অসম লাইভ ২৪ঃ ‘যি ভালপোৱা নীলপৱন-দিপালীয়ে জানে সেই কথা তোমাক ভালপাও বুলি কোৱা বহুতেই নাজানে।’ ঠিকেই ভালপোৱা জানিছিল নব্বৈৰ দশকৰ এই প্ৰেমিক যুঁটিটোৱে। মটৰ নিউৰণ ৰোগত আক্ৰান্ত দিপালী বৰঠাকুৰক মৃত্যু পৰ্যন্ত ভালপোৱাৰে সামৰি ৰাখিছিল নীলপৱনে। বেলতলাৰ সৌৰভ নগৰৰ সেই বিশেষ ঘৰটোৰ পৰাই নীলপৱন-দিপালীয়ে বিলাইছিল প্ৰেমৰ সুবাস।
দিপালী বৰঠাকুৰৰ মৃত্যুৰ পূৰ্বেই এদিন এটা সাক্ষাৎকাৰত নীলপৱনে দিপালী বৰঠাকুৰৰ সন্দৰ্ভত কৈছিল, ‘মোতকৈ তেওঁহে আগত যোৱাটো বিচাৰো। মই আগেয়ে গ’লে তেওঁৰ যে বৰ আলাই-আথানি হ’ব।’ শিল্পী নীলপৱন বৰুৱাৰ কথা যেন সেইদিনা নেদেখাজনে শুনিছিল। তেওঁ বিচৰাটোৱেই হৈছিল। তেওঁতকৈ আগেয়ে গুচি গৈছিল নীলপৱনৰ প্ৰেয়সী তথা কোকিল কণ্ঠী গায়িকা দিপালী বৰঠাকুৰ।
বহু গীতৰ লগতে ‘চেনাই মই যাওঁদেই’ বুলি গীতত কণ্ঠ নিগৰোৱা দিপালী বৰঠাকুৰ গুচি গৈছিল ২০১৮ চনৰ ডিচেম্বৰৰ ২১ তাৰিখে। নেমকেয়াৰ হাস্পতালত বিদায় লৈছিল দিপালী বৰঠাকুৰে। আজীৱন একেলগে বাট বুলা প্ৰেমিক যুটিটোৰ বান্ধোন সেইদিনা মৃত্যুৱে চিঙিছিল। অকলশৰীয়া হৈছিল নীলপৱন বৰুৱা। লাহে লাহে স্মৃতিশক্তিও হেৰুৱাইছিল শিল্পী নীলপৱন বৰুৱাই। কথাবোৰ পাহৰা হৈছিল যদিও মনত কিন্তু সাঁচ বহুৱাই ৰৈছিল দিপালী বৰঠাকুৰৰ স্মৃতি। অলসভাৱে উকা ঘৰখনত দিনৰ পাছত দিন পাৰ হৈছিল। বাৰ্ধক্যইয়ো কোঙা কৰিছিল শিল্পী নীলপনল বৰুৱাক। কেনভাছত পৰশ দিবলৈ তুলি লৈছিল ৰঙ-তুলিকা কিন্তু বিফল হৈছিল বাৰে বাৰে শিল্পীগৰাকী। এদিন তেওঁ কৈয়েই পেলাইছিল, ‘সৃষ্টিও সময় নিৰ্ভৰশীল।’
আজি আজন্ম প্ৰেমিকজনো গ’লগৈ। শিল্পী নীলপৱন বৰুৱাই কেৱল ৰঙ-তুলিকাৰেই জীৱন্ত হৈ থাকিব এনে নহয়। অসমৰ প্ৰেমিক যুঁটিৰ কথা ক’লেও অসমবাসীৰ মনত দোলা দিব নীলপৱন-দিপালীয়ে। সৌৰভ নগৰৰ সেই গৃহই সোঁৱৰাই থাকিব ইয়াতেই জীৱন্ত হৈছিল আজন্ম এক প্ৰেম কাহিনী। যুগে যুগে অসমীয়াৰ প্ৰাণত জীঁপাল হৈয়েই থাকিব নীলপৱন-দিপালী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
