অসম লাইভ ২৪ঃ পোহৰৰ উৎসৱ দীপাৱলী। আলোকেৰে আলোকিত কৰিবলৈ সকলোৱে প্ৰস্তুতি চলোৱাৰ মাজতেই দীপাৱলীত প্ৰধানমন্ত্ৰী নৰেন্দ্ৰ মোডীয়ে দেশৰ যুৱ সমাজক দিব বিশেষ উপহাৰ। দেশৰ ৭৫,০০০ যুৱক-যুৱতীক দীপাৱলীৰ দিনাই প্ৰধানমন্ত্ৰী মোডীয়ে উপহাৰ হিচাপে দিব একোটা চাকৰি।
২২ অক্টোবৰত প্ৰধানমন্ত্ৰী মোডীয়ে ভিডিঅ’ কনফাৰেন্সেৰে দেশৰ যুৱ প্ৰজন্মৰ লগত সংযোগ স্থাপন কৰিব। ভিডিঅ’ কনফাৰেন্সযোগেই ৭৫,০০০ যুৱক-যুৱতীক চাকৰিৰ নিযুক্তিপত্ৰ প্ৰদান কৰিব প্ৰধানমন্ত্ৰীগৰাকীয়ে।
বিভিন্ন বিভাগত এই নিযুক্তি দিয়া হ’ব। নিযুক্তি দিবলগীয়া বিভাগসমূহৰ ভিতৰত আছে প্ৰতিৰক্ষা, ৰে’লৱে, ডাক, গৃহ মন্ত্ৰালয়, চিআইএছএফ, শ্ৰম আৰু নিযুক্তি, চিবিআই, শুল্ক, বেংক, চিএএফ ইত্যাদি। প্ৰধানমন্ত্ৰী মোডীয়ে চলিত বছৰৰ জুন মাহত ঘোষণা কৰিছিল আগন্তুক বৰ্ষৰ ডিচেম্বৰ মাহৰ ভিতৰত ১০ লাখ লোকক চাকৰি দিয়া হ’ব।
উল্লেখ্য যে ২২ অক্টোবৰত হ’বলগীয়া বৃহৎ নিযুক্তিৰ অনুষ্ঠানত কেইবাগৰাকীও কেন্দ্ৰীয় মন্ত্ৰীয়ে যোগদান কৰিব। লগতে বহুকেইজন সাংসদেও এই কাৰ্যসূচীত যোগদান কৰিব। ইয়াৰোপৰি ২২ অক্টোবৰত থকা ধনতেৰাছ উপলক্ষে প্ৰধানমন্ত্ৰী নৰেন্দ্ৰ মোডীয়ে প্ৰায় ৪.৫০ লাখ হিতাধিকাৰীৰ গৃহ প্ৰৱেশত ভাৰ্চুৱেলী অংশগ্ৰহণ কৰিব। মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানে কয় যে, প্ৰধানমন্ত্ৰী নৰেন্দ্ৰ মোডীয়ে ২২ অক্টোবৰত ধনতেৰাছ উপলক্ষে সাতনা জিলাৰ প্ৰধানমন্ত্ৰী আৱাস যোজনাৰ ৪.৫০ লাখ হিতাধিকাৰীৰ গৃহ প্ৰৱেশত ভাৰ্চুৱেলী অংশগ্ৰহণ কৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
