ইউৰোপত অব্যাহত থকা ভয়ংকৰ গ্ৰীষ্ম প্ৰৱাহে এক জটিল পৰিস্থিতিৰ সৃষ্টি কৰিছে। পশ্চিম ইউৰোপত আৰম্ভ হোৱা গ্ৰীষ্ম প্ৰৱাহে এতিয়া মধ্য, দক্ষিণ আৰু পূব ইউৰোপলৈ বিয়পি পৰিছে। হাংগেৰী, ৰোমানিয়া, ছাৰ্বিয়া, ক্ৰোৱেচিয়া, পোলেণ্ড, জাৰ্মানী, ইটালী, চেক গণৰাজ্য আদি দেশৰ বহু অঞ্চলত তাপমাত্ৰা ৪০ ডিগ্ৰী চেলচিয়াছ বা তাতোকৈ অধিক ৰেকৰ্ড কৰা হৈছে। এই ভয়ংকৰ পৰিস্থিতিৰ বাবে বিভিন্ন দেশৰ চৰকাৰে ৰেড এলাৰ্ট জাৰি কৰিছে। বিদ্যালয় বন্ধ ৰখা, বৃদ্ধ আৰু শিশুসকলক বিশেষ সতৰ্কতা অৱলম্বন কৰিবলৈ আহ্বান জনোৱা, শীতল আশ্ৰয়কেন্দ্ৰ (Cooling Centres) খোলা, জৰুৰীকালীন চিকিৎসা সেৱা আদি বিভিন্ন ব্যৱস্থা গ্ৰহণ কৰা হৈছে।
এই পৰ্যন্ত ১৩০০তকৈও অধিক লোকৰ মৃ*ত্যু
বিশ্ব স্বাস্থ্য সংস্থা (WHO)ই প্ৰকাশ কৰা তথ্য অনুসৰি, ২১ জুনৰ পৰা এতিয়ালৈ ইউৰোপত ১,৩০০তকৈও অধিক লোকে গ্ৰীষ্ম প্ৰৱাহৰ বাবে মৃ*ত্যু মুখত পৰিছে। কেৱল ফ্ৰান্সতেই এক হাজাৰতকৈ অধিক লোকৰ মৃ*ত্যুৰ তথ্য পোৱা গৈছে। বিশেষকৈ ৬৫ বছৰৰ ঊৰ্ধ্বৰ ব্যক্তি, হৃদৰোগী, শ্বাস-প্ৰশ্বাসজনিত সমস্যাত ভোগা লোক আৰু শিশুসকল আটাইতকৈ বেছি বিপদত পৰিছে। জলবায়ু বিজ্ঞানীসকলৰ মতে, এই প্ৰচণ্ড গৰমৰ অন্যতম কাৰণ হৈছে “হিট ড’ম” (Heat Dome) নামৰ এক বিশেষ বায়ুমণ্ডলীয় অৱস্থা। ইয়াৰ ফলত উত্তৰ আফ্ৰিকাৰ পৰা অহা উষ্ণ বায়ু ইউৰোপৰ বায়ুমণ্ডলৰ ওপৰত আবদ্ধ হৈ থাকে আৰু দীৰ্ঘ সময় ধৰি বৰষুণ বা শীতল বতাহ সেই অঞ্চলত প্ৰৱেশ কৰিব নোৱাৰে। ফলস্বৰূপে তাপমাত্ৰা অসাধাৰণভাৱে বৃদ্ধি পায়।
ভৱিষ্যৎ জলবায়ু সলনিৰ দিশে ইউৰোপ!
ইউৰোপত চলি থকা গ্ৰীষ্ম প্ৰৱাহক লৈ WHO-ৰ ইউৰোপীয় আঞ্চলিক সঞ্চালক ডাঃ হান্স হেনৰি ক্লুগে সতর্ক কৰি কৈছে যে-‘বৰ্তমানৰ এই গ্ৰীষ্ম প্ৰৱাহ ভৱিষ্যতৰ গ্ৰীষ্মকালৰ এক পূৰ্বাভাসহে।’ তেওঁৰ মতে, ইউৰোপ বিশ্বৰ আটাইতকৈ দ্ৰুতগতিত উষ্ণ হৈ থকা মহাদেশ আৰু জলবায়ু পৰিৱৰ্তনৰ ফলত এনে চূড়ান্ত গ্ৰীষ্ম প্ৰৱাহ এতিয়া লাহে লাহে ইউৰোপৰ জলবায়ুৰ বাবে চিনাকি আৰু নিয়মিত ঘটনাত পৰিণত হ’ব।
ইউৰোপিয়নসকলে কিয় সহ্য কৰিব পৰা নাই গ্ৰীষ্ম প্ৰৱাহ?
জলবায়ু বিশেষজ্ঞসকলৰ মতে ইউৰোপৰ প্ৰায় সকলো অঞ্চলৰে অধিকাংশ ঘৰ, বিদ্যালয়, কাৰ্যালয় আৰু নগৰীয়া আন্তঃগাঁথনি মূলতঃ শীত কালৰ বাবে নিৰ্মাণ কৰা হৈছিল। সেইবাবে বহু ঠাইত শীততাপ নিয়ন্ত্ৰণ (Air Conditioning)ৰ ব্যৱস্থা সীমিত, যাৰ ফলত অত্যধিক গৰমৰ সৈতে মোকাবিলা কৰাটো অধিক কঠিন হৈ পৰিছে। বিগত মে’ত জাৰ্মানীত ৩৭% বৃদ্ধি পাইছে AC বিক্ৰীৰ হাৰ। আনহাতে স্পেইন-ফ্ৰান্স, ইটালীৰ দৰে দেশত প্ৰায় দুগুণলৈ চাহিদা বাঢ়িছে এয়াৰ কণ্ডিচনাৰৰ। জলবায়ু বিশেষজ্ঞসকলে এই ঘটনাক সমগ্ৰ বিশ্বৰ বাবে এক গুৰুত্বপূৰ্ণ সতৰ্কবাণী বুলি অভিহিত কৰিছে। তেওঁলোকৰ মতে, যদি সেউজ গৃহ গেছ নিৰ্গমন নিয়ন্ত্ৰণ আৰু জলবায়ু পৰিৱৰ্তন ৰোধৰ বাবে অধিক শক্তিশালী পদক্ষেপ গ্ৰহণ কৰা নহয়, তেন্তে ভৱিষ্যতে ইয়াতকৈও অধিক ভয়ংকৰ, দীঘলীয়া গ্ৰীষ্ম প্ৰৱাহৰ সন্মুখীন হ’ব লাগিব সমগ্ৰ ইউৰোপবাসী।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
