অসম লাইভ২৪ঃ অসম সন্তান ১১ বছৰীয়া অক্ষিতা চাংকাকতিয়ে সন্মানীয় India Book of Records ত নিজৰ নাম লিপিবদ্ধ কৰিবলৈ সক্ষম হৈছে৷ মাত্ৰ পাঁচ মাহৰ ভিতৰতে দুখনকৈ কিতাপ লিখি প্ৰকাশ কৰিল অক্ষিতাই। অক্ষিতাই কম সময়ত দুখনকৈ কিতাপ প্ৰকাশ কৰা আটাইতকৈ কম বয়সীয়া লেখিকা হিচাপে প্ৰতিষ্ঠা লাভ কৰিছে৷ ২০২২ চনৰ জুলাই মাহত তেওঁৰ প্ৰথমখন গল্প সংকলন ‘Mimi’s Magical Adventures’ৰ সফলতাৰ পিছত সেই একে বছৰৰে ১৯ ডিচেম্বৰত অক্ষিতাৰ দ্বিতীয়খন কিতাপ “The Unbeatable Friends-The End of Evil” প্ৰকাশ পায়৷
ইংৰাজীতে লিখা তেওঁৰ দুয়োখন কিতাপে ইতিমধ্যেই দেশ-বিদেশৰ পঢ়ুৱৈৰপৰা সমাদৰ লাভ কৰিবলৈ সক্ষম হৈছে৷ ২০২২ চনৰ ৩১ ডিচেম্বৰত India Book of Records ৰ কৰ্তৃপক্ষই অক্ষিতাই আটাইতকৈ কম বয়সীয়া লেখিকা হিচাপে অভিলেখ সৃষ্টি কৰা বুলি নিশ্চিত কৰে৷ অক্ষিতা মেঘালয়ৰ এসময়ৰ ৰাজ্যিক টেবুল টেনিচ জুনিয়ৰ শাখাৰ ৰাজ্যিক দলক প্ৰতিনিধিত্ব কৰা খেলুৱৈ। বৰ্তমান পুণেত কৰ্মৰত অংশু চাংকাকতি আৰু এসময়ৰ ডিব্ৰুগড়ৰ আকাশবাণী তথা দূৰদৰ্শনৰ এগৰাকী জনপ্ৰিয় অনুষ্ঠান পৰিবেশিকা আৰু আকাশবাণী দিল্লীৰ বাতৰি পৰিবেশিকা প্ৰাৰ্থনা বৰদলৈৰ একমাত্ৰ কন্যা৷
কিতাপ লিখাৰ উপৰিও ছবি আঁকি, কিতাপ পঢ়ি, গান গাই, কীব’ৰ্ড বজাই আৰু ফটোগ্ৰাফী কৰি ভালপোৱা অক্ষিতা পুণেৰ Bharti Vidyapith Ravindranath Tagore School of Excellence ৰ পঞ্চম শ্ৰেণীৰ ছাত্ৰী৷ অক্ষিতাৰ ইতিমধ্যে প্ৰকাশ পোৱা দুয়োখন কিতাপ amazon আৰু flipkart ত kindle আৰু paperback এই দুয়োটা ধৰণে উপলব্ধ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
