সদ্যসমাপ্ত ফিফা বিশ্বকাপত চেম্পিয়নৰ খিতাপ অৰ্জন কৰা স্পেইনে ক্ৰিকেটৰ ফালে এইবাৰ মন মেলিছে। কেৱল মন মেলাই নহয়, ক্ৰিকেটত এনে এটা কীৰ্তিমান স্থাপন কৰিবলৈ সক্ষম হৈছে যিটো অষ্ট্ৰেলিয়া বা ভাৰতৰ দৰে ক্ৰিকেটত অধিপত্য বিস্তাৰ কৰা দেশেও কৰিব পৰা নাই। স্পেইনে যিটো ৰেকৰ্ডৰ গৰাকী হ’বলৈ সক্ষম হৈছে হয়টো বহু ক্ৰিকেট অনুৰাগীয়ে শুনিলেও বিশ্বাস কৰিবলৈ টান পাব।
সম্প্ৰতি স্পেইনে আগন্তুক ২০২৮ T20 বিশ্বকাপ খেলাৰ মানসেৰে ইউৰো ছাব-ৰিজঅ’নেল কোৱালিফাৰ-চি পৰ্যায়ৰ টুৰ্নামেণ্ট খেলি আছে। টুৰ্নামেণ্টখনৰ এখন মেচত ফিনলেণ্ডক ৮ উইকেটত পৰাস্ত কৰাৰ লগে লগে স্পেইনে এক অনন্য কৃতিত্বৰ গৰাকী হয়। মেচখনত জয়লাভ কৰাৰ লগে লগে স্পেইনে একেৰাহে ২১খনকৈ আন্তঃৰাষ্ট্ৰীয় মেচত জয়লাভ কৰাৰ অনবদ্য ৰেকৰ্ডৰ গৰাকী হয়। এই ঐতিহাসিক জয়ৰ লগে লগে স্পেইনে ২০০৩ চনত ৰিকি পণ্টিঙৰ অধিনায়কত্বত বিশ্ব ক্ৰিকেটত দপদপাই থকা ‘অজেয়’ অষ্ট্ৰেলিয়া দলৰ ২৩ বছৰীয়া ৰেকৰ্ড ভংগ কৰিবলৈ সক্ষম হয়। অষ্ট্ৰেলিয়াই টেষ্ট আৰু এদিনীয়া মিলাই একেৰাহে ২০খন আন্তঃৰাষ্ট্ৰীয় মেচত জয়লাভ কৰিছিল। আন্তঃৰাষ্ট্ৰীয় ক্ৰিকেটত এতিয়া সেই অভিলেখ স্পেইনৰ নামত।
স্পেইনৰ নাম শুনিলেই সাধাৰণতে বুলফাইটিং, ফুটবল আৰু বাৰ্চিলোনা-ৰিয়েল মাদ্ৰিদৰ দৰে বিখ্যাত ক্লাবৰ কথা মনলৈ আহে। কিন্তু ক্ৰিকেটৰ ক্ষেত্ৰত দেশখনৰ উপস্থিতি তুলনামূলকভাৱে নতুন। তথাপিও স্পেইনৰ পুৰুষ ক্ৰিকেট দলে শেহতীয়াকৈ যি প্ৰদৰ্শন আগবঢ়াইছে, সেয়া সমগ্ৰ ক্ৰিকেট বিশ্বকে আচৰিত কৰি তুলিছে। বৰ্তমান ICCৰ টি-২০ ৰেংকিঙত ২৮ নম্বৰ স্থানত থকা স্পেইনৰ বাবে এই যাত্ৰা যেন এক ক্ৰিকেটীয় ৰূপকথা। ইউৰোপৰ কেইবাখনো এছ’চিয়েট দলৰ বিৰুদ্ধে স্পেইনে ধাৰাবাহিকভাৱে সফলতা লাভ কৰি আহিছে। T20 ক্ৰিকেটত আন্তঃৰাষ্ট্ৰীয় মৰ্যাদা লাভ কৰাৰ পিছত স্পেইনে এতিয়ালৈ মুঠ ৫০খন মেচ খেলিছে। আচৰিত হ’বলগীয়া কথাটো হৈছে স্পেইনে ইয়াৰে ৪১খন মেচতে জয়লাভ কৰিছে। আনহাতে, মাত্ৰ ৮খন মেচত পৰাজয়ৰ সন্মুখীন হৈছে আৰু এখন মেচ ফলাফলহীন হৈ ৰৈছে। অৱশ্যে উচ্চমানৰ দলৰ বিৰুদ্ধে স্পেইনৰ এই অজেয় ধাৰা সহজেই ভংগ যে তাত কোনো সন্দেহ নাই। তথাপিও সমকক্ষৰ মাজৰ পৰা উজলি উঠা এনেবোৰ ঘটনাই ক্ৰিকেটৰ ক্ষেত্ৰতো দেশখনক আগুৱাই যাবলৈ প্ৰেৰণা যে দিব তাতো কোনো সন্দেহ নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
