আটক কৰিলে , জেলত ৰাখিলে, পাছে প্ৰমাণ দাঙি ধৰিব নোৱাৰি অৱশেষত এৰি দিলে আপ নেতাক
প্ৰৱৰ্তন নিৰ্দেশালয় (ED)য়ে প্ৰমাণ দাঙি ধৰিব নোৱাৰি অৱশেষত এৰি দিলে আপৰ নেতা সঞ্জয় সিঙক। বিগত ৬ মাহ ধৰি তিহাৰ জেলত কাৰবন্দী হৈ আছিল আপৰ জ্যেষ্ঠ নেতা তথা সাংসদ সঞ্জয় সিং।
আজি ন্যায়ালয়ে জামিন মঞ্জুৰ কৰিলে আপৰ নেতাগৰাকীৰ। বিগত বৰ্ষৰ ৬ অক্টোবৰ তাৰিখে ইডিয়ে ২০২১ৰ সুৰা কেলেংকাৰীৰ গোচৰত আটক কৰিছিল নেতাগৰাকীক। যিদৰে এতিয়া আপৰ প্ৰতিষ্ঠাপক নেতা তথা দিল্লীৰ মুখ্যমন্ত্ৰী অৰবিন্দ কেজৰিৱালক আটক কৰিছে।
সঞ্জয় সিঙৰ পূৰ্বে আপৰ আন এগৰাকী নেতা মনীশ শিশোদিয়াকো একেটা সুৰা কেলেংকাৰীৰ গোচৰতে আটক কৰিছিল ইডিয়ে। বিগত ১৩ মাহ ধৰি তিহাৰ জেলতে আছে দিল্লীৰ উপমুখ্যমন্ত্ৰী শিশোদিয়া। তেখেতৰ বিৰুদ্ধেও কোনো প্ৰমাণ হোৱা নাই অদ্যপি, তথাপি জামিনো লাভ কৰা নাই।
আনহাতে আজি সঞ্জয় সিঙৰ ক্ষেত্ৰত তিনি পীঠৰ ন্যায়াধীশে এই জামিন মঞ্জুৰ কৰে। ন্যায়াধীশ সঞ্জীৱ খান্না, ন্যায়াধীশ দীপাংকৰ দত্ত, ন্যায়াধীশ পিবি বৰালেৰ পীঠে আজি মঙলবাৰে এই ৰায় দিয়ে।
শুনানীৰ সময়ত ন্যায়ধীশে ইডিক সঞ্জয় সিঙৰ জামিন সন্দৰ্ভত প্ৰশ্ন কৰোতে উত্তৰ দিয়ে যে, তেখেতৰ জামিনত তেঁওলোকৰ কোনো আপত্তি নাই। কিন্তু তেখেতৰ ৰাজনীতিৰ ক্ষেত্ৰত হকাবধা বিচাৰে।
পাছে ন্যায়ালয়ে কয় যে, এই ক্ষেত্ৰত ন্যায়ালয়ে হকাবধা কৰিব নোৱাৰে, কিয়নো তেওঁৰ বিৰুদ্ধে কোনো প্ৰমাণ সাব্যস্ত হোৱা নাই। সেয়ে নিৰ্বাচনে হওঁক বা অন্য ৰাজনৈতিক কামকাজ, সকলোতে তেওঁ বিনা দ্বিধাই অংশ ল’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
