অসম লাইভ২৪ঃ ৰামমন্দিৰ উদ্বোধনলৈ মাজত মাত্ৰ ২৫ দিন বাকী। ইয়াৰ পূৰ্বে বৃহস্পতিবাৰে নতুন নিয়ম জাৰি কৰিছে উত্তৰপ্ৰদেশ চৰকাৰে। মন্দিৰ সংলগ্ন বিস্তীৰ্ণ অংশ চিহ্নিত কৰি উলিয়াইছে যোগী চৰকাৰে। সেই চিহ্নিত কৰা এলেকাৰ ভিতৰত সুৰাপান একেবাৰেই নিষেধ কৰা হৈছে। অযোধ্যাৰ ৰামমন্দিৰ সংলগ্ন ৮৪ কোশী পৰিক্ৰমা অঞ্চলক ‘সুৰাবিহীন এলেকা’ হিচাপে ঘোষণা কৰিছে যোগী চৰকাৰে।
এই এলেকাৰ ভিতৰত মদ খোৱা, বিক্ৰি কৰা বা প্ৰস্তুত কৰা কোনো কামেই হ’ব নোৱাৰিব। আনকি এই এলেকাৰ ভিতৰত যিসমূহ সুৰাৰ বিপনী পূৰ্বৰে পৰা আছিল সেইসমূহো উঠাই দিয়া হৈছে। সেই সুৰা বিপনীসমূহ অন্য স্থানত পতাৰ ব্যৱস্থা কৰি দিছে যোগী চৰকাৰে। আগন্তুক ২২ জানুৱাৰীত অযোধ্যত বহু প্ৰত্যাশিত ৰাম মন্দিৰৰ উদ্বোধন কৰা হ’ব। এই অনুষ্ঠানত উপস্থিত থাকিব প্ৰধানমন্ত্ৰী নৰেন্দ্ৰ মোদীৰ লগতে বহু ৰাজনৈতিক নেতা। আহিব ক্ৰীড়া ক্ষেত্ৰৰ লগতে বিনোদন ক্ষেত্ৰৰো বহু নামজ্বলা ব্যক্তি। সেয়ে এই এলেকাটোক সম্পূৰ্ণকৈ সজাই তোলাত ব্যস্ত এতিয়া যোগী চৰকাৰ।
বৃহস্পতিবাৰে উত্তৰপ্ৰদেশৰ আৱকাৰী মন্ত্ৰী নিতিন আগৰৱালাই ৰাম জন্মভূমি তীৰ্থক্ষেত্ৰ ট্ৰাষ্টৰ সাধাৰণ সম্পাদক চম্পৎ ৰায়ৰ সৈতে দেখা কৰে। তেওঁলোকৰ বৈঠকৰ পাছতেই মন্দিৰ সংযুক্ত এলেকাক সুৰাবিহীন এলেকা বুলি ঘোষণা কৰা হৈছে। মন্ত্ৰীগৰাকীয়ে এই সন্দৰ্ভত কয়, ৰাম জন্মুভূমি ট্ৰাষ্টৰ সৈতে আলোচনা কৰাৰ পাছতহে এই সিদ্ধান্ত লৈছে যোগী চৰকাৰে। নিয়ম বাস্তৱায়নৰ বাবে প্ৰয়োজনীয় ব্যৱস্থা গ্ৰহণ কৰা হ’ব।
উল্লেখ্য যে কাইলৈ ৩০ ডিচেম্বৰত অযোধ্যালৈ যোৱাৰ কথা আছে প্ৰধানমন্ত্ৰী মোদীৰ। উদ্বোধনী অনুষ্ঠানৰ প্ৰস্তুতি চাবলৈকে সৰযু নদীৰ পাৰৰ এই বিশেষ স্থানলৈ যাব প্ৰধানমন্ত্ৰী মোদী। মোদীৰ উপস্থিত হোৱাৰ পূৰ্বেই সুৰা বিক্ৰি আৰু সুৰাপানক লৈ বিশেষ সিদ্ধান্ত লৈছে যোগী আদিত্যনাথ চৰকাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
