হিন্দীত এষাৰ কথা আছে, ‘ভগৱান জব কিছিকো দেত্যা হ্যেয় তো চপ্পৰ ফাৰ ক্যে দ্যেতা হ্যেয়’। সঁচাকৈয়ে ভগৱানে যাক দিয়ে উচপায় দিয়ে। এই কথাষাৰ এটা আদিবাসী পৰিয়ালৰ ক্ষেত্ৰত একেবাৰে হুবহু মিলিছে। এবাৰ নহয় দুবাৰকৈ সৌভাগ্যৰ গৰাকী হৈছে এই পৰিয়ালটো। দুবছৰৰ ভিতৰতে দুবাৰকৈ আদিবাসী এই পৰিয়ালটোৱে লাভ কৰিছে কেইবালাখ টকীয়া মূল্যৰ শুদ্ধ হীৰাৰ টুকুৰা। মধ্যপ্ৰদেশৰ পন্না জিলাৰ এটা আদিবাসী পৰিয়ালৰ ক্ষেত্ৰত ঘটিছে এই সৌভাগ্যজনক ঘটনা। হীৰাৰ বাবে বিশ্বখ্যাত মধ্যপ্ৰদেশৰ পন্নাৰ ৰত্নগৰ্ভাৰ মাটিয়ে এই পৰিয়ালটোক দুবাৰকৈ এই অমূল্য উপহাৰ দিছে। সোমবাৰে মধ্যপ্ৰদেশৰ পন্না জিলাৰ অহিৰগৱা অঞ্চলৰ এটা খনিত ৰাকেশ গৌড় আৰু তেওঁৰ পৰিয়ালৰ হাতলৈ আহে ১১.১৯ কেৰেট ওজনৰ এক উজ্জ্বল (Gem Quality) হীৰাৰ টুকুৰা। বিশেষজ্ঞসকলৰ মতে, এই হীৰাৰ টুকুৰাটোৰ সম্ভাৱ্য মূল্য প্ৰায় ৩০ লাখ টকা। হীৰাৰ টুকুৰাটো উদ্ধাৰ হোৱাৰ লগে লগে পৰিয়ালটোৰ লগতে খনিত কাম কৰা অংশীদাৰীসকলৰ মাজত আনন্দৰ জোৱাৰ উঠে।
দুবছৰৰ ভিতৰত দ্বিতীয়বাৰৰ বাবে সফলতা
ৰাকেশ গৌড়ে চলিত বৰ্ষৰ এপ্ৰিলত ভাতৃ-ভগ্নী আৰু আত্মীয়-স্বজনৰ সৈতে অহিৰগৱাৰ ব্যক্তিগত ভূমিত চৰকাৰী অনুমতি (পট্টা) লৈ হীৰা সন্ধানৰ বাবে খনন আৰম্ভ কৰিছিল। প্ৰায় দুমাহ ধৰি অক্লান্ত পৰিশ্ৰম কৰাৰ পিছত অৱশেষত তেওঁলোকৰ কষ্টই ফল দিয়ে আৰু এই মূল্যৱান হীৰাটো উলিয়াবলৈলৈ সক্ষম হয়।
উল্লেখযোগ্য ঘটনাটো হৈছে এয়া পৰিয়ালটোৰ প্ৰথম সফলতা নহয়। ২০২৪ চনতো ৰকেশ গৌড়ে ১৯.২২ কেৰেট ওজনৰ আন এটা মূল্যৱান হীৰাৰ টুকুৰা লাভ কৰিছিল। সেই হীৰাৰ টুকুৰাটো চৰকাৰী নিলামত ৯৩ লাখ টকাত বিক্ৰী হৈছিল। দুবাৰকৈ ইমান বৃহৎ সফলতা লাভৰ পিছত আৰু অধিক উৎসাহিত হৈ পৰিছে ৰাকেশ গৌড়। ৰাকেশ গৌড়ে অনাগত দিনত হীৰা সন্ধানৰ বাবে আৰু অধিক কষ্ট কৰিব বুলি মন্তব্য কৰে। ৰাকেশ গৌড়ে জনোৱা মতে, এইবাৰ হীৰা বিক্ৰী কৰি পোৱা ধন তেওঁলোকে নতুনকৈ খনি খোলাৰ কামত বিনিয়োগ কৰিব। তেওঁৰ বিশ্বাস, পৰিশ্ৰম আৰু ধৈৰ্য থাকিলে ভাগ্য এদিন নহয় এদিন নিশ্চয় সকলোকে সহায় কৰে।
কেতিয়া ৰাকেশ গৌড়ে পাব ধন?
সোমবাৰে খননৰ জৰিয়তে পোৱা হীৰাৰ টুকুৰাটো যুটীয়া আয়ুক্তৰ কাৰ্যালয়ত অৱস্থিত হীৰাৰ কাৰ্যালয়ত উপস্থিত হৈ নিৰ্ধাৰিত নিয়ম অনুসৰি জমা দিয়া হয়। যিহেতু মধ্যপ্ৰদেশৰ পন্না জিলা হীৰাৰ বাবে বিখ্যাত সেয়েহে তাত হীৰাৰ বাবেও আছে এটা বিশেষ বিভাগ। খনি বিভাগৰ তথ্য অনুসৰি আগন্তুক চৰকাৰী নিলামত এই হীৰাৰ টুকুৰাটো বিক্ৰীৰ বাবে ৰখা হ’ব। নিলামৰ পিছত বাকী থকা ধনৰাশি—চৰকাৰে নিৰ্ধাৰিত ৰয়েল্টি কৰ্তন কৰাৰ পিছত ৰাকেশ গৌড়ক। খনি পৰিদৰ্শকে দিয়া তথ্য অনুসৰি নতুনকৈ পোৱা হীৰাৰ টুকুৰাটো উৎকৃষ্ট মানৰ গতিকে ইয়াৰ আনুমানিক মূল্য ₹৪০ লাখৰ পৰা ৫০ লাখৰ ভিতৰত মূল্যায়ন কৰা হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
