ভাৰতৰ লাখ লাখ আধাৰ কাৰ্ড ব্যৱহাৰকাৰীৰ বাবে এটা ভাল খবৰ। বিনামূলীয়া আধাৰ কাৰ্ড আপডেটৰ সময়সীমা এবছৰ বৃদ্ধি কৰিছে চৰকাৰে। ব্যৱহাৰকাৰীসকলে এতিয়া জন্ম তাৰিখৰ পৰা ঠিকনালৈকে বিনামূলীয়াকৈ ২০২৭ চনৰ ১৪ জুনলৈকে সংশোধন কৰিব পাৰিব, মাত্ৰ myAadhaar পৰ্টেললৈ গৈ। UIDAI এ উল্লেখ কৰিছে যে এই সুবিধা কেৱল অনলাইন অৰ্থাৎ myAadhaar পৰ্টেলৰ জৰিয়তে বিনামূলীয়াকৈ উপলব্ধ হ’ব। এই বৈশিষ্ট্যৰ অধীনত মানুহে নিজৰ পৰিচয় আৰু ঠিকনাৰ নথি-পত্ৰ অনলাইনত আপলোড কৰি আধাৰৰ তথ্য আপডেট কৰিব পাৰিব।
ইউআইডিএআইৰ মতে, জনসাধাৰণৰ ইতিবাচক প্ৰতিক্ৰিয়াৰ পিছতে এই বৈশিষ্ট্য সম্প্ৰসাৰণৰ সিদ্ধান্ত লোৱা হৈছে। বৃহৎ সংখ্যক লোকে অনলাইনযোগে আধাৰ আপডেট কৰি আছে, যাৰ ফলত প্ৰক্ৰিয়াটো সহজ আৰু ক্ষীপ্ৰ হৈ পৰিছে। কেইবাবছৰ পূৰ্বে আধাৰ লাভ কৰা আৰু এতিয়াও নথি-পত্ৰ আপডেট নকৰাসকলক শীঘ্ৰে প্ৰয়োজনীয় নথি-পত্ৰ আপডেট কৰিবলৈ ইউআইডিএআইয়ে আবেদন জনাইছে। ইয়াৰ দ্বাৰা আধাৰ তথ্যকোষত সঠিক আৰু শেহতীয়া তথ্য নিশ্চিত হ’ব।
এপটোৰ বিষয়ে তথ্য
ইয়াৰ উপৰিও ইউআইডিএআইয়ে ছ’চিয়েল মিডিয়া প্লেটফৰ্ম এক্সত ঘোষণা কৰে যে পুৰণি mAadhaar এপটো অতি সোনকালে বন্ধ কৰা হ’ব। এতিয়া ব্যৱহাৰকাৰীয়ে নতুন আধাৰ এপটো ডাউনলোড কৰিব পাৰিব। নতুন এপটোত সুৰক্ষিত QR ভিত্তিক আধাৰ শ্বেয়াৰিং, উন্নত গোপনীয়তা নিয়ন্ত্ৰণ, আৰু সহজ ডিজিটেল প্ৰৱেশৰ বৈশিষ্ট্য আছে। ইউআইডিএআইয়ে কয় যে এই নতুন এপটোৱে ডিজিটেল পৰিচয়ক পূৰ্বতকৈ অধিক সুৰক্ষিত আৰু সুবিধাজনক কৰি তুলিব।
এইদৰে আপুনি আধাৰ কাৰ্ড অনলাইন আপডেট কৰিব পাৰিব
- প্ৰথমে myAadhaar portal ত গৈ আপোনাৰ Aadhaar number আৰু আপোনাৰ মোবাইলত পোৱা OTP লৈ লগইন কৰক।
- লগ ইন কৰাৰ পিছত, আপোনাৰ নাম, ঠিকনা আৰু অন্য তথ্য সাৱধানে পৰীক্ষা কৰক।
- যদি তথ্য ভুল হয় তেন্তে প্ৰথমে আপডেট কৰক।
- যদি সকলো তথ্য শুদ্ধ হয়, তেন্তে I verify that the above details are correct বিকল্পটোত ক্লিক কৰক
- এতিয়া ড্ৰপ-ডাউন মেনুৰ পৰা আপোনাৰ পৰিচয় প্ৰমাণ নিৰ্ব্বাচন কৰক।
- আপোনাৰ নিৰ্বাচিত আইডি আপল’ড কৰক। ফাইলটো 2 MB তকৈ কম আৰু JPEG, PNG, বা PDF ফৰ্মেটত হ’ব লাগিব।
- ইয়াৰ পিছত, ড্ৰপ-ডাউন মেনুৰ পৰা আপোনাৰ ঠিকনা প্ৰমাণ নিৰ্ব্বাচন কৰক।
- এতিয়া ঠিকনাৰ প্ৰমাণ আপলোড কৰক, তাৰ পিছত আপোনাৰ সন্মতি দি ফৰ্মখন জমা দিয়ক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
