অশ্লীল মন্তব্যৰ গোচৰত সমস্যা বৃদ্ধি সময় ৰাইনাৰ, দ্বিতীয়খন চমন প্ৰেৰণ
ইণ্ডিয়াছ গট লেটেণ্ট গোচৰত কমেডিয়ান সময় ৰাইনালৈ দ্বিতীয়বাৰৰ বাবে চমন প্ৰেৰণ কৰিছে মহাৰাষ্ট্ৰ চাইবাৰ চেলে। ষ্টেণ্ড আপ কমেডিয়ানগৰাকীক ১৭ ফেব্ৰুৱাৰীত তদন্তকাৰী বিষয়াৰ সন্মুখত হাজিৰ হ’বলৈ নিৰ্দেশ দিয়া হৈছে। ৰাইনাৰ অধিবক্তাই চাইবাৰ চেলটোক ৰাইনা আমেৰিকাত আছে আৰু ১৭ মাৰ্চত ঘূৰি আহিব বুলি জনোৱাৰ পিছতে এই নিৰ্দেশ তদন্তকাৰী বিষয়াৰ।
অৱশ্যে মুম্বাই আৰক্ষীয়ে ৰাইনাৰ দলটোক স্পষ্টকৈ জনাইছিল যে আৰক্ষীৰ তদন্তই ইমান দিন অপেক্ষা কৰিব নোৱাৰে। গতিকে জেৰা আৰম্ভ হোৱাৰ ১৪ দিনৰ ভিতৰত কমেডিয়ানগৰাকীয়ে আৰক্ষীৰ সন্মুখত হাজিৰ হ’ব লাগিব।
এই গোচৰত এতিয়ালৈকে খাৰ আৰক্ষীয়ে ৭জন লোকৰ বক্তব্য লিপিবদ্ধ কৰিছে। ইয়াৰ ভিতৰত আছে শ্ব’টোত পেনেলিষ্ট হিচাপে উপস্থিত থকা ৰণবীৰ আল্লাহবাদিয়া, আশীষ চাঞ্চলানী আৰু অপূৰ্ব মাখিজাৰ লগতে শ্ব’টো অনুষ্ঠিত হোৱা ষ্টুডিঅ’টোৰ মালিক বলৰাজ ঘাইৰ লগতে শ্ব’টোৰ সৈতে জড়িত তিনিজন কাৰিকৰী ব্যক্তি।
উল্লেখযোগ্য যে মুম্বাই আৰক্ষীয়ে এই বিষয়ত এফআইআৰ ৰুজু কৰাৰ কোনো সিদ্ধান্ত এতিয়াও লোৱা নাই। আৰক্ষীয়ে জনোৱা মতে, তেওঁলোকে শ্ব’টোৰ সৈতে জড়িত লোকৰ বক্তব্য ৰেকৰ্ড কৰিব আৰু তাৰ পিছত গোচৰ পঞ্জীয়নৰ সিদ্ধান্ত ল’ব।
উল্লেখ্য যে, শেহতীয়াকৈ সময় ৰাইনাৰ শ্ব’ ‘ইণ্ডিয়াজ গট লেটেণ্ট’ৰ এটা খণ্ডৰ সময়ত ৰণবীৰ আল্লাহবাদিয়াই এজন প্ৰতিযোগীক এটা অনুপযুক্ত প্ৰশ্ন কৰি ছ’চিয়েল মিডিয়াত বিতৰ্কৰ সৃষ্টি কৰিছিল। ইউটিউবাৰজনক তেওঁৰ অনুপযুক্ত প্ৰশ্নৰ বাবে টুইটাৰত ট্ৰ’ল কৰা হৈছিল আৰু শ্ব’টো এয়াৰৰ পৰা আঁতৰাই নিবলৈ দাবী উত্থাপন হ’বলৈ আৰম্ভ কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
