অসম লাইভ ২৪ঃ ‘মুছলমানক কটাক্ষ নকৰিব, দেশত মুছলমানসকলেই সৰ্বাধিকভাৱে কণ্ডমৰ ব্যৱহাৰ কৰে।’ ৰাষ্ট্ৰীয় স্বয়ংসেৱক সংঘপ্ৰধান মোহন ভাগৱতৰ মন্তব্যৰ প্ৰত্ত্যুত্তৰত এই দাবী কৰিছে AIMIM-দলৰ নেতা আছাউদ্দিন ওৱেছিয়ে। হায়দৰাবাদৰ এখন সভাত ওৱেছিয়ে মুছলমানৰ জনসংখ্যা বঢ়া নাই বৰং কমিছেহে সেই কথা প্ৰকাশ কৰিবলৈ গৈ কণ্ডমৰ কথাও উল্লেখ কৰে।
সংঘৰ প্ৰতিষ্ঠা দিৱসত জনসংখ্যা নিয়ন্ত্ৰন আইন কটকটীয়া কৰাৰ বাবে চৰকাৰক আবেদন জনাইছিল সংঘ প্ৰধান মোহন ভাগৱতে। মোহন ভাগৱতে তেওঁৰ ভাষণত কৈছিল,’ধৰ্মভিত্তিক জনসংখ্যাৰ ভাৰসাম্য ঠিক নাথাকিলে ভৌগোলিক সীমাতো পৰিবৰ্তন আহিব। জনসংখ্যা নিয়ন্ত্ৰণ তথা ধৰ্মভিত্তিক জনসংখ্যাৰ ভাৰসাম্য নিয়ন্ত্ৰণ অতি গুৰুত্বপূৰ্ণ বিষয়। দেশৰ স্বাৰ্থতেই সামগ্ৰিক জনসংখ্যা নীতিৰ আৱশ্যক আছে। যি নীতি সকলো ধৰ্মৰ লোকৰ বাবেই প্ৰযোজ্য হ’ব।’
সংঘপ্ৰধান ভাগৱতে এই সন্দৰ্ভত দাঙি ধৰা যুক্তিত কয় যে দেশত হিন্দুৰ জন্মৰ হাৰ কমিছে। মুছলমানৰ জন্মৰ হাৰ কমিলেও সেয়া হিন্দুৰ তুলনাত তেনেই নগণ্য। এই গতিত জনসংখ্যাৰ বিস্ফোৰণ ঘটিলে দেশত অচিৰেই মুছলমান সংখ্যাগুৰু হ’ব। সেয়ে জনসংখ্যা নিয়ন্ত্ৰণ বিল অনাটো অত্যন্ত গুৰুত্বপূৰ্ণ বিষয়।
শনিবাৰে হায়দৰাবাদৰ এখন ৰাজহুৱা সভাত সংঘপ্ৰধান ভাগৱতৰ কথাৰ প্ৰত্ত্যুত্তৰ দিয়ে AIMIM-ৰ নেতা আছাউদ্দিন ওৱেছিয়ে। ওৱেছিয়ে কয়,’আপোনালোক আতঙ্কিত নহ’ব। মুছলমানৰ জনসংখ্যা বঢ়া নাই। দিনকদিনে মুছলমানৰ জন্মৰ হাৰ কমিছেহে। কোনে বেছি কণ্ডম ক্ৰয় কৰে জানেনে? মুছলমানেই সৰ্বাধিক কণ্ডম ক্ৰয় কৰে আপোনালোকে নহয়।’
উল্লেখ্য যে এই বাকযুদ্ধতেই শান্ত নাথাকি ওৱেছিয়ে কয়,’কেন্দ্ৰই প্ৰকাশ কৰা তথ্যমতে দেশত মুছলমানৰ জন্মৰ হাৰ ২ শতাংশ কমিছে। আপোনালোকে তথ্য বিকৃত কৰিছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
