শৈশৱৰ পৰা যুদ্ধ, মৃত্যু, ৰক্তপাত, আত্মীয়ক হেৰুওৱা, কান্দোন আদিত তেওঁলোক অভ্যস্ত৷ ভয়ংকৰ এক পৰিবেশৰ মাজতেই পাৰ হৈছে তেওঁলোকৰ পখিলা খেদা বয়সৰ পৰা আৰম্ভ কৰি যৌৱন৷ যৌৱনত শিক্ষা জীৱন সামৰি আৰম্ভ হৈছিল আন এক যাত্ৰা৷ সাংবাদিকতাক পেছা হিচাপে লৈ গাজাত চলি থকা ধ্বংসলীলাৰ সেই দৃশ্যসমূহ বিশ্ব দৰবাৰলৈ লৈ যোৱাৰ কামত ব্ৰতী হৈ পৰিছিল তেওঁ৷ ২৫ বছৰীয়া সেই তৰুণীৰ নাম ফাতিমা হাছৌনা৷ তেওঁ গাজাৰ চিত্ৰ সাংবাদিক৷ সেই যুৱসাংবাদিকগৰাকীয়েই ইজৰাইলী আক্ৰমণত হেৰুৱালে প্ৰাণ৷ বিমানযোগে চলোৱা এক আক্ৰমণত মৃত্যু হৈছে তেওঁৰ৷
যুদ্ধবিধ্বস্ত গাজাৰ এখনৰ পাছত এখন ছবি তুলি বিশ্বৰ দৰবাৰত নিজকে প্ৰতিষ্ঠা কৰিছিল ফাতিমাই৷ প্ৰতি মুহূৰ্ততে মৃত্যুক সংগী কৰি চলা ফাতিমাইয়ো জানিছিল আজি নতুবা কাইলৈ মৃত্যু অৱধাৰিত৷ কিন্তু মৃত্যু আহিব বুলিয়েই তেওঁ কৰ্ম ত্যাগ কৰা নাছিল৷ নিজৰ লক্ষ্যত অবিচল থাকি গাজাৰ এটা প্ৰান্তৰ পৰা আনটো প্ৰান্তলৈ ঢপলিয়াই ফুৰিছিল৷ কেতিয়াবা ইজৰাইলী সেনাৰ ৰক্তচক্ষুক চেলেঞ্জ কৰি তুলি ধৰিছিল যদি কেতিয়াবা তুলি ধৰিছিল গাজাৰ বাসিন্দাৰ ওপৰত চলোৱা নিৰ্মোহ আক্ৰমণৰ ছবি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
