হিমাচল প্ৰদেশৰ এখন বিবাহৰ কথা বিগত বৰ্ষত চৰ্চাৰ শিৰোনামত আছিল৷ দুই ভাতৃয়ে এজনী যুৱতীৰ সৈতেই বিবাহপাশত আৱদ্ধ হৈছিল৷ হিমাচল প্ৰদেশৰ ছিৰমৌ জিলাৰ শিল্লাই এলেকাত হোৱা সেই অনন্য বিবাহৰ বাতৰি আকৌ সংবাদ শিৰোনামলৈ আহিছে৷ ২০২৫ চনৰ জুলাই মাহত কপিল আৰু প্ৰদীপ নামৰ দুই ভাতৃয়ে বিয়া কৰাইছিল সুনীতা নামৰ যুৱতীগৰাকীক৷ বিবাহৰ প্ৰায় ১০ মাহৰ পাছত সুনীতাই জন্ম দিছে এটি কন্যা সন্তান৷ সন্তান জন্মৰ পাছতেই বহুজনে পৰিয়ালটোক অভিনন্দনো জনাইছে, কিন্তু তাৰমাজতে বহুতে প্ৰশ্ন কৰিছে এই সন্তানটোৰ পিতৃ কোন হ’ব? জন্মৰ প্ৰমাণ পত্ৰত এই সন্তানৰ পিতৃৰ নাম কি বুলি উল্লেখ থাকিব? প্ৰদীপ নে কপিল?
চৰ্চা চলি আছে৷ চৰ্চাৰ মাজতে শেহতীয়াকৈ তেওঁলোকে জনাইছে যে, তেওঁলোকৰ পৰম্পৰা অনুসৰি কন্যা শিশুটিৰ পিতৃৰ পৰিচয়ত ডাঙৰ ভাতৃৰ নামেই উল্লেখ থাকিব বুলি জনাইছে তেওঁলোকৰ পৰিয়ালে৷ এই ধৰণৰ বিবাহক হিমাচলত ভ্ৰাতৃত্ববোধৰ বহুবিবাহ বুলি জনা যায়৷ ভূমি বিভাজন ৰোধ কৰিবলৈ আৰু পৰিয়ালৰ সম্পত্তি একত্ৰিত কৰি ৰাখিবলৈ পাহাৰীয়া এই অঞ্চলত পূৰ্বৰে পৰাই এই পৰম্পৰা প্ৰচলিত আছে৷
ভাৰতীয় আইনৰ অধীনত অৱশ্যে বহুবিবাহক স্বীকৃতি দিয়া নহয়৷ সেয়ে আনুষ্ঠানিকভাৱে ডাঙৰ ভাতৃকেই আনুষ্ঠানিকভাৱে মহিলাগৰাকীৰ স্বামী হিচাপে গণ্য কৰা হয়৷ সন্তানৰ জন্মৰ প্ৰমাণ পত্ৰতো ডাঙৰ ভাতৃৰেই নাম থাকে৷ শিশুটিৰ জৈবিক পিতৃৰ বিষয়টো তেওঁলোকৰ বাবে নগণ্য৷ ডাঙৰ ভাতৃকেই তেওঁলোকে আনুষ্ঠানিক স্বীকৃতি দিয়ে৷ অৱশ্যে পত্নীয়ে দুই ভাতৃৰ সৈতেই সহবাস কৰে৷ কেতিয়া কাৰ সৈতে কটাব সেই সিদ্ধান্ত মহিলাগৰাকীয়ে নিজে লয়৷ হিমাচল প্ৰদেশৰ প্ৰাক্তন মুখ্যমন্ত্ৰী ৱাই পাৰমাৰে ১৯৭৫ চনত বহুবিবাহৰ ওপৰত এখন গ্ৰন্থ লিখিছিল য’ত এই প্ৰথাৰ বিষয়ে বিতংভাৱে উল্লেখ আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
