অসম লাইভ২৪ঃ সময়, তিনি বছৰ আগৰ কথা৷ কৰ’না কাল৷ সেই দুঃসময়ৰ কথা কেনেকৈ পাহৰিব বিশ্ববাসীয়ে৷ বিশ্বৰ চৌদিশে আছিল কেৱল মৃত্যু মিছিল৷ আপোনজনক হেৰুওৱাৰ দুখ অনুভৱ কৰিবলৈ সময় নাছিল কাৰোৰে হাতত আছিল কেৱল নিজক কেনেকৈ সুৰক্ষিত কৰি ৰাখিব সেই চিন্তাহে৷
এক ভয়লগা সময়, এক দুৰ্বিসহ সময়৷ সকলোৱে তেতিয়া কেৱল প্ৰতিকাৰৰ উপায় বিচাৰি হাহাকাৰ কৰিছিল৷ তেনে সময়তে এটা ভেকচিনেই বিশ্ববাসীক দিছিল আশ্বাস৷ অক্সফৰ্ডৰ গৱেষকৰ সহায়ত কভিড ভেকছিন তৈয়াৰ কৰি উলিয়াইছিল ঔষধ প্ৰস্তুতকাৰক সংস্থা এষ্ট্ৰাজেনেকাই৷ সেই ভেকছিনৰ নাম আছিল কভিছিল্ড৷ বিশ্বই সেই ঔষধৰ প্ৰচাৰ হোৱাৰ লগে লগেই স্বাস্তিৰ নিশ্বাস এৰিছিল৷ কৰ’নাৰ পৰা বাচিবলৈকে সমগ্ৰ বিশ্বৰ প্ৰান্তে প্ৰান্তে পঠিওৱা হৈছিল কভিছিল্ড ভেকছিন৷
ভাৰতৰ ছিৰাম ইনষ্টিটিউটত ব্যাপকভাৱে উৎপাদিত হৈছিল এই ঔষধ৷ আমাৰ দেশলৈকো আহিছিল এই ঔষধ৷ প্ৰচাৰ হৈছিল, কভিড দূৰ কৰিবলৈ ভেকছিন লওক৷ দেশৰ প্ৰায়সংখ্যক লোকেই সেই ভেকছিন গ্ৰহণ কৰিলে৷ লাহে লাহে কৰ’নাৰ ভয়াৱহতা বিশ্বৰ পৰা দেশৰ পৰা আঁতৰিল৷ আকৌ স্বাভাৱিক জীৱন আৰম্ভ হওতেই হঠাৎ অহা এটা খবৰে বিশ্বত আলোড়নৰ সৃষ্টি কৰিছে৷ ‘কভিছিল্ডৰ ছাইড এফেক্ট৷’ নিজেই স্বীকাৰ কৰিছে টিকা প্ৰস্তুতকাৰক সংস্থা এষ্ট্ৰজেনেকাই৷
বিতৰ্ক অৱশ্যে এতিয়া আৰম্ভ হৈছে তেনে নহয়৷ আমাৰ দেশত কৰ’না ভেকছিন দি থকাৰ সময়ৰে পৰাই চলি আছিল যদিও বিশ্বৰ অন্য প্ৰান্তত কিন্তু এই বিতৰ্ক নাছিল৷ ২০২১ চনত কভিছিল্ডৰ ভেকছিন লোৱাৰ পাছৰে পৰাই অসুস্থ হৈ পৰে জেমি স্কট নামৰ এজন ব্যক্তি৷ মস্তিষ্কত ৰক্ত জমা হৈ গোট মাৰে৷ তাৰপাছতেই আৰু কিছু লোকৰ মাজত একেই লক্ষণে দেখা দিবলৈ লয়৷
কেৱল এটা ছাইড এফেক্টেই নে অইন কিবা ছাইড এফেক্টো আছে সেই বিষয়লৈ বিশ্বজুৰি আৰম্ভ হয় চৰ্চা৷ এইবাৰ ছাইড এফেক্টক লৈ গৱেষণা আৰম্ভ কৰে বিজ্ঞানীয়ে৷ অৱশেষত আদালতত এষ্ট্ৰোজেনেকাই দাঙি ধৰিছে ছাইড এফেক্ট সম্পৰ্কীয় তথ্য৷ কভিছিল্ড ভেকছিন লোৱাৰ ফলত থ্ৰম্বোচিছ উইথ থ্ৰম্বোছাইটোপেনিয়া ছিনড্ৰমৰ সম্ভাৱনা আছে৷
থ্ৰম্বোচিছ উইথ থ্ৰম্বোছাইটোপেনিয়া ছিনড্ৰম বা টিটিএছ এক বিৰল ৰোগ৷ সমগ্ৰ বিশ্বজুৰি এই ৰোগত আক্ৰান্ত মানুহৰ সংখ্য অৱশ্যে বেছিও নহয়৷ আদালতত কভিছিল্ড প্ৰস্তুতকাৰী সংস্থা এষ্ট্ৰজেনেকাই জনাইছে যে কভিছিল্ড ভেকছিনে সমগ্ৰ বিশ্বৰ প্ৰায় ৬০লাখ মানুহৰ প্ৰাণ ৰক্ষা কৰিছে৷ তেওঁলোকৰ দাবী যে এই ভেকছিন ল’লেই যে টিটিএছ ৰোগ হ’ব তেনে কোনো কথা নাই৷
কভিড টিকা লৈ ছাইড এফেক্ট হোৱা মানুহৰ সংখ্যাও খুব কম৷ বৰ্তমানৰ প্ৰশ্ন থ্ৰম্বোচিছ উইথ থ্ৰম্বোছাইটপেনিয়া ছিনড্ৰমত আক্ৰান্ত হ’লে কি হ’ব পাৰে৷
- শৰীৰত তেজ গোট মাৰিব পাৰে৷
- শৰীৰত প্লেটলেটৰ মাত্ৰা কমাটোও এই ৰোগৰ লক্ষণ
- ব্ৰেইন ষ্ট্ৰোক বা মস্তিষ্কৰ ৰক্তক্ষৰণ
ৰিপৰ্ট প্ৰকাশ হোৱাৰ পাছতেই প্ৰশ্ন উত্থাপিত হৈছে যে ভেকছিন লোৱা সকলো লোকেই এইসমূহ ৰোগত আক্ৰান্ত হৈ পৰিছে নেকি? বা ভৱিষ্যতে এই ৰোগে দেখা দিব নেকি? ভাৰতৰ প্ৰায় ৮০ শতাংশ মানুহে কভিছিল্ড ভেকছিন লৈছে৷ এই দেশৰ জনসংখ্যাৰ নিৰিখত এই সংখ্যা বহু বেছি৷ অৱশ্যে আমাৰ দেশত বৰ্তমানলৈকে কভিছিল্ড লোৱাৰ ছাইড এফেক্ট বুলি কোনো কেচ চিকিৎসকে প্ৰকাশ কৰা নাই৷
কৰ’নাৰ বিৰুদ্ধে এক দীৰ্ঘ যুঁজ চলাই আমি জয়ী হৈছো৷ কৰ’না বিধিৰ ওপৰিও ভেকছিন এই যুঁজৰ অন্যতম হাঁথিয়াৰ আছিল৷ কিন্তু ভেকছিন গ্ৰহণৰ ইমান দিনৰ পাছত হঠাৎ অহা খবৰে সকলোৰে মনত সৃষ্টি কৰিছে অজান ভয়ৰো৷ চিকিৎসকে কৈছে ভয়ৰ কাৰণ নাই৷ সকলো লোকেই এই ৰোগত আক্ৰান্ত হ’ব বুলিও কথা নাই৷ কভিছিল্ড লোৱাৰ ফলতেই টিটিএছ ৰোগ হৈছেই বুলি স্পষ্টভাৱে কোনেও ক’ব নোৱাৰে৷ সেয়ে অত্যাধিক ভয়ৰ মাজেৰে সময় কটোৱাতকৈ সকলোৱে উন্নত জীৱনশৈলীৰে সময় অতিবাহিত কৰক বুলিও জনাইছে একাংশ চিকিৎসকে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
