টেষ্ট ক্ৰিকেটৰ পৰা অৱসৰ গ্ৰহণ কৰিলে ৰোহিত শৰ্মাই৷ আইপিএলৰ মাজতেই এই সিদ্ধান্ত জনাই দিলে ভাৰতীয় ক্ৰিকেট দলৰ অধিনায়কে৷ এতিয়াৰে পৰা ভাৰতৰ হৈ কেৱল এদিনীয়া ক্ৰিকেটহে খেলিব ৰোহিত শৰ্মাই৷
কোনোধৰণৰ সংবাদমেলো আয়োজন কৰা নাই ৰোহিতে৷ ইনষ্টাগ্ৰামত চাৰি লাইনৰ এটা পোষ্ট দি এই বিবৃতি দিছে ৰোহিতে৷ তাতেই ৰোহিতে লিখিছে, ‘সকলোকে জনাব খুজিছো যে আমি টেষ্ট ক্ৰিকেটৰ পৰা অৱসৰ লৈছো৷ বগা পোছাকত দেশৰ হৈ খেলাটো মোৰ বাবে গৰ্বৰ বিষয় আছিল৷ ইমান বছৰ ধৰি ইমান ভালপোৱা আৰু সমৰ্থন দিয়াৰ বাবে সকলোকে ধন্যবাদ৷ এদিনীয়া ফৰ্মেটত ভাৰতৰ হৈ খেল চলি যাব৷’
বিগত বছৰৰ পৰা টেষ্টত ৰোহিতৰ বেটত ৰান বিশেষ নাই৷ দেশৰ মাটিত নিউজিলেণ্ডৰ বিৰুদ্ধে পৰাস্ত হৈছিল ভাৰত৷ সেই ছিৰিজতেই একেবাৰে ৰান কৰিব পৰা নাছিল ৰোহিতে৷ তাৰপাছতেই অষ্ট্ৰেলিয়াৰ বিৰুদ্ধে পাঁচ টেষ্টৰ চিৰিজতো ৰান অহা নাই ভাৰতীয় অধিনায়কৰ বেটৰ পৰা৷ আনকি এনে পৰিস্থিতি হৈছিল যে ছিডনিৰ শেষ টেষ্টত প্ৰথম একাদশৰ বাহিৰত ৰখা হৈছিল ৰোহিতক৷
সেই সময়ৰ পৰাই ৰোহিতৰ অৱসৰৰ জল্পনা আৰম্ভ হৈছিল৷ তেতিয়া চিডনী টেষ্ট চলাৰ সময়ত সম্প্ৰচাৰকাৰী চেনেলত ৰোহিতে স্পষ্ট কৰি দিছিল যে তেওঁৰ অৱসৰৰ কোনো সম্ভাৱনা নাই৷ খেলা চলাই যাব৷ কিন্তু বাস্তৱত দেখা গৈছে যে ৰোহিতে আৰু দেশৰ হৈ বগা জাৰ্ছিৰে ২২ গজত ননমাৰেই সিদ্ধান্ত লৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
