শুই থাকোঁতে মুখৰ পৰা লেলাৱতি ওলাই নেকি? জানক এয়া কিহৰ সংকেত?

বহু লোকৰ দৰে আপোনাৰো পুৱা শুই উঠাৰ পিছত গাৰু বা বিচনা চাদৰ লেলাৱতিৰে তিতি থাকে নেকি? যদি মাজে সময়ে আপোনাৰ এনেকুৱা হৈছে তেনেহ’লে সেয়া সাধাৰণ কথা কিন্তু যদি আপোনাৰ সঘনাই এনেকুৱা হৈছে তেন্তে এই সমস্যাটোক অৱহেলা কৰাটো উচিত নহ’ব। শিশুসকলৰ ক্ষেত্ৰত পেটত কৃমি থাকিলে মুখৰ পৰা এনেকৈ লেলাৱতি সঘনাই ওলাব পাৰে কিন্তু এজন প্ৰাপ্তবয়স্ক লোকৰ ক্ষেত্ৰত এনে সমস্যা সঘনাই দেখা দিলে ইয়াৰ আঁৰত থাকিব পাৰে বিভিন্ন কাৰণ।

চিকিৎসা বিশেষজ্ঞই কি কয়?

চিকিৎসা বিশেষজ্ঞৰ মতে অধিকাংশ লোকৰ ক্ষেত্ৰত এইটো সম্পূৰ্ণ স্বাভাৱিক। আমি শুই থাকোঁতে মুখ আৰু মুখমণ্ডলৰ পেশীবোৰ শিথিল হৈ পৰে। যদি কোনোবাই একাষৰীয়াকৈ বা পেট তলমুৱা হৈ শোৱে, তেন্তে সেই সময়ত লেলাৱতি ওলোৱাৰ কাৰণ হৈছে মুখত উৎপত্তি হোৱা লেলাৱতিবোৰ স্বাভাৱিকভাৱে গিলিব নোৱাৰাৰ বাবে মুখৰ পৰা লেলাৱতিবোৰ বাহিৰলৈ ওলাই আহিব পাৰে।

লেলাৱতি ওলোৱাটো কেতিয়া চিন্তাৰ বিষয় হিচাপে ধৰা হয়?

যদি আপোনাৰ আগতে কেতিয়াও এনে হোৱা নাছিল, কিন্তু হঠাতে মুখৰ পৰা বেছিকৈ আৰু অস্বাভাৱিকভাৱে লেলাৱতি ওলাবলৈ আৰম্ভ কৰে বা ইয়াৰ লগত আন উপসৰ্গও দেখা দিয়ে, তেন্তে বিষয়টো গুৰুত্ব সহকাৰে ল’ব লাগে। কেতিয়াবা ছৰ্দি বা এলাৰ্জিৰ বাবে নাক বন্ধ হৈ যায়। ফলত মানুহে মুখেৰে শ্বাস-প্ৰশ্বাস ল’বলৈ বাধ্য হয়, যাৰ ফলত মুখৰ পৰা লেলাৱতি ওলোৱাৰ আশংকা বৃদ্ধি পায়। আনহাতে, শ্লীপ এপনিয়া (Sleep Apnea) নামৰ সমস্যাৰ বাবেও এনে হ’ব পাৰে। এই অৱস্থাত শুই থাকোঁতে বাৰে বাৰে শ্বাস-প্ৰশ্বাস সাময়িকভাৱে বন্ধ হৈ যায়। তদুপৰি, খাদ্য গিলিবলৈ অসুবিধা, স্নায়ু বা পেশীৰ সমস্যাৰ ক্ষেত্ৰতো মুখৰ পৰা এনেকৈ লেলাৱতি ওলাব পাৰে।

কেতিয়া চিকিৎসকৰ পৰামৰ্শ ল’ব লাগে?

কেৱল মুখৰ পৰা লেলাৱতি ওলোৱাৰ বাবে ভয় খোৱাৰ প্ৰয়োজন নাই। কিন্তু কেইটামান বিশেষ লক্ষণ যদি একেলগে দেখা দিয়ে, তেন্তে চিকিৎসকৰ ওচৰলৈ যোৱাটো জৰুৰী। তেনে কিছুমান লক্ষণ হৈছে অত্যাধিকভাৱে নাকৰ মাত ওলোৱা, শুই থাকোঁতে শ্বাস বন্ধ হোৱা বা হঠাতে সাৰ পোৱা, খাদ্য গিলিবলৈ অসুবিধা হোৱা, কথা কোৱাৰ ধৰণত পৰিৱৰ্তন অহা, শৰীৰত অস্বাভাৱিক দুৰ্বলতা অনুভৱ কৰা।

কি কি সাৱধানতা অৱলম্বন কৰিব?

যদি এনে হয়, তেন্তে নাকৰ সমস্যা বা এলাৰ্জিৰ উপযুক্ত চিকিৎসা কৰক। শোৱাৰ ভংগী সলনি কৰি চাওক। চিত হৈ শোৱাৰ অভ্যাস কৰিলে উপকাৰ পাব পাৰে। মুখ আৰু দাঁতৰ পৰিচ্ছন্নতাৰ প্ৰতি বিশেষ গুৰুত্ব দিয়ক। যদি সমস্যা বাৰে বাৰে হয় বা দৈনন্দিন জীৱনত অসুবিধাৰ সৃষ্টি কৰে, তেন্তে সঠিক কাৰণ নিৰ্ণয়ৰ বাবে চিকিৎসকৰ পৰামৰ্শ লওক। মাজে-মধ্যে শুই থাকোঁতে মুখৰ পৰা লেলাৱতি ওলোৱাটো সাধাৰণ ঘটনা হ’ব পাৰে। কিন্তু যদি এই সমস্যা নিয়মীয়াকৈ হয় বা আন উপসৰ্গৰ সৈতে দেখা দিয়ে, তেন্তে সময়মতে চিকিৎসকৰ পৰামৰ্শ লোৱাটোৱেই উত্তম।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ