অসম লাইভ২৪ঃ ৰাজস্থানৰ বিধানসভা নিৰ্বাচনৰ মনোনয়নপত্ৰ জমা দিয়াৰ প্ৰক্ৰিয়া ইতিমধ্যে সমাপ্ত হৈছে। প্ৰাৰ্থীয়ে মনোনয়নপত্ৰ জমা দিয়াৰ পাছতেই উঠিছে কেইবাটাও চাঞ্চল্যকৰ তথ্য। বেচৰকাৰী সংস্থাৰ সমীক্ষাত জনা গৈছে যে বিধানসভাৰ ২০০ জন বিধায়কৰ ভিতৰত জনেই কোটিপতি। ৪৬ জনৰ বিৰুদ্ধে আছে ফৌজাদাৰী গোচৰ। এই সমীক্ষা চলাইছে ডেমোক্ৰেটিক ৰিফৰ্মছ বা চমুকৈ ADR আৰু ৰাজস্থান ইলেকছন ৱাছ বা চমুকৈ REWয়ে। তেওঁলোকৰ সমীক্ষাত পোহৰলৈ অহা ৰিপৰ্ট অনুসৰি বিগত বিধানসভা নিৰ্বাচনত জয়ী ২০০ বিধায়কৰ মাজত কোটিপতি বিধায়কৰ সংখ্যা আছিল ১৫৭জন। ইয়াৰ মাজতেই কংগ্ৰেছৰ বিধায়কৰ সংখ্যা ৮৮ জন। ৫৪ জন কোটিপতি হৈছে বিজেপি বিধায়ক। ইয়াৰোপৰি ৰাজস্থানৰ স্থানীয় দল জাতীয় লোকতান্ত্ৰীক পাৰ্টী চমুকৈ RLPৰো ২ বিধায়ক কোটিপতি। কোটিপতিৰ তালিকাত আছে নিৰ্দলীয় ১২ বিধায়কো। নিৰ্দলীয় বিধায়কৰ সম্পত্তিৰ পৰিমাণ আছিল ১কোটিৰো অধিক।
ৰিপৰ্ট অনুসৰি ১০৮ জন কংগ্ৰেছৰ বিধায়কৰ মুঠ গড় সম্পত্তিৰ পৰিমান হৈছে ৯.২৮ কোটি টকা। আনহাতে গড়ে ৫.৪৫ কোটি টকাৰ সম্পত্তি আছিল বিজেপিৰ নিৰ্বাচিত ৬৯ জন বিধায়কৰ। ইয়াৰোপৰি এজন RLD বিধায়কৰ ২.৫৫ কোটি ২জন ভাৰতীয় উপজাতি পাৰ্টী আৰু চিপিআইএম দলৰ বিধায়কৰ সম্পত্তিৰ পৰিমাণ আছিল ৭.৬৬ লাখ টকা। ১৪ জন নিৰ্দলীয় বিধায়কৰ গড় সম্পত্তিৰ পৰিমান ৭.৫৮ কোটি টকা আছিল বুলি ৰিপৰ্টত উল্লেখ কৰা হৈছে। সমীক্ষাত প্ৰকাশ পোৱা অনুসৰি সম্পত্তিত ধনীসকলৰ তালিকাত শীৰ্ষত আছে ৰাজস্থানৰ ধোদ বিধানসভা কেন্দ্ৰৰ কংগ্ৰেছ বিধায়কৰ পৰশৰাম মোৰ্দিয়া। তেওঁৰ মুঠ সম্পত্তিৰ পৰিমান হৈছে ১৭২.৭৬ কোটি টকা। এই তালিকাত সকলোতকৈ তলত আছে চোৰাছি সমষ্টিৰ বিধায়ক ৰাজকুমাৰ ৰোটে। তেওঁৰ মুঠ সম্পত্তিৰ পৰিমান ১.২২ কোটি টকা।
ৰিপৰ্টৰ তথ্য অনুসৰি ৰাজস্থানত বিগত বিধানসভা নিৰ্বাচনত নিৰ্বাচিত বিধায়কৰ মাজত ৪৬ জনৰ বিৰুদ্ধে আছে ফৌজাদাৰী গোচৰ। ইয়াৰ মাজতেই কংগ্ৰেছৰ বিধায়কৰ সংখ্যা ২৭। বিজেপিৰ ১১ আৰু চিপিআইএমৰ ২ জন বিধায়কৰ বিৰুদ্ধে আছে ফৌজাদাৰী গোচৰ। ইয়াৰোপৰি ২৮ জনৰ বিৰুদ্ধে আছে গুৰুতৰ কেইবাটাও গোচৰ। ইয়াৰ মাজতে এজন বিধায়কৰ বিৰুদ্ধে আছে হত্যাত জড়িত থকাৰ অভিযোগ। হত্যাৰ চেষ্টাৰ অভিযোগ আছে চাৰিজনৰ বিৰুদ্ধে।
দুই বেচৰকাৰী সংস্থাৰ যৌথ সমীক্ষাত কোৱা হৈছে যে ৫৯ জন বিধায়কৰ শিক্ষাগত যোগ্যতা গৈছে পঞ্চমৰ পৰা দ্বাদশ শ্ৰেণীলৈকে পঢ়া। ১২৮ বিধায়ক স্নাতক বা তাতোকৈ বেছি ডিগ্ৰীধাৰী। ৫ জন বিধায়ক ডিপ্লমাধাৰী আৰু ৭জন বিধায়কৰ শিক্ষাগত অৰ্হতা কোনোৱে নাজানে যদিও তেওঁলোকে নিজকে শিক্ষিত বুলি দাবী কৰে। উল্লেখ্য যে, ২০০ আসন বিশিষ্ট ৰাজস্থানৰ বিধানসভা নিৰ্বাচন আগন্তুক ২৫ নৱেম্বৰত অনুষ্ঠিত হ’ব। আৰু নিৰ্বাচনী ফলাফল ঘোষণা কৰা হ’ব ৩ ডিচেম্বৰত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
