আমি প্ৰত্যেকটো দিনেই মৃত্যুৰ দিশেৰেই এখোজকৈ আগুৱাই দিও৷ সেই কথা জুবিনেও জানিছিল, বুজিছিল৷ তেওঁ হাঁহি হাঁহি খুহুটিয়া কথাৰে তাৰ ইংগিতো বহুবাৰ দিছিল৷ জুবিনে প্ৰকৃতি ভালপাইছিল৷ জুবিনে ভালপাইছিল গছ৷ সকলোকে যেতিয়াই পাৰে তেতিয়াই আহ্বান জনাইছিল, গছ ৰোৱক৷ জুবিনে কৈছিল দুখ লাগিলে মই গছক সাবটি ধৰো৷ গছে কথা কয়, গছে প্ৰেম দিয়ে৷
জুবিনে ২০১৭ চনত কলাক্ষেত্ৰতো ৰুইছিল এজোপা চন্দন গছ৷ আজি জুবিনক তেওঁ নিজে ৰোৱা গছৰ এডাল ডাল কাটি চিতাত দিয়া হৈছে৷ জুবিনে ভালপাইছিল নাহৰ গছ৷ কোনোবা অনুৰাগীয়ে সেয়ে হয়তো জুবিনলৈ গামোছাত বান্ধি আনিছে নাহৰৰ পাত৷ জুবিনে এই মৃত্যুমুখী যাত্ৰাৰ অনুশীলন যেন খুবেই পৰিকল্পিতভাৱেই কৰি গৈছে৷ তেওঁ জীৱিত কালত কৈ যোৱা মৃত্যুৰ পিছত কি কি হ’ব সকলোখিনি কথাই আজি ফলিয়াইছে৷
জুবিনে কৈছিল- মোৰ বহু সন্তান আছে, চম্ভালিবলৈ বৰ দিগদাৰ৷ ঠিকেই আজি জুবিনৰ সন্তানসকলে হিয়া ঢাকুৰিয়াই কান্দিছে৷ চম্ভালিব কোনে? প্ৰতিটো মুহূৰ্তই যেন একো একোটা সংযোগ! পুৱা হ’লেই যিটো ঠাইত গৈ পুৰী-চব্জি খাই ভাল পাইছিল আজি অন্তিমবাৰৰ বাবে পুনৰ সেই ঠাইডোখৰেই যেন তেওঁক টানি লৈ গ’ল। সময়ো ঠিক একেই। ষ্টুডিঅ’ অথবা অনুষ্ঠান সমাপ্ত কৰাৰ পাছত পুৱতি নিশা প্ৰায়েই GMCHৰ এই স্থানতেই প্ৰায়েই পুৰী-চব্জি খাইছিল জুবিনে। কিন্তু আজি আনদিনাৰ দৰে হাঁহি-মাতি অথবা লগ বন্ধুৰ লগত নহয় নিথৰ, চিৰনিদ্ৰাত কফিনৰ ভিতৰত এম্বুলেন্সত আৱদ্ধ হৈ ৩.৩০ বজাত শেষবাৰৰ বাবে আহিল জুবিন। পঞ্চভূতত বিলীন হোৱাৰ পূৰ্বে জুবিনৰ এই ঠাইত যেন শেষৰটো ইচ্ছা পূৰণ হ’ল! যোৱাকালিলৈকে কোনেও ভবা নাছিল জুবিনৰ প’ষ্টমৰ্টেমৰ কথা। জুবিনে যেন আজিও সজীৱ হৈ অকায়িকভাৱে নিজৰ ইচ্ছা পূৰণ কৰোৱাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
