কোন হ’ব ভাৰতৰ পৰৱৰ্তী কেন্দ্ৰীয় শিক্ষামন্ত্ৰী?

NEET প্ৰশ্নকাকত ফাদিলৰ বিৰুদ্ধে দুমাহজোৰা প্ৰতিবাদী কাৰ্যসূচীৰ সমুখত শিৰনত হৈ অৱশেষত ধৰ্মেন্দ্ৰ প্ৰধানে পদত্যাগ কৰিবলৈ বাধ্য হল। ধৰ্মেন্দ্ৰ প্ৰধানৰ পদত্যাগৰ লগে লগে সম্প্ৰতি এটা তাৎক্ষণিক প্ৰশ্নৰ উন্মেষ ঘটিছে যে পৰৱৰ্তী সময়ত চৰকাৰৰ এই অন্যতম ৰাজনৈতিক স্পৰ্শকাতৰ বিভাগটোৰ দায়িত্ব কাক অৰ্পণ কৰা হ’ব? দেশৰ পৰৱৰ্তী শিক্ষামন্ত্ৰীৰ দায়িত্বৰ বাবে ৰাজনৈতিক মহলত আলোচনা হোৱা আটাইতকৈ বেছি চৰ্চিত নামকেইটা হৈছে সুকান্ত মজুমদাৰ, জয়ন্ত চৌধুৰী আৰু ৰাঘৱ চাড্ডা ।

বিজেপি শিবিৰৰ ভিতৰত প্ৰশাসনিকভাৱে আটাইতকৈ যুক্তিসংগত নামটো হৈছে সুকান্ত মজুমদাৰ। ইতিমধ্যে তেওঁ শিক্ষা বিভাগৰ ৰাজ্যিক মন্ত্ৰী হিচাপে কাৰ্যনিৰ্বাহ কৰি আছে, যাৰ ফলত তেওঁ মন্ত্ৰালয়ৰ ফাইল, পৰীক্ষা সম্পৰ্কীয় বিষয় আৰু দৈনন্দিন কাম-কাজৰ সৈতে পৰিচিতি লাভ কৰিছে। তেওঁ দলটোৰ বাবে ৰাজনৈতিক মূল্যও কঢ়িয়াই আনে। পশ্চিমবংগৰ বালুৰঘাট সমষ্টিৰ পৰা জয়ী হৈ দিল্লীলৈ যোৱা সুকান্ত মজুমদাৰক শিক্ষাবিভাগৰ পূৰ্ণাংগ দায়িত্ব অৰ্পণৰ জৰিয়তে বিজেপিয়ে পশ্চিমবংগৰ ৰাজনীতিত নিজৰ পদাংক আৰু অধিক শক্তিশালী কৰিব পাৰে। বিশেষকৈ যি সময়ত চৰকাৰে ব্যাঘাতৰ পৰিৱৰ্তে স্থিতিশীলতা দেখুৱাব বিচাৰিব পাৰে, সেই সময়ত মজুমদাৰৰ পদোন্নতিয়ে ধাৰাবাহিকতাৰ সংকেত দিব।

শিক্ষা বিভাগটোত কাম কৰাৰ অভিজ্ঞতা সুকান্ত মজুমদাৰৰ বেছি থাকিলেও ৰাজনীতিত এৰি অহা সময়তকৈ আহি থকা সময়ৰ গুৰুত্ব বেছি। গতিকে সদ্যসমাপ্ত পশ্চিমবংগ নিৰ্বাচনতকৈ আগন্তুক পাঞ্জাব বিধানসভা নিৰ্বাচনৰ প্ৰতি অধিক গুৰুত্ব দিয়াটোৱেই বিজেপিৰ লক্ষ্য হব। গতিকে এই কাৰণতেই শেষমুহূৰ্তত সুকান্ত মজুমদাৰতৰ তুলনাত শেষ বাজি ৰাঘৱ চাড্ডায়ো মাৰিব পাৰে। অৱশ্যে ৰাঘৱ চাড্ডাৰ বিভাগ এটা পৰিচালনা কৰাৰ তেনে কোনো অভিজ্ঞতা নাই, সেয়েহে আগন্তুক পাঞ্জাব নিৰ্বাচনৰ প্ৰতি লক্ষ্য ৰাখি সুকান্ত মুজমদাৰক পদোন্নতি দি ৰাঘৱ চাড্ডাক মজুমদাৰৰ সহযোগী হিচাপে অৰ্থাৎ শিক্ষা বিভাগৰ কেন্দ্ৰীয় ৰাজ্যিক মন্ত্ৰিত্বৰো দায়িত্ব দিয়া হব পাৰে।

উপৰিউক্ত এই দুটা নামৰ উপৰিও আন এটা নাম হব পাৰে জয়ন্ত চৌধাৰী। কাৰণ তেওঁ ইতিমধ্যে ৰাজ্যিক মন্ত্ৰী হিচাপে শিক্ষাৰ দায়িত্বত আছে আৰু লগতে দক্ষতা বিকাশ আৰু উদ্যোগীকৰণৰ স্বতন্ত্ৰ দায়িত্বতো আছে। কিন্তু চৌধাৰীক শীৰ্ষ পদলৈ স্থানান্তৰিত কৰিলে শিক্ষা মন্ত্ৰালয়টো বিজেপিৰ বাহিৰলৈ যাব। শেহতীয়াকৈ কলংকিত হৈ পৰা বিভাগটোৰ ক্ষেত্ৰত বিজেপিয়ে এই ৰিক্স নোলোৱাৰ সম্ভাৱনাকো নুই কৰিব নোৱাৰি। অৱশ্যে শিক্ষাবিভাগৰ দায়িত্ব তাৎক্ষণিকভাৱে কাৰোবাৰ হাতলৈ অৰ্পণ কৰে নে তাৰ বাবে কিছু সময় লৈ সম্পূৰ্ণ সংশোধন প্ৰক্ৰিয়াৰ মাজেৰে সিদ্ধান্ত গ্ৰহণ কৰে সেয়া সময়তহে দেখা যাব।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ