মহাৰাষ্ট্ৰৰ নাছিক চহৰত এগৰাকী স্বঘোষিত ধৰ্মগুৰুৰ বিৰুদ্ধে আধ্যাত্মিক চিকিৎসাৰ চলেৰে ২৮ বছৰীয়া এগৰাকী মহিলাক ধৰ্ষণৰ অভিযোগ উঠিছে৷ মানসিক যন্ত্ৰণাৰ পৰা মুক্তি লাভৰ আশাত সেই মহিলা ধৰ্মগুৰুৰ শৰণাপন্ন হৈছিল৷ নিৰ্যাতিতাৰ অভিযোগৰ ভিত্তিতেই অভিযুক্ত মহেশগিৰি বাবাৰ বিৰুদ্ধে ৰাজ্যখনৰ কুসংস্কাৰ বিৰোধী আইনৰ ধাৰাত এই গোচৰ দাখিল কৰা হৈছে৷
ভুক্তভোগী মহিলা নাছিকৰ এখন বেচৰকাৰী হাস্পতালৰ নিৰাপত্তাৰক্ষী হিচাপে কৰ্মৰত৷ পাৰিবাৰিক সমস্যা আৰু মানসিক স্বাস্থ্যৰ অৱনতিৰ কাৰণে তেওঁৰ পিতৃ-মাতৃয়ে তেওঁক সেই ধৰ্মগুৰুৰ কাষলৈ লৈ গৈছিল৷ নিজৰ অলৌকিক ক্ষমতাৰ দাবী কৰি সেই অভিযুক্তই ব্যক্তিগৰাকীৰ পৰিয়ালক জনায় যে সেই মহিলাৰ ওপৰত কোনো অশুভ আত্মাই ভৰ কৰিছে৷ তেওঁ মহিলাক সুস্থ কৰি তোলাৰো প্ৰতিশ্ৰুতি দিয়ে৷
অভিযোগ অনুসৰি সেই ধৰ্মগুৰুৱে মহিলাক প্ৰতি বৃহস্পতিবাৰে প্ৰাৰ্থনাত অংশ লবলৈ কয় আৰু ধীৰে ধীৰে তেওঁৰ মোবাইল ফোনত ব্যক্তিগত আৰু অশ্লীল বাৰ্তা পঠিয়াবলৈ আৰম্ভ কৰে৷ ২০২৪ চনৰ আগষ্ট মাহত তেওঁ সেই মহিলাক এক নিৰ্জন স্থানলৈ আহিবলৈ কয় আৰু তাতেই তেওঁৰ বাহনত ওঠাই এখন লজলৈ লৈ যোৱা বুলি অভিযোগ৷
মহিলাগৰাকীয়ে বাধা দিয়াৰ চেষ্টা কৰিলে অভিযুক্তই তেওঁৰ নিজৰ হাতৰ ৰুদ্ৰাক্ষ দেখুৱাই ধমকি দিয়ে আৰু কয়, ‘মোৰ অলৌকিক ক্ষমতা আছে৷ তুমি কোনোধৰণেই মোক বাধা দিব নোৱৰা’ ইয়াৰপাছতেই তেওঁ জোৰকৰি মহিলাৰ সৈতে যৌন সম্পৰ্কও গঢ়ে৷ ইয়াৰোপৰি তেওঁ সেই মহিলাৰ নগ্ন ছবিও তুলিছে বুলি অভিযোগ উত্থাপিত হৈছে৷
অভিযোগত আৰু লগতে কোৱা হৈছে যে পৰবৰ্তীসময়ত সেই মহিলাই যেতিয়া তেওঁৰ আত্মীয়ৰ আগত এই কথা প্ৰকাশ কৰে তেতিয়া অভিযুক্তৰ ধমকিৰ মাত্ৰা আৰু বাঢ়ি যায়৷ তেওঁ সেই মহিলাক তেওঁৰ কাৰ্যালয়লৈ মাতি পঠিয়াই৷ নিজকে এজন গুণ্ডা হিচাপে দাবী কৰে আৰু আৰক্ষীৰ ওচৰত নাযাবলৈ সতৰ্ক কৰি দিয়ে৷ ইয়াৰোপৰি তেওঁ সেই মহিলাৰ মোবাইল ফোনটো কাঢ়ি লয় আৰু নিৰ্যাতনৰ সৈতে সম্পৰ্কিত সকলো বাৰ্তা আৰু অন্যান্য প্ৰমাণো মোহাৰি পেলায়৷
ভয়ৰ কাৰণে কিছুদিন চুপ থকাৰ পাছত নিৰ্যাতিতাই সহায়ৰ বাবে কুসংস্কাৰ বিৰোধী সংগঠন অন্ধশ্ৰদ্ধাৰ নিৰ্মূলন সমিতিৰ দ্বাৰস্থ হয়৷ ইয়াৰপাছতেই মহাৰাষ্ট্ৰ আৰক্ষীৰ ওচৰত এন আনুষ্ঠানিক অভিযোগ দাখিল কৰে৷ বৰ্তমান এই ঘটনা তদন্ত আওতাত আছে৷
উল্লেখ্য যে নাছিক চহৰৰ অশোক খাৰাত নামৰ আৰু এজন স্বঘোষিত ধৰ্মগুৰুৰ বিৰুদ্ধেও এই ধৰণৰ এক অভিযোগৰ ঘটনা সন্মুখলৈ আহিছিল৷ বিগত মাৰ্চ মাহত তেওঁক গ্ৰেপ্তাৰ কৰা হয়৷ এগৰাকী বিবাহিত মহিলাই অভিযোগ কৰিছিল যে সেই ব্যক্তিয়ে বিগত তিনি বছৰ ধৰি তেওঁক বাৰে বাৰে ধৰ্ষণ কৰিছিল৷ ইয়াৰোপৰি তেওঁৰ বিৰুদ্ধে প্ৰতাৰণা কৰি যৌন সম্পৰ্ক স্থাপনসহ আৰু বেছ কিছু গুৰুতৰ অপৰাধৰ অভিযোগো আছে৷ ইয়াৰ মাজতে ২০১৩ চনৰ মহাৰাষ্ট্ৰ মানৱ বলিদান আৰু অন্যান্য অমানৱিক কুপ্ৰথা আৰু কলাজাদু প্ৰতিৰোধ আৰু নিৰ্মূল আইন লঙ্ঘনৰ অভিযোগো অন্তৰ্ভুক্ত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
