পশ্চিম এছিয়াৰ উত্তেজনা আৰু হৰমুজ প্ৰণালী বন্ধ হৈ যোৱাত বিশ্বব্যাপী ইন্ধনৰ সংকট তৈয়াৰ হৈছে৷ বহু দেশত পেট্ৰল আৰু ডিজেলৰ দাম বাঢ়িছে ভাৰততো ইন্ধনৰ দাম বাঢ়িছে৷ এসপ্তাহৰ ভিতৰত পেট্ৰল আৰু ডিজেলৰ দাম দুবাৰলৈ বৃদ্ধি পাইছে৷ একেই অৱস্থা এল পিজিৰো৷
এক প্ৰতিবেদনে দাবী কৰা অনুসৰি LPG-ৰ তৃতীয় বৃহত্তম ভোক্তা দেশ ভাৰত প্ৰতিদিনে ৪লাখ বেৰেলৰ সৰবৰাহ ঘাটিৰ সন্মুখীন হৈছে৷ এক আন্তৰাষ্ট্ৰীয় প্ৰতিবেদনত কোৱা হৈছে যে এপ্ৰিল মাহত ভাৰতৰ LPG আমদানি আছিল প্ৰতিদিনে ৩৭৭,৬২০ বেৰেল৷ যি ফেব্ৰুৱাৰীত আমদানি কৰা প্ৰতিদিনৰ ৮৫১,৮৭০ বেৰেলতকৈ উল্লেখযোগ্যভাৱে কম৷ উল্লেখ্য যে ফেব্ৰুৱাৰীত হৰমুজ প্ৰণালী সম্পূৰ্ণৰূপে চলি আছিল৷
যুদ্ধ বঢ়াৰ পাছৰে পৰা পৰিস্থিতি বেয়ালৈ ঢাল খাইছে৷ এই সংকটৰ মাজত চৰকাৰে সৰবৰাহৰ ঘাটি দূৰ কৰিবলৈ বিভিন্ন পদক্ষেপ লৈছে৷ চৰকাৰে পাইপলাইন PNG সংযোগ থকা পৰিয়ালসমূহক তেওঁলোকৰ LPG সংযোগ বন্ধ কৰিবলৈ কৈছে৷ চৰকাৰে তেওঁলোকক এই পৰিসেৱা বন্ধৰ বাবে তিনিমাহ সময়ো দিছে৷ এয়া বাস্তবায়নৰ বাবে চৰকাৰে এক পৰিয়াল এক সংযোগ নিয়ম আৰম্ভ কৰিছে৷ যাৰ ফলত এটা পৰিয়ালৰ পক্ষে পিএনজি আৰু ভৰ্তুকিপ্ৰাপ্ত গাৰ্হস্থ্য LPG উভয়েই ৰখা অবৈধ৷
মাৰ্চ মাহত এলপিজিৰ দাম কিয় বাঢ়িছে?
চৰকাৰে মাৰ্চৰ আৰম্ভণিতে ১৪.২ কেজি ৰেগুলাৰ এলপিজি চিলিণ্ডাৰৰ দামো ৬০টকা বঢ়াইছে৷ ১১ মে পৰ্যন্ত দেশত ৪৫দিনৰ ৰোলিং ষ্টক, ইয়াৰ সৈতে ৬০ দিনৰ খাৰুৱা তেল আৰু প্ৰাকৃতিক গেছ মজুত আছিল৷ কোৱা হৈছে ভাৰতেও এলপিজি ক্ৰয়ৰ ক্ষেত্ৰত কিছু সালসলনি অনাৰ চেষ্টা কৰিছে৷ ইৰান, অষ্ট্ৰেলিয়া, আৰ্জেন্টিনা আৰু চিলিৰ পৰা এলপিজি কিনিছে৷ এইকেইখন দেশৰ পৰা এপ্ৰিলমাহত দৈনিক ৪৩,০০০ বেৰেল সৰবৰাহ কৰিছে৷ যি ফেব্ৰুৱাৰীত আছিল শূন্য৷ এই পৰিমাণ মধ্যপ্ৰাচ্যৰ চাৰি সৰবৰাহকাৰীয়ে পঠিওৱা দৈনিক ৬৭৮,০০০ বেৰেলতকৈ উল্লেখযোগ্যভাৱে কম আৰু দূৰত্বও এক গুৰুত্বপূৰ্ণ কাৰণ৷
প্ৰতিবেদনত কোৱা হৈছে অষ্ট্ৰেলিয়াৰ পৰা ভাৰতলৈ সৰবৰাহ কৰিবলৈ প্ৰায় ২০দিন সময় লাগে৷ অন্যহাতে আৰ্জেন্টিনা আৰু আমেৰিকালৈ ৰপ্তানিত ৩৫-৪৫ দিন পৰ্যন্ত সময় লাগিব পাৰে৷ এপ্ৰিল মাহত ভাৰতে এই দেশসমূহৰ পৰা প্ৰতিদিনে ১ লাখ ৪৯ হাজাৰ বেৰেল গেছ পাইছে৷
গেছ আমদানিৰ ৮০শতাংশই আহে মধ্যপ্ৰাচ্যৰ পৰা
উল্লেখ্য যে ভাৰতত LPGৰ কোনো দীৰ্ঘম্যাদি মজুত ব্যৱস্থা নাই আৰু দেশে মুঠ এলপিজি চাহিদাৰ প্ৰায় দুই তৃতীয়াংশ আমদানি কৰে৷ ভাৰতৰ এলপিজি আমদানিৰ প্ৰায় ৮০শতাংশই আহে সংযুক্ত আৰৱ আমিৰশাহ, কাটাৰ, কুৱেইট আৰু ছৌদী আৰৱৰ পৰা৷ যদিও বাৰতে এতিয়া বিভিন্ন উৎসৰ পৰা তেল আৰু গেছ আমদানি কৰিছে তথাপিও চাহিদা দূৰ কৰা সম্ভৱ হোৱা নাই৷ ফলস্বৰূপে দেশত এল পি জিৰ উৎপাদন বঢ়োৱাতো জোৰ দিয়া হৈছে৷ গেছৰ নিৰবচ্ছিন্ন সৰবৰাহ নিশ্চিত কৰিবলৈ কিছু নিয়মকানুনো কঠোৰ কৰা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
