অসম লাইভ২৪ঃ আৰম্ভ কাউণ্টডাউন। শুকুৰবাৰে দুপৰীয়া চন্দ্ৰত অভিযান চলাবলৈ ৰাওনা হ’ব চন্দ্ৰযান-৩। শুকুৰবাৰে দুপৰীয়া ঠিক ২বাজি ৩৫মিনিটত শ্ৰীহৰিকোটাৰ সতীশ ধাৱান স্পেছ চেণ্টাৰৰ পৰা চন্দ্ৰযান-৩ উৎক্ষেপণ কৰা হ’ব। ইছৰোৰ এই চন্দ্ৰযান কঢ়িয়াই নিব এলভিএম-৩ ৰকেটে। যিয়ে চন্দ্ৰযানখনক পৃথিৱীৰ কক্ষপথৰ পৰা বাহিৰলৈ ঠেলি পঠিয়াব।
এলভিএম-৩ হৈছে এখন ত্ৰি স্তৰীয় উৎক্ষেপণ যান। ইয়াৰ পূৰ্বে একাধিক কৃত্ৰিম উপগ্ৰহ আৰু চন্দ্ৰযাত্ৰাত এই এলভিএম-৩ ব্যৱহাৰ হৈছে। ভাৰতীয় ৰকেটৰ বাহুবলী বুলিও এই যানক কোৱা হয়। এই যানৰ দুটা স্তৰত আছে কঠিন ইন্ধন আৰু এটা স্তৰত আছে তৰল ইন্ধন। কঠিন ইন্ধন ১২৭ ছেকেণ্ড ধৰি জ্বলে। উৎক্ষেপণৰ ১০৮ ছেকেণ্ডৰ পৰা জ্বলিবলৈ আৰম্ভ কৰে এই তৰল ইন্ধন। ২০৩ ছেকেণ্ড ধৰি এই ৰকেট চলিব।
উল্লেখ্য যে ২০১৯ চনৰ ৬ চেপ্টেম্বৰত লেণ্ডাৰ বিক্ৰম ৰকেটৰ সহায়ত ইছৰোই চন্দ্ৰযান-২ চন্দ্ৰলৈ প্ৰেৰণ কৰিছিল। অতীতৰ সেই ভুলৰ শিক্ষা লৈয়েই এইবাৰ নতুন কেইবাটাও সালসলনি কৰিছে চন্দ্ৰযান-৩ত।
২০১৯ চনত পঠোৱা সেই চন্দ্ৰযান-২য়ে এতিয়াও চন্দ্ৰক প্ৰদক্ষিণ কৰি আছে। এইবাৰৰ অভিযানত ইছৰোই কোনো অৰবিটাৰ নপঠাই। চন্দ্ৰৰ মাটিত নামিবলৈ কক্ষপথত এতিয়াও সক্ৰিয় হৈ থকা চন্দ্ৰযান-২ৰ অৰবিটাৰৰ সাহায্য ল’ব চন্দ্ৰযান-৩য়ে। চন্দ্ৰৰ মাটিত নামি দুসপ্তাহ ইছৰোৰ যানে গৱেষণা চলাব। এই অভিযানত ইউৰোপীয় মহাকাশ গৱেষণা সংস্থা আৰু নাছাৰ সহায় ল’ব চন্দ্ৰযান-৩য়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
