অসম লাইভ২৪ঃ এইবাৰৰ আইচিচি ক্ৰিকেট বিশ্বকাপৰ ফাইনেলত ভাৰতীয় ক্ৰিকেট দলৰ পৰাজয়ক যেন কোনোৱে সহজভাৱে ল’ব পৰা নাই। ফাইনেলত অষ্ট্ৰেলিয়া দলে ভাৰতক ৬ উইকেটত পৰাস্ত কৰিছে। এই পৰাজয়ৰ পাছতেই টীম ইণ্ডিয়াত কেইবাটাও সালসলনি হ’ব বুলি ধাৰণা কৰিছে প্ৰায়সংখ্যক ক্ৰিকেট অনুৰাগীয়েই। বহুতেই ধাৰণা কৰিছে ভাৰতীয় ক্ৰিকেট দলৰ অধিনায়কৰ পৰা কোচলৈকে সকলোবোৰেই সাল-সলনি হ’ব বুলি জনাইছে প্ৰায়সংখ্যকেই।
বিগত ২বছৰ ধৰি ভাৰতীয় ক্ৰিকেট দলৰ কোচৰ দায়িত্বত আছে ৰাহুল দ্ৰাবিড়। বিশ্বকাপৰ পৰাজয়ৰ পাছতেই বহুতেই চৰ্চা চলাইছে, ৰাহুল দ্ৰাবিড়ে এইবাৰ হেড কোচ পদৰ পৰা অব্যাহতি ল’ব। যদি ৰাহুল দ্ৰাবিড়ে এই পদ এৰে তেন্তে টীম ইণ্ডিয়াৰ পৰবৰ্তী কোচ কোন হ’ব? ভাৰতীয় দলৰ হেড কোচ হিচাপে কাৰ্যকালো প্ৰায় শেষ হৈছে ৰাহুল দ্ৰাবিড়ৰ। বিচিচিআইৰ সৈতে এদিনীয়া ক্ৰিকেটলৈকেহে তেওঁৰ চুক্তি আছিল। এই পৰিস্থিতিত তেওঁ টীম ইণ্ডিয়াৰ কোচ পদৰ পৰা অব্যাহতি লোৱাৰ আশংকাই বেছি।
ভাৰতীয় ক্ৰিকেট দলৰ কোচক লৈ চলা আলোচনাত প্ৰায়সংখ্যকেই দাবী কৰিছে যে পৰবৰ্তী কোচ হিচাপে ভিভিএছ লক্ষ্মণে দায়িত্ব ল’ব পাৰে। লক্ষ্মণৰ অভিজ্ঞতা অন্যান্যসকলতকৈ যথেষ্ট বেচি। তেওঁ দলক ভালধৰণে গাইডো কৰিব পাৰিব। বহু প্ৰাক্তন ক্ৰিকেটাৰেই টিম ইণ্ডিয়াৰ পৰবৰ্তী কোচ হিচাপে লক্ষ্মণৰ নাম প্ৰস্তাৱ কৰিছে। ৰাহুল দ্ৰাবিড়ৰ স্থানত কোচ হিচাপে দায়িত্ব লোৱাৰ ক্ষেত্ৰত আন এজন ক্ৰিকেটাৰৰ নামো চৰ্চালৈ আহিছে। তেওঁ হৈছে বীৰেন্দৰ ছেহৱাগ।
এতিয়াও টীম ইণ্ডিয়াৰ মিছন শেষ হোৱা নাই
এটা সময়ত আন্তৰ্জাতিক ক্ৰিকেটত বেট হাতত লৈ প্ৰতিপক্ষক আতংকিত কৰি ৰাখিছিল বীৰেন্দৰ ছেহৱাগে। তেওঁ বেট তুলি ল’লেই কঁপি উঠিছিল প্ৰতিপক্ষৰ বলাৰ। সেয়ে বহুতেই পৰবৰ্তী কোচ হিচাপে বীৰেন্দৰ ছেহৱাগৰ নামেই লৈছে। এদিনীয়া বিশ্বকাপত ভাৰতে পৰাজয় বৰণ কৰিলেও ভাৰতীয় ক্ৰিকেট দলৰ মিছন এতিয়াও শেষ হোৱা নাই। আগন্তুক বৰ্ষতেই অনুষ্ঠিত হ’ব টি-২০ বিশ্বকাপ। ইয়াৰোপৰি ২০২৫ চনত আকৌ চেম্পিয়ন ট্ৰফীও আছে। এই পৰিস্থিতিত ভাৰতীয় ক্ৰিকেট কন্ট্ৰল বৰ্ডে অচিৰেই কোচ সলনি কৰাৰ পূৰ্ণ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
