সাম্প্ৰতিক সময়ত ছচিয়েল মিডিয়াত দিল্লীৰ প্ৰণতি নামৰ এগৰাকী যুৱতীৰ এটা ভিডিঅ’ ব্যাপকভাৱে ভাইৰেল হৈছে। এই ভিডিঅ’টোত তেওঁ এক গুৰুত্বপূৰ্ণ প্ৰশ্ন উত্থাপন কৰিছে—যেতিয়া অভিভাৱকে কন্যাৰ বিয়াৰ বাবে প্ৰায় ৫০ লাখ টকা কেৱল ২-৩ দিনীয়া অনুষ্ঠানত ব্যয় কৰিবলৈ সাজু, তেন্তে সেই একেই ধন যদি কন্যাৰ ভৱিষ্যৎ, শিক্ষা, ব্যৱসায়, ঘৰ ক্ৰয় বা আৰ্থিক সুৰক্ষাৰ বাবে বিনিয়োগ কৰা হয়, তেন্তে সেয়া অধিক যুক্তিসংগত নহ’বনে?
প্ৰণতিৰ এই বক্তব্যই মুহূৰ্ততে লাখ লাখ লোকৰ দৃষ্টি আকৰ্ষণ কৰিছে। কোনোৱে তেওঁক আধুনিক চিন্তাধাৰাৰ প্ৰতিনিধি বুলি অভিহিত কৰিছে, আনহাতে বহুতে এই মতামতক ভাৰতীয় পৰম্পৰা আৰু পাৰিবাৰিক মূল্যবোধৰ বিপৰীত বুলিও সমালোচনা কৰিছে। ফলস্বৰূপে ছচিয়েল মিডিয়াত এই বিষয়ক কেন্দ্ৰ কৰি তীব্ৰ বিতৰ্কৰ সৃষ্টি হৈছে।
ভিডিঅ’টোত প্ৰণতিয়ে কয় যে-বিয়া জীৱনৰ এটা বিশেষ মুহূৰ্ত হ’লেও ইয়াৰ বাবে অতিৰিক্ত ধন ব্যয় কৰাটো সদায় বুদ্ধিমান সিদ্ধান্ত নহ’বও পাৰে। তেওঁৰ মতে, যদি ৫০ লাখ টকা সুপৰিকল্পিতভাৱে মিউচুৱেল ফাণ্ড, ফিক্সড ডিপজিট, সম্পত্তি, ব্যৱসায় বা আন কোনো দীৰ্ঘম্যাদী বিনিয়োগত লগোৱা হয়, তেন্তে সেই ধনে আগন্তুক বছৰবোৰত বহুগুণ বৃদ্ধি পাব পাৰে আৰু কন্যাৰ আৰ্থিক স্বাধীনতা নিশ্চিত কৰিব পাৰে। তেওঁৰ যুক্তি হৈছে—এটা বিয়াৰ অনুষ্ঠান কেইদিনমানৰ বাবেহে থাকে, কিন্তু সঠিক বিনিয়োগে আজীৱন উপকাৰ আগবঢ়াব পাৰে।
বহু নেটিজেনে প্ৰণতিৰ মতামতক বাস্তৱসন্মত আৰু সময়োপযোগী বুলি মন্তব্য কৰিছে। তেওঁলোকৰ মতে, বৰ্তমান সময়ত শিক্ষা, চিকিৎসা, ঘৰ ক্ৰয় আৰু জীৱনযাত্ৰাৰ ব্যয় বহুগুণে বৃদ্ধি পাইছে। এনে পৰিস্থিতিত লাখ লাখ টকা কেৱল আড়ম্বৰপূৰ্ণ অনুষ্ঠানত ব্যয় কৰাৰ পৰিৱৰ্তে সেই ধন ভৱিষ্যতৰ বাবে সঞ্চয় বা বিনিয়োগ কৰাটো অধিক বিচক্ষণ পদক্ষেপ। কিছুমানে এইটোও কয় যে, বৰ্তমান প্ৰজন্মৰ বহু যুৱক-যুৱতীয়ে আঢ়ম্বৰপূৰ্ণ বিয়াৰ সলনি সৰু, সৰল আৰু ব্যক্তিগত অনুষ্ঠানক অগ্ৰাধিকাৰ দিব বিচাৰে।
অৱশ্যে, প্ৰণতিৰ এই মতামতৰ বহুতে বিৰোধিতাও কৰিছে। বহুতে যুক্তি দিছে যে ভাৰতীয় সমাজত বিয়া কেৱল দুজন ব্যক্তিৰ মিলন নহয়; ই দুটা পৰিয়ালৰ সাংস্কৃতিক আৰু সামাজিক উৎসৱ। বহু অভিভাৱকৰ বাবে সন্তানৰ বিয়া জীৱনৰ এক সপোন, যাৰ বাবে তেওঁলোকে বছৰ বছৰ ধৰি সঞ্চয় কৰে। সমালোচকসকলৰ মতে, যদি পৰিয়ালৰ আৰ্থিক সামৰ্থ্য থাকে, তেন্তে বিয়াত ব্যয় কৰাটো সম্পূৰ্ণ ব্যক্তিগত সিদ্ধান্ত। সেয়েহে ইয়াক কেৱল আৰ্থিক দৃষ্টিভংগীৰে বিচাৰিব নালাগে।
প্ৰণতিৰ ভাইৰেল ভিডিঅ’টোৱে এটা স্পষ্ট বাৰ্তা আগবঢ়াইছে—বিয়াৰ ব্যয় আৰু ভৱিষ্যতৰ বিনিয়োগৰ মাজত ভাৰসাম্য ৰক্ষা কৰাটো আজিৰ সময়ৰ এক গুৰুত্বপূৰ্ণ আলোচ্য বিষয়। ইয়াৰ কোনো একক সঠিক উত্তৰ নাই, কাৰণ প্ৰতিটো পৰিয়ালৰ আৰ্থিক অৱস্থা, মূল্যবোধ আৰু অগ্ৰাধিকাৰ বেলেগ বেলেগ। শেষত ক’ব পাৰি, বিয়া স্মৰণীয় হোৱাটো নিশ্চয়ই প্ৰয়োজনীয়, কিন্তু সেই আনন্দৰ লগতে ভৱিষ্যতৰ আৰ্থিক সুৰক্ষাৰ কথাও সমানে বিবেচনা কৰিলে সিদ্ধান্তটো অধিক সুদূৰপ্ৰসাৰী আৰু ফলপ্ৰসূ হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
