাখণ্ডৰ উত্তৰ কাশী জিলাত সংঘটিত হৈছে এই ঘটনা। ‘দ্রৌপদী কা দাণ্ডা’ নামৰ পাহাৰৰ চূড়াত আৰোহণৰ চেষ্টা কৰোঁতেই এই ঘটনা সংঘটিত হোৱা বুলি জানিব পৰা গৈছে। এই হিমস্খলনত ১০ জন পৰ্বতাৰোহীৰ মৃত্যু হোৱাৰ সন্দেহ। নিহত ১০ পৰ্বতাৰোহীৰ মাজত আছে অসমৰো দুই পৰ্বতাৰোহী।
সূত্ৰ অনুসৰি অসমৰ পৰা যোৱা দুই পৰ্বতাৰোহী ক্ৰমে ভাৰ্গৱ বৰা আৰু দীপশিখা বৰাৰ বৰ্তমানো কোনো সন্ধান হোৱা নাই। আনহাতে বৰ্তমানেও সন্ধানহীন হৈ আছে ১১জন পৰ্বতাৰোহী। উত্তৰ কাশীৰ নেহৰু মাউণ্টেনাৰিং ইনষ্টিটিউটৰ পৰ্বতাৰোহী আছিল আটাইকেইজন পৰ্বতৰোহী। প্ৰতিষ্ঠানটোৰ ২৫ জনীয়া প্ৰশিক্ষাৰ্থী পৰ্বতাৰোহী আৰু ৭জনীয়া প্ৰশিক্ষকৰ দলটোৱে উভতি অহাৰ পথতেই সংঘটিত হৈছে এই অঘটন। ১৬ হাজাৰ ফুট উচ্চতাত সংঘটিত হৈছে এই ভয়াৱহ হিমস্খলন। সন্ধানহীন পৰ্বতাৰোহীক উদ্ধাৰৰ বাবে ব্যাপক অভিযান চলাইছে উদ্ধাৰকাৰী দলে।
উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে টুইট যোগে প্ৰকাশ কৰা অনুসৰি হিমস্খলনত আৱদ্ধ পৰ্বতাৰোহী প্ৰশিক্ষাৰ্থীসকলক উদ্ধাৰ কৰিবলৈ জিলা প্ৰশাসন, এন ডি আৰ এফ, এছ ডি আৰ এফ, সেনা আৰু আইটিবিপিৰ জোৱানসকলে দ্ৰুতগতিত উদ্ধাৰ অভিযান চলাইছে। আনহাতে ভাৰতীয় বায়ু সেনাই সাহায্য আৰু উদ্ধাৰ বাবে দুখন চিতা হেলিকপ্টাৰো প্ৰেৰণ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
