দেশজুৰি চৰ্চিত পুনেৰ কেটন আগৰৱালা হ*ত্যাকাণ্ডৰ তদন্তত নিতৌ ন ন চাঞ্চল্যকৰ তথ্য পোহৰলৈ আহি আছে।। হ*ত্যাকাণ্ডৰ তদন্তকাৰী সংস্থাই শেহতীয়াকৈ সদৰী কৰা অনুসৰি অভিযুক্ত ছিয়া গোৱেলে বিয়াৰ প্ৰস্তুতি আৰু বজাৰ কৰাৰ নামত কেটন আগৰৱালাৰ পৰা প্ৰায় ১ কোটি টকা লৈছিল আৰু এই ধন ছিয়াই দিছিল প্ৰেমিক চেতন চৌধুৰীক। তদন্তকাৰী সংস্থাই সদৰী কৰা মতে ২০ বছৰীয়া ছিয়া গোৱেল আৰু ২২ বছৰীয়া চেতন চৌধুৰীয়ে বহু দিন পূৰ্বেই হ*ত্যাকাণ্ডৰ পৰিকল্পনা কৰিছিল। কেটনৰ মৃ*ত্যুৰ পিছত কি কৰিব সেই সমগ্ৰ ঘটনাৰো পৰিকল্পনা কৰিছিল দুই অভিযুক্তই। লগতে, ঘটনাৰ পিছত যাতে কোনো সন্দেহ সৃষ্টি নহয়, তাৰ বাবেও পূৰ্বতেই বিভিন্ন কৌশল ঠিক কৰি ৰাখিছিল।
তিনি বছৰ পিছত বিৱাহৰ পৰিকল্পনা
প্ৰেমিক চেতন চৌধুৰীৰ আৰ্থিক অৱস্থা সবল কৰা আৰু কেৰিয়াৰ গঢ়াৰ বাবে চেতনক কেটন আগৰৱালাৰ পৰা অনা ১ কোটি টকা দিছিল ছিয়াই। তদন্তত পোৱা তথ্য অনুসৰি চেতন চৌধুৰীয়ে ছিয়াক আৰ্থিক অৱস্থা সবল কৰিহে বিয়া কৰোৱাৰ পৰিকল্পনা কৰিছিল।
কেটনক হ*ত্যাৰ বেছ কিছু দিনলৈ ছিয়া আৰু চেতনে বিৱাহপাশত আৱদ্ধ নহোৱাৰো সিদ্ধান্ত লৈছিল, যাতে তেওঁলোকৰ সম্পৰ্ক সন্দেহৰ আওতালৈ নাহে। পৰিকল্পনা অনুসৰি কেতনৰ মৃ*ত্যুৰ কথা সকলোৱে ধীৰে ধীৰে পাহৰি যোৱাৰ পিছত আৰু চেতন আৰ্থিকভাৱে স্থিৰ হোৱাৰ লগে লগে দুয়ো বিৱাহ পাশত আৱদ্ধ হোৱাৰ পৰিকল্পনা ৰচিছিল
কেনেদৰে হ*ত্যাৰ পৰিকল্পনা কৰিছিল দুই অভিযুক্তই?
তদন্তকাৰী সংস্থাৰ মতে, ঘটনাৰ পূৰ্বে ছিয়া আৰু চেতনে এটা বিশেষ সংকেত ঠিক কৰি লৈছিল। পৰিকল্পনা অনুসৰি, ঘটনা সংঘটিত কৰাৰ সুযোগ পালেই ছিয়াই পানী খাবলৈ বা জোতাৰ ফিতা বান্ধি চেতনক সংকেত দিব। ছিয়াৰ পৰা এই সংকেত পোৱাৰ লগে লগেই চেতনে কেতন আগৰৱালাক পাহাৰৰ তললৈ ঠেলি দিব। দুই অভিযুক্তই কৰা এই পৰিকল্পনা মতে ১৮জুনত সংঘটিত কৰিছিল হ*ত্যাকাণ্ডটো। আৰক্ষী সূত্ৰ মতে, দুয়োৰে কল ডিটেইল ৰেকৰ্ড (CDR)তো প্ৰকাশ পাইছে কিছু গুৰুত্বপূৰ্ণ তথ্য। ঘটনাৰ প্ৰায় ৩৪ মিনিট পূৰ্বে ছিয়া আৰু চেতনৰ মাজত ফোনত কথা হৈছিল। তদন্তকাৰী সংস্থাই এই কথোপকথনক ঘটনাৰ পূৰ্বৰ অন্তিম যোগাযোগ হিচাপে বিবেচনা কৰি তদন্ত আগবঢ়াই আছে। তদন্তত এইটোও প্ৰকাশ পাইছে যে মে’ৰ শেষৰ ফালেই কেটন আগৰৱালাৰ হ*ত্যাৰ ষড়যন্ত্ৰ কৰা হৈছিল। আনহাতে, ১৪ জুনতো কেটনক হ*ত্যাৰ অপচেষ্টা চলোৱা হৈছিল বুলি অভিযোগ উঠিছে। ১৮ জুনৰ হ*ত্যাকাণ্ডৰ পূৰ্বেও প্ৰায় ৩ বাৰ কেটন আগৰৱালাক হ*ত্যাৰ অপচেষ্টা চলোৱা হৈছিল।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
