APLত আজি অনুষ্ঠিত হোৱা ২১ সংখ্যক মেচখনে অসমত ক্ৰিকেটৰ বিকাশৰ ক্ষেত্ৰত নতুন আশাৰ সঞ্চাৰ আনিব বুলি ধাৰণা কৰিব পাৰি। অৱশ্যে বিশ্বমানৰতো বাদেই ভাৰতৰ অন্য ৰাজ্যৰ ক্ৰিকেটৰ তুলনাত অসম এতিয়াও বহু পিছুৱাই আছে। আজি অসম প্ৰীমিয়াৰ লীগৰ চৰাইদেউ ছানৰাইজাৰ্ছ আৰু গুৱাহাটী ৰয়েলছৰ মাজত অনুষ্ঠিত মেচখনতে অসম প্ৰীমিয়াৰ লীগৰ ক্ষুদ্ৰ ইতিহাসৰ ৫ টাকৈ মাইলষ্টন স্পৰ্শ কৰিবলগৈ সক্ষম হয়। মেচখনে APLৰ ইতিহাসৰ প্ৰথমটো শতকীয় ইনিংছ, প্ৰথমবাৰৰ বাবে ২০০ ৰানৰ দলীয় স্কৰ স্পৰ্শ, দ্ৰুততম অৰ্ধশতক, পাৱাৰপ্লেত সৰ্বাধিক ৰান আৰু সৰ্বাধিক ৰান chaseৰ দৰে ৰেকৰ্ড গঢ়িবলৈ সক্ষম হয়।
APLৰ ইতিহাসত চৰাইদেউ ছানৰাইৰাৰ্ছৰ উইকেটকীপাৰ বেটাৰ তথা অধিনায়ক সুমিত ঘাড়িগাঁওকাৰৰ নামটো জিলিকি থাকিব। কিয়নো আজি অসম প্ৰীমিয়াৰ লীগৰ প্ৰথমটো শতকৰ গৰাকী হয় সুমিত। সুমিতে গুৱাহাটী ৰয়েলছৰ বিৰুদ্ধে ৬৪ টা বলত ১০৭ ৰান সংগ্ৰহ কৰে। চৰাইদেউ ছানৰাইৰ্ছে প্ৰথমে বেটিং কৰি নিৰ্ধাৰিত ২০ অভাৰত দুটা উইকেটৰ বিনিময়ত সংগ্ৰহ কৰে ২০৮ ৰান। অসম প্ৰীমিয়াৰ লীগত কোনো দলে ২০০ ৰানৰ মাইলষ্টন স্পৰ্শ কৰা এয়াই আছিল প্ৰথম। ক্ৰিকেটৰ খবৰ ৰখাসকলৰ মতে নিঃসন্দেহে অসম গৌৰৱ ৰিয়ানৰ অনুপস্থিতিত সুমিত ঘাড়িগাঁওকাৰৰ ওপৰতে অনুৰাগীৰ আছিল সেই আশা। অৱশ্যে কিছুদিন আগতে বৰাক লিজেণ্ডছৰ বিৰুদ্ধে যোৰহাট ষ্টেলিয়নছৰ হৈ অসমৰ আন এজন অলৰাউণ্ডাৰ স্বৰূপম পুৰকায়স্থই কোবাইছিল অপৰাজিত ৯৯ ৰানৰ ইনিংছ।
ইপিনে APLৰ ক্ষেত্ৰত তুলনামূলকভাৱে ২০৯ ৰানৰ বৃহৎ লক্ষ্য আগত লৈ ক্ৰিজলৈ অহা গুৱাহাটী ৰয়েলছে বিস্ফোৰক আৰম্ভণিৰে প্ৰথমৰ পৰাই চৰাইদেউ ছানৰাইজাৰ্ছক চাপত ৰাখে। গুৱাহাটী ৰয়েলছে Powerplayৰ ভিৰতৰতে ২ উইকেট হেৰুৱাই ১০০ ৰানৰ সীমা স্পৰ্শ কৰে। APLত এয়া এই পৰ্যন্ত দ্ৰুততম powerplayৰ স্ক’ৰ। গুৱাহাটী ৰয়েলছৰ অপেনাৰ হৈ ৰোহিত সেনে মাৰমুখী বেটিঙেৰে মাত্ৰ ৩৮ বলতেই ১০টা ছিক্সাৰ আৰু ৫টা চাৰিৰ সহায়ত ৯৬ ৰানৰ ইনিংছ খেলে। এসময়ত ৰোহিতে ৩০ টা বলতে চেঞ্চুৰী অৰ্জন কৰাৰো সুৱৰ্ণ সুযোগ আছিল। টীম ইণ্ডিয়াৰ অপেনাৰ সঞ্জু ছেমছনৰ দৰে শৈলীৰে খেলা ৰোহিতে মাত্ৰ ৪ ৰানৰ বাবে শতকৰ পৰা বঞ্চিত হলেও APLত যে সুমিত, নিহাৰ ডেকা, দানিছ দাসৰ দৰে খেলুৱৈ অতিক্ৰমী ৰোহিতে নিজকে ষ্টাৰ প্লেয়াৰ হিচাপে নিজ প্ৰতিষ্ঠা কৰিছে তাত কোনো সন্দেহ নাই। ৰোহিত সেনে কালাম ৰাজাৰ বলত অম্লানজ্যোতি দাসৰ হাতত কেচ দি পেভিলিয়নমুখী হোৱাৰ পূৰ্বে ৰোহিতে মাত্ৰ ১৫টা বলতেই অৰ্ধশতক অৰ্জন কৰিছিল। কেৱল আজিৰ ইনিংছটোৱেই নহয় APLত গুৱাহাটী ৰয়েলছৰ এই পৰ্যন্ত দমনীয় প্ৰদৰ্শনৰ ক্ষেত্ৰত গুৰু দায়িত্বও ৰোহিতে বহন কৰি আহিছে। ৰোহিতৰ আজিৰ ইনিংছটো এই পৰ্যন্ত APLৰ দ্ৰুততম অৰ্ধশতকৰ ৰেকৰ্ড। মেচখনত ৩ উইকেটৰ বিনিয়মত চৰাইদেউ ছানৰাইজাৰ্ছক পৰাস্ত কৰে গুৱাহাটী ৰয়েলছে। ইয়াৰ লগে লগে আবু নেচিমৰ প্ৰশিক্ষণত উজ্জীৱিত প্ৰদৰ্শন আগবঢ়োৱা গুৱাহাটী ৰয়েলছে এই পৰ্যন্ত APLৰ সৰ্বাধিক ৰান chaseৰ দৰে ৰেকৰ্ড নিজৰ নামত ৰাখিবলৈ সক্ষম হয়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
