ডিজেল ক্ৰয় সন্দৰ্ভত চৰকাৰে কিছু নিৰ্দেশনা জাৰি কৰিছে। নতুন চৰকাৰী নিৰ্দেশ অনুসৰি ঔদ্যোগিক, বাণিজ্যিক আৰু প্ৰতিষ্ঠানিক ব্যৱহাৰকাৰীসকলক সাধাৰণ পেট্ৰ’ল পাম্পৰ পৰা পেট্ৰ’ল আৰু ডিজেল ক্ৰয় কৰাত নিষেধাজ্ঞা আৰোপ কৰা হৈছে। চৰকাৰে এনে প্ৰতিষ্ঠানক নিজৰ প্ৰয়োজনীয় ইন্ধন অনুমোদিত বাল্ক বিক্ৰী কেন্দ্ৰৰ পৰা সংগ্ৰহ কৰিবলৈ নিৰ্দেশ দিছে।
এই নিষেধাজ্ঞাসমূহ ৯০ দিনৰ বাবে কাৰ্যকৰী হ’ব। পিছলৈ এই সময়সীমা আৰু বৃদ্ধি হ’ব পাৰে। কিছুমান অঞ্চলত ডিজেলৰ চাহিদা অস্বাভাৱিকভাৱে বৃদ্ধি পোৱাৰ পাছত চৰকাৰে এই পদক্ষেপ গ্ৰহণ কৰিছে। ইয়াৰ মূল কাৰণ হৈছে যে বহুতো বৃহৎ ব্যৱহাৰকাৰী আৰু প্ৰতিষ্ঠানে বাল্ক বিক্ৰীৰ তুলনাত কম মূল্যত উপলব্ধ সাধাৰণ পেট্ৰ’ল পাম্পৰ পৰা ডিজেল ক্ৰয় কৰা চৰকাৰৰ দৃষ্টিগোচৰ হৈছিল। সাধাৰণতে টেলিকম টাৱাৰ পৰিচালনা, বিদ্যুৎ উৎপাদন, নিৰ্মাণ কাৰ্য আৰু অন্যান্য বৃহৎ বাণিজ্যিক কাম-কাজত ডিজেল ব্যৱহাৰ কৰা ডাঙৰ উদ্যোগসমূহক বাল্ক ভিত্তিত তুলনামূলকভাৱে অধিক মূল্যত ডিজেল বিক্ৰী কৰা হয়। ফলস্বৰূপে, কম মূল্যত উপলব্ধ সাধাৰণ পেট্ৰ’ল পাম্পৰ পৰা বহুল পৰিমাণে এনে প্ৰতিষ্ঠানসমূহে ডিজেল ক্ৰয় কৰে।
উদাহৰণস্বৰূপে, দিল্লীত সাধাৰণ পেট্ৰ’ল পাম্পত ১২ জুনত ডিজেলৰ মূল্য প্ৰতি লিটাৰত ৯৫.২০ টকা, আনহাতে বাল্ক বিক্ৰী কেন্দ্ৰত একে ডিজেলৰ মূল্য প্ৰতি লিটাৰত ১৩৪.৫০ টকা। অৰ্থাৎ, দুয়োটা মূল্যৰ মাজত যথেষ্ট পাৰ্থক্য আছে। আনহাতে বিভিন্ন ঔদ্যোগিক প্ৰতিষ্ঠানসমূহক দৈনিক শ শ লিটাৰৰ ডিজেলৰ প্ৰয়োজন হয়। প্ৰতি লিটাৰত প্ৰায় ৪০টকা ৰাহি কৰাৰ উদ্দেশ্যে প্ৰতিষ্ঠানসমূহে সাধাৰণ পেট্ৰ’ল পাম্পৰ পৰা ক্ৰয় কৰা দেখা যায়। এই মূল্য বৈষম্যৰ ফলত বহু বৃহৎ গ্ৰাহকে বাল্ক বিক্ৰী কেন্দ্ৰৰ সলনি সাধাৰণ পাম্পৰ পৰা ইন্ধন ক্ৰয় কৰিবলৈ আগ্ৰহ প্ৰকাশ কৰিছিল।
কিয় চৰকাৰৰ এই পদক্ষেপ?
এই পৰিস্থিতিৰ প্ৰতি লক্ষ্য ৰাখি, কেন্দ্ৰীয় চৰকাৰৰ পেট্ৰ’লিয়াম আৰু প্ৰাকৃতিক গেছ মন্ত্ৰালয়-এ “Motor Spirit and High Speed Diesel (Regulation of Supply through Retail Outlets) Order, 2026” নামৰ নিৰ্দেশনা জাৰি কৰে। এই নিৰ্দেশনা ইন্ধন বিক্ৰেতা আৰু তৈল বিপণন কোম্পানীসমূহক নিৰ্দেশ দিয়া হৈছে যে প্ৰয়োজন হ’লে একেলগে ৯০ দিন পৰ্যন্ত খুচুৰা বিক্ৰী কেন্দ্ৰৰ জৰিয়তে বাল্ক পৰিমাণৰ ইন্ধন বিক্ৰী বন্ধ ৰাখিব লাগিব। অৰ্থাৎ বৃহৎ পৰিমাণৰ ইন্ধন প্ৰয়োজন হোৱা শিল্প, ব্যৱসায়িক প্ৰতিষ্ঠান আৰু অন্যান্য সংগঠনসমূহে সাধাৰণ পেট্ৰ’ল পাম্পৰ পৰা ডিজেল বা পেট্ৰ’ল কিনিব নোৱাৰিব; তেওঁলোকে কেৱল নিৰ্ধাৰিত বাল্ক বিক্ৰী কেন্দ্ৰৰ পৰাই ইন্ধন সংগ্ৰহ কৰিব লাগিব। চৰকাৰৰ মতে, এই ব্যৱস্থাৰ মূল উদ্দেশ্য হৈছে সাধাৰণ গ্ৰাহকৰ বাবে পেট্ৰ’ল আৰু ডিজেলৰ পৰ্যাপ্ত যোগান নিশ্চিত কৰা। বৃহৎ ব্যৱহাৰকাৰীৰ দ্বাৰা খুচুৰা বিক্ৰী ব্যৱস্থাৰ অপব্যৱহাৰ ৰোধ কৰা। ইন্ধন যোগান ব্যৱস্থাত ভাৰসাম্য বজাই ৰখা। কৃত্ৰিম সংকট প্ৰতিহত কৰা। তেল বিপণন কোম্পানীসমূহৰ বিতৰণ ব্যৱস্থাক অধিক সু-সংগঠিত কৰা। এই সিদ্ধান্তৰ ফলত সাধাৰণ গাড়ী-মটৰচালক, বাইক আৰোহী বা ব্যক্তিগত ব্যৱহাৰকাৰীৰ ওপৰত কোনো প্ৰত্যক্ষ প্ৰভাৱ নপৰে। তেওঁলোকে আগৰ দৰেই সাধাৰণ পেট্ৰ’ল পাম্পৰ পৰা ইন্ধন ক্ৰয় কৰি থাকিব পাৰিব। এই নিয়ম মূলতঃ বৃহৎ শিল্প প্ৰতিষ্ঠান, বাণিজ্যিক সংস্থা, টেলিকম কোম্পানী, বিদ্যুৎ উৎপাদন ইউনিট আৰু অন্যান্য বৃহৎ ইন্ধন ব্যৱহাৰকাৰী সংগঠনৰ ক্ষেত্ৰতহে প্ৰযোজ্য হ’ব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
