পশ্চিমবংগৰ বিধানসভা নিৰ্বাচনৰ পিছৰে পৰা তৃণমূল কংগ্ৰেছ এক বৃহৎ ৰাজনৈতিক সংকটৰ সন্মুখীন হৈছে। বিধানসভাত বিপৰ্যয়ৰ পিছতে ব্যাপক বিসম্বাদে জুৰুলা কৰি তুলিছে মমতা দিদিৰ তৃণমূল কংগ্ৰেছক। অতি কমেও ৫০গৰাকী নেতা-নেত্ৰীয়ে তৃণমূল কংগ্ৰেছক বিদায় জনোৱাৰ যো-জা চলাই আছে বুলি আশংকা ব্যক্ত কৰা হৈছে। ইয়াৰ মাজতে দলটোৰ বিসম্বাদী নেতাসকলক উদ্দেশ্যি ১৯৮৩ বিশ্বকাপ বিজয়ী দলটোৰ সদস্য তথা তৃণমূল কংগ্ৰেছৰ সাংসদ কীৰ্তি আজাদে ‘যিখন থালিতে খাইছিল সেইখন থালিতে বিন্ধা কৰিবলৈও লাজ লগা নাই’ বুলি তীৰ্যকপূৰ্ণ মন্তব্য কৰে। ইপিনে দলটোৰ অন্যতম বিসম্বাদী নেত্ৰী কাকলী ঘোষ দস্তিদাৰে দাবী কৰিছে যে মমতা দিদিৰ সংগ এৰি দলটোৰ ২০গৰাকীকৈ সাংসদ তেওঁৰ লগত আছে। উল্লেখ্যে যে তৃণমূল কংগ্ৰেছৰ বৰ্তমান সাংসদৰ সংখ্যা হৈছে ২৮গৰাকী। ২৮ গৰাকী সাংসদৰ ভিতৰত যদি ২০ গৰাকীয়েই একগোট হোৱাৰ ফলত সদনত সংখ্যাগৰিষ্ঠতাৰ ভিত্তিত এই ২০ গৰাকীকহে মান্যতা দিয়াৰ সম্ভাৱনা অধিক। এটা ৰাষ্ট্ৰীয় সংবাদ মাধ্যমৰ খবৰ অনুসৰি কাকলী ঘোষ দাস্তিদাৰৰ নেতৃত্বত এই ২০ গৰাকী সাংসদে ইতিমধ্যে কেন্দ্ৰীয় মন্ত্ৰী ভূপেন্দ্ৰ যাদৱৰ বাসগৃহত এক বৈঠকত মিলিত হয়। আনহাতে পশ্চিমবংগৰ মুখ্যমন্ত্ৰী শুভেন্দু অধিকাৰীয়ে তৃণমূল কংগ্ৰেছৰ সাংসদ শতাব্দী ৰায়ৰ দিল্লীস্থিত আৱাসলৈ গৈ তেওঁক সাক্ষাৎ কৰাৰো খবৰ প্ৰকাশ পাইছে, যত শতাব্দী ৰায়ৰ লগতে আন কেইবাগৰাকীও TMCৰ নেতা উপস্থিত আছিল। ইতিমধ্যে TMCৰ ৰাজ্যসভাৰ পৰা মনোনীত সাংসদ সুখেন্দু ৰেই ৰাজ্যসভা আৰু দলৰ প্ৰাথমিক সদস্য পদ ত্যাগ কৰিছে।
অৱশ্যে অধিকাংশ বিসম্বাদী নেতাৰ মমতা বেনাৰ্জীক লৈ কোনো অভিযোগ নাই। এই নেতাসকলৰ অভিযোগ মমতা বেনাৰ্জীৰ উত্তৰসূৰী হিচাপে বিবেচিত অভিষেক বেনাৰ্জীৰ প্ৰতিহে। অভিষেক বেনাৰ্জীৰ দল পৰিচালনা কৰা আদৱ-কায়দাত অসন্তুষ্ট অধিকাংশ TMC নেতা-কৰ্মী।
ইপিনে আজি কলকাতাৰ 30B ষ্ট্ৰীটস্থিত মমতা বেনাৰ্জীৰ বাসগৃহ তথা তৃণমূল কংগ্ৰেছৰ কেন্দ্ৰীয় কাৰ্যালয়ত উপস্থিত হৈছে CIDৰ দল। দলটোও এখন বিশেষ পত্ৰত স্বাক্ষৰিত এটা ভুৱা স্বাক্ষৰ সন্দৰ্ভত অভিষেক বেনাৰ্জীক সোধা-পোছাৰ বাবে উক্ত ঠিকনাত হৈছিল CIDৰ দলটো। অৱশ্যে সম্প্ৰতি দিল্লীত আছে মমতা বেনাৰ্জী।
এই লেখাটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
