পশ্চিম এছিয়াৰ সামৰিক সংঘাতৰ প্ৰায় এমাহেই হ’ব৷ এই পৰিস্থিতিত ইন্ধন, গেছৰ সৰবৰাহক লৈ দেশ কিমান প্ৰস্তুত সেয়া চালিজাৰি চাবৰ বাবেই শুকুৰবাৰে সমস্ত ৰাজ্যৰ মুখ্যমন্ত্ৰীক লৈ জৰুৰী বৈঠকৰ আয়োজন কৰিছে প্ৰধানমন্ত্ৰী নৰেন্দ্ৰ মোদীয়ে৷ শুকুৰবাৰে সন্ধিয়া ৬বাজি৩০ মিনিটত ভিডিঅ’ কনফাৰেন্সৰ মাধ্যমেৰে এই বৈঠক হ’ব বুলি জনা গৈছে৷ বৃহস্পতিবাৰে প্ৰধানমন্ত্ৰী মোদীৰ দপ্তৰৰ পৰা জনোৱা হৈছে এই কথা৷
সূত্ৰৰ খবৰ অনুসৰি দেশত ইন্ধন, তেল, গেছৰ সৰবৰাহৰ পৰিস্থিতি কি, ৰাজ্যসমূহে কি কি ব্যৱস্থা লৈছে, নাগৰিকসকলৰ নিৰাপত্তাৰ বিষয়েও আলোচনা হব পাৰে৷ এই সংকটময় পৰিস্থিতিত কেন্দ্ৰৰ সৈতে সমন্বয় ৰাখি সমস্ত ৰাজ্যৰ একলগে কাম কৰাৰ বাৰ্তাও দিব পাৰে বুলি ধাৰণা কৰিছে বহুজনে৷ সূত্ৰৰ খবৰ অনুসৰি এই সংকটময় সময়ত দেশৰ আভ্যন্তৰীণ স্থিতিশীলতা কেনেকৈ বজায় ৰাখিব পাৰি, ৰাজ্যসমূহে কোনো বিকল্প ব্যৱস্থাৰ প্ৰস্তুতি লৈছে নে নাই? বৈঠকত সেই বিষয়সমূহক লৈয়ো আলোচনা হব পাৰে৷
অৱশ্যে এই মিটিঙত অসমসহ পাঁচ ৰাজ্যৰ মুখ্যমন্ত্ৰীৰ পৰিবৰ্তে মুখ্যসচিবে বৈঠকত যোগ দিব বুলি সূত্ৰই প্ৰকাশ কৰিছে৷ সূত্ৰৰ খবৰ অনুসৰি কভিডৰ সময়ত যেনেকৈ সকলো ৰাজ্যই একেলগে কান্ধত কান্ধ মিলাই কেন্দ্ৰৰ সৈতে সমন্বয় ৰাখি কাম কৰিছিল এই সংকটময় পৰিস্থিতিত টিম ইণ্ডিয়া হিচাপে সকলো ৰাজ্যক কাম কৰাৰ বাৰ্তা দিব পাৰে প্ৰধানমন্ত্ৰীয়ে৷ ইয়াৰোপৰি দেশৰ স্থিতাবস্থা বজায় ৰাখিবলৈ আৰু আপৎকালীন পৰিকল্পনাক লৈয়ো আলোচনা হ’ব পাৰে৷
উল্লেখ কৰা প্ৰয়োজন যে চলিত সপ্তাহৰ আৰম্ভণিতে সংসদৰ উভয় কক্ষত পশ্চিম এছিয়াৰ সামগ্ৰিক পৰিস্থিতিক লৈ বিবৃত্তি দিছিল প্ৰধানমন্ত্ৰী মোদীয়ে৷ তেওঁৰ দাবী আছিল এতিয়া ইন্ধনৰ সংকট হোৱা নাই৷ তথাপিও কেন্দ্ৰ চৰকাৰে সতৰ্কতা অৱলম্বন কৰিছে৷ যাতে দেশত গেছ, ইন্ধন, তেলৰ অভাৱ জনতাৰ মাজত নহয়৷ তাৰ বাবে ইথানল উৎপাদনত জোৰ দিছে কেন্দ্ৰই৷ বিগত মঙ্গলবাৰে ৰাজ্যসভাৰ প্ৰধানমন্ত্ৰীয়ে জনাইছে, পশ্চিম এছিয়াৰ যুদ্ধৰ নেতিবাচক প্ৰভাৱৰ মোকাবিলাৰ কৌশল নিৰ্ধাৰণ কৰিবলৈ সাতটা ক্ষমতাপ্ৰাপ্ত সংগঠনো গঠন কৰিছে কেন্দ্ৰই৷ সংকটৰ এই পৰিস্থিতিত কেন্দ্ৰীয় চৰকাৰে সকলো উৎসৰ পৰা গেছ আৰু অপৰিশোধিত তেল সংগ্ৰহৰ চেষ্টা কৰিছে বুলি জনাইছে প্ৰধানমন্ত্ৰীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
