শৰীৰৰ বাবে প্ৰ’টিন অতি প্ৰয়োজনীয় যদিও অত্যধিক প্ৰ’টিন ক্ষতিকাৰক হ’ব পাৰে। যদিও আজিকালি বিশেষকৈ জিমলৈ যোৱা লোকৰ মাজত উচ্চ প্ৰ’টিনযুক্ত খাদ্য ক্ৰমান্বয়ে জনপ্ৰিয় হৈ পৰিছে, তথাপিও আপুনি জানেনে অত্যধিক প্ৰ’টিনযুক্ত খাদ্যই আপোনাৰ বৃক্কৰ ক্ষতি কৰিব পাৰে। বিশেষজ্ঞৰ পৰা জানো আহক…
দিল্লীৰ লেডী হাৰ্ডিং মেডিকেল কলেজৰ চিকিৎসা বিভাগৰ সঞ্চালক অধ্যাপক ডাঃ এল এইচ ঘোটেকাৰে বুজাইছে যে, প্ৰতিজন ব্যক্তিয়ে নিজৰ শৰীৰৰ ওজনৰ ওপৰত ভিত্তি কৰি প্ৰতিদিনে এক গ্ৰাম প্ৰ’টিন সেৱন কৰিব লাগিব। উদাহৰণস্বৰূপে, কাৰোবাৰ যদি ৬০ কিলোগ্ৰাম ওজন আছে, তেন্তে তেওঁ দৈনিক ৬০ গ্ৰাম প্ৰ’টিন সেৱন কৰিব লাগিব। এই পৰিমাণৰ প্ৰ’টিন শৰীৰৰ বাবে যথেষ্ট, কিন্তু ইয়াতকৈ অধিক সেৱন কৰিলে বৃক্কত বিৰূপ প্ৰভাৱ পৰিব পাৰে । বিশেষকৈ যদি আপুনি প্ৰ’টিনৰ পৰিপূৰক গ্ৰহণ কৰে, তেন্তে ই ক্ষতিকাৰক হ’ব পাৰে।
অতিৰিক্ত প্ৰ’টিনে শৰীৰৰ কিদৰে ক্ষতি কৰে?
ডাঃ ঘোটেকাৰে বুজাইছে যে যেতিয়া অত্যধিক পৰিমাণৰ প্ৰ’টিন শৰীৰত প্ৰৱেশ কৰে, তেতিয়া বৃক্কই ইয়াক ফিল্টাৰ কৰাত অসুবিধা পায়। ইয়াৰ ফলত বৃক্কত হেঁচা পৰে। অতিৰিক্ত প্ৰটিনৰ ফলত ইউৰিয়া আৰু অন্যান্য পেলনীয়া সামগ্ৰীৰ উৎপাদনো বৃদ্ধি পায়। শৰীৰৰ পৰা এই আৱৰ্জনাবোৰ আঁতৰোৱাৰ বাবে বৃক্ক দায়বদ্ধ। অত্যধিক পৰিমাণৰ প্ৰ’টিন সেৱনে ধাৰাবাহিকভাৱে বৃক্কক অধিক কঠোৰ পৰিশ্ৰম কৰিবলৈ বাধ্য কৰে আৰু এই চাপৰ ফলত বৃক্কৰ ক্ষতি হ’ব পাৰে। অৱশ্যে এইটো হঠাতে নহয়। যদি কোনোবাই বছৰ বছৰ ধৰি উচ্চ প্ৰটিনযুক্ত খাদ্য গ্ৰহণ কৰি আহিছে তেন্তে তেওঁলোকৰ বৃক্কৰ ক্ষতি হ’ব পাৰে।
কোনবোৰ মানুহৰ বিপদ বেছি?
গধুৰ ৱৰ্কআউট কৰা লোকসকলে উচ্চ প্ৰ’টিনৰ ফলত ইমান ক্ষতি নহ’বও পাৰে, কিন্তু যিসকল স্বাভাৱিক আৰু অত্যধিক প্ৰ’টিন সেৱন কৰে, তেওঁলোকৰ বৃক্কৰ ক্ষতি হ’ব পাৰে। তদুপৰি যিসকলৰ ইতিমধ্যে বৃক্কৰ সমস্যা বা ডায়েবেটিছ আছে তেওঁলোকৰ বাবে উচ্চ প্ৰ’টিনযুক্ত খাদ্য আৰু অধিক বিপজ্জনক হ’ব পাৰে।
কি কৰিব?
- ফাইবাৰ আৰু কাৰ্বহাইড্ৰেটৰ লগতে প্ৰ’টিন সেৱন কৰক।
- যিকোনো প্ৰ’টিন পৰিপূৰক গ্ৰহণ কৰাৰ আগতে চিকিৎসকৰ পৰামৰ্শ লওক।
- পৰ্যাপ্ত পৰিমাণৰ পানী খাব লাগে, দিনটোত কমেও ৭ গিলাচ পানী খাওক
- দৈনিক ব্যায়াম কৰক
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
