স্কুলীয়া কিশোৰ-কিশোৰীসকল দেশৰ ভৱিষ্যৎ। কিন্তু শেহতীয়াকৈ প্ৰকাশ পোৱা এক সমীক্ষাই অভিভাৱক আৰু শিক্ষক—উভয়ৰে উদ্বেগ বহুগুণে বৃদ্ধি কৰিছে। কৈশোৰকাল এনে এক সংবেদনশীল সময়, যেতিয়া সঠিক দিশ-নিৰ্দেশনা আৰু যত্নৰ অভাৱত সন্তানসকল সহজেই কুসংগ, ভুল অভ্যাস আৰু মাদকাসক্তিৰ দৰে বিপজ্জনক পথলৈ ঢাল খাই পৰিব পাৰে। শেহতীয়া এই গৱেষণাই সেয়াই স্পষ্ট কৰি দিছে যে, কিশোৰ-কিশোৰীসকলেই মাদকদ্ৰব্য ব্যৱহাৰৰ ক্ষেত্ৰত আটাইতকৈ অধিক বিপদাশংকাপূৰ্ণ গোটত পৰে।
১০৮খন বিদ্যালয়ৰ ৬ হাজাৰতকৈ অধিক শিক্ষাৰ্থীৰ ওপৰত সমীক্ষা
শেহতীয়াকৈ ১০৮খন বিদ্যালয়ৰ ৬,০০০ৰো অধিক কিশোৰ-কিশোৰীৰ ওপৰত চলোৱা এক সমীক্ষাত এক উদ্বেগজনক ছবি পোহৰলৈ আহিছে। গৱেষণাখনত দেখা গৈছে যে, প্ৰতি পাঁচজন কিশোৰ-কিশোৰীৰ ভিতৰত এজনৰ মাদকদ্ৰব্য ব্যৱহাৰৰ প্ৰৱণতা মধ্যম বা উচ্চ বিপদাশংকাৰ পৰ্যায়ত থাকিব পাৰে। এই গৱেষণা বিশ্বখ্যাত চিকিৎসা সাময়িকী ‘দ্য ল্যানচেট ৰিজিঅ’নেল হেল্থ–ছাউথইষ্ট এছিয়া’ত প্ৰকাশ পাইছে।
অসমকে ধৰি কেইবাখনো ৰাজ্যৰ তথ্য অন্তৰ্ভুক্ত
সমীক্ষাখনত উত্তৰ প্ৰদেশৰ গোৰখপুৰ, অসমৰ কামৰূপ, মহাৰাষ্ট্ৰৰ নাগপুৰ, গুজৰাটৰ ৰাজকোট, ঝাৰখণ্ডৰ দেৱঘৰ আৰু পুডুচেৰীৰ চৰকাৰী আৰু বেচৰকাৰী বিদ্যালয়সমূহৰ শিক্ষাৰ্থীক সামৰি লোৱা হৈছিল। সমীক্ষাৰ ফলাফল অনুসৰি, ২১.৪ শতাংশ কিশোৰ-কিশোৰীক মাদকদ্ৰব্য ব্যৱহাৰৰ ক্ষেত্ৰত মধ্যম (১০.৩%) অথবা উচ্চ (১১.১%) বিপদাশংকাপূৰ্ণ শ্ৰেণীত ৰখা হৈছে। বিশেষকৈ গুৱাহাটী (কামৰূপ) আৰু দেৱঘৰৰ বিদ্যালয়সমূহত উচ্চ বিপদাশংকাপূৰ্ণ কিশোৰ-কিশোৰীৰ অনুপাত অধিক দেখা গৈছে। আনহাতে, নাগপুৰ আৰু পুডুচেৰীত তুলনামূলকভাৱে কম বিপদাশংকাপূৰ্ণ শিক্ষাৰ্থীৰ সংখ্যা বেছি। গৱেষকসকলে এই মূল্যায়নৰ বাবে বিশ্ব স্বাস্থ্য সংস্থা (WHO)ৰ মান্যতাপ্ৰাপ্ত স্ক্ৰিনিং টেষ্ট ব্যৱহাৰ কৰিছে।
অত্যাধিক ডিজিটেল এক্সপ’জাৰেই মূল কাৰণ
এই গৱেষণাই কেৱল মাদকদ্ৰব্য ব্যৱহাৰৰ বিপদাশংকাৰ কথাই উল্লেখ কৰা নাই, ইয়াৰ আঁৰৰ কাৰণসমূহো বিশদভাৱে বিশ্লেষণ কৰিছে। গৱেষণাৰ মতে, কিশোৰ-কিশোৰীৰ মাজত অত্যাধিক ডিজিটেল এক্সপ’জাৰ আৰু মাদকদ্ৰব্য সহজলভ্য হোৱাই এই সমস্যাৰ অন্যতম মুখ্য কাৰণ। গৱেষকসকলে মত প্ৰকাশ কৰিছে যে, এই সমস্যাক নিয়ন্ত্ৰণ কৰিবলৈ কেৱল বিদ্যালয় বা পৰিয়ালৰ উদ্যোগ যথেষ্ট নহ’ব। ইয়াৰ বাবে সমাজভিত্তিক সজাগতা, সহপাঠী-নেতৃত্বাধীন (Peer-led) কাৰ্যসূচী, অভিভাৱকৰ সক্ৰিয় ভূমিকা আৰু বিদ্যালয়ভিত্তিক পৰামৰ্শমূলক ব্যৱস্থাকে ধৰি বহুমুখী হস্তক্ষেপৰ প্ৰয়োজন।
বিশেষজ্ঞসকলৰ মতে, সন্তানক মোবাইল, ইণ্টাৰনেট আৰু সামাজিক মাধ্যমৰ ক্ষেত্ৰত সম্পূৰ্ণ স্বাধীনতা দিয়াৰ পৰিৱৰ্তে অভিভাৱকে নিয়মীয়া তদাৰক, খোলামেলা যোগাযোগ আৰু মানসিক সমৰ্থন নিশ্চিত কৰাটো অতি প্ৰয়োজনীয়। সময়মতে সচেতনতা আৰু সঠিক দিশ-নিৰ্দেশনাই কিশোৰ-কিশোৰীসকলক মাদকাসক্তিৰ দৰে ভয়ংকৰ বিপদৰ পৰা ৰক্ষা কৰিব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
