ভাৰতীয় সংস্কৃতিত প্ৰায় প্ৰতিটো ঘৰত যিকোনো উৎসৱ, পূজা-পাৰ্বণ বা বিভিন্ন অনুষ্ঠানত মিঠাইৰ কথা আহিলেই প্ৰথমে মনলৈ আহে খীৰ। বহু যুগ ধৰি খীৰ আমাৰ খাদ্য-সংস্কৃতিৰ এক অবিচ্ছেদ্য অংশ হিচাপে পৰিগণিত হৈ আহিছে। কিন্তু পৰম্পৰাগত পদ্ধতিত গাঢ় আৰু মলাইদাৰ খীৰ বনাবলৈ যথেষ্ট সময় আৰু প্ৰচুৰ পৰিমাণৰ গাখীৰৰ প্ৰয়োজন হয়। গাখীৰক দীৰ্ঘ সময় ধৰি জুইত ৰাখি লৰাই থাকিব লাগে, তেতিয়াহে সেয়া গাঢ় আৰু সোৱাদযুক্ত হয়। কিন্তু যদি হঠাতে ঘৰলৈ অতিথি আহে আৰু পৰ্যাপ্ত পৰিমানৰ গাখীৰ নাথাকে, তেতিয়া কি কৰিব? আচৰিত হ’লেও সত্য যে গাখীৰ নোহোৱাকৈয়েও অতি কম সময়তে একেবাৰে সোৱাদেৰে ভৰপূৰ, মসৃণ আৰু মলাইদাৰ খীৰ প্ৰস্তুত কৰিব পাৰি।
কেনেকৈ বনাব এই বিশেষ খীৰ?
প্ৰথমে সাধাৰণভাৱে চাউল ভালদৰে ধুই লওক। ইয়াৰ পিছত কোনো খোলা পাত্ৰত পানী দি চাউলখিনি সিজাওক। এই ৰেচিপিৰ বাবে প্ৰেছাৰ কুকাৰ ব্যৱহাৰ নকৰাই ভাল।চাউল সম্পূৰ্ণৰূপে সিজি গ’লে উতলা পানীখিনি এটা ডাঙৰ বাটিত ছেকি পৃথককৈ ৰাখক। এই পানীত প্ৰাকৃতিক ষ্টাৰ্চ যথেষ্ট পৰিমাণে থাকে, যিয়ে খীৰক গাখীৰ নোহোৱাকৈয়েও গাঢ় আৰু ক্ৰীমী গঠন প্ৰদান কৰে। এতিয়া এই চাউলৰ পানীখিনি পুনৰ জুইত বহুৱাই মধ্যমীয়া আঁচত গৰম কৰক। ইয়াত সোৱাদ অনুসৰি চেনি বা গুড় মিহলাই দিয়ক।
মাজে মাজে লৰাই থাকিব যাতে পাত্ৰটোৰ তলিত নালাগে। কিছু সময়ৰ পিছত ষ্টাৰ্চৰ বাবে মিশ্ৰণটো স্বাভাৱিকভাৱে গাঢ় হ’বলৈ আৰম্ভ কৰিব। ইয়াৰ পিছত তাত অলপ ইলাচি গুড়ি দিয়ক, যিয়ে খীৰত এক মনোমোহা সুগন্ধি আনিব। তাৰপিছত আগতেই সিজোৱা চাউলৰ অলপ অংশ এই মিশ্ৰণত মিহলাই দিয়ক। ইচ্ছা কৰিলে কাজু, বাদাম, কিচমিচ, পিষ্টা আদি শুকান ফল কাটি যোগ কৰিব পাৰে আৰু কেইমিনিটমান ৰন্ধাৰ পিছতেই খীৰ সম্পূৰ্ণ প্ৰস্তুত হৈ যাব।
সোৱাদৰ লগতে সঞ্চয়ৰো এক উত্তম উপায়
এই খীৰ কেৱল সোৱাদযুক্তেই নহয়, ই এক কম খৰছী বিকল্পও। সাধাৰণতে বহুতে ভাতৰ উতলা পানী পেলাই দিয়ে, কিন্তু সেই পানীত থকা পুষ্টিকৰ ষ্টাৰ্চক ব্যৱহাৰ কৰি এখন সুস্বাদু খীৰ তৈয়াৰ কৰিব পাৰি।
খাদ্য অপচয় ৰোধ কৰাৰ লগতে কম খৰচতে সুস্বাদু খীৰ উপভোগ কৰাৰ এই পদ্ধতিটো নিশ্চয়েই বহু গৃহিণী আৰু খাদ্যপ্ৰেমীৰ বাবে আকৰ্ষণীয় হ’ব। গতিকে পৰৱৰ্তী সময়ত গাখীৰ কম থাকিলেও চিন্তা নকৰিব, চাউলৰ পানীৰে এই বিশেষ খীৰ এবাৰ চেষ্টা কৰি চাওক। হয়তো এই অভিনৱ ৰেচিপিয়েই আপোনাৰ পৰিয়ালৰ প্ৰিয় খীৰ হৈ পৰিব।
বিভিন্ন খাদ্য প্ৰকাৰণৰ তথ্যৰ সহায়ত এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
