প্ৰেমৰ বাবেই বিষাক্ত বেজি দি প্ৰথমে পিতৃ-মাতৃক হ*ত্যা

তেলেংগানাৰ বিকাৰবাদ জিলাৰ বন্তাৱৰাম মণ্ডলৰ যচাৰাম গাঁৱৰ এগৰাকী নাৰ্ছ সুৰেখাৰ আত্মহ*ত্যাৰ ঘটনাই চাঞ্চল্যৰ সৃষ্টি কৰিছে। পিতৃ-মাতৃক হ*ত্যাৰ অভিযোগত কাৰাগাৰত থকা সুৰেখাক শেহতীয়াকৈ জামিনত মুকলি কৰি দিয়া হৈছিল। জামিনত মুক্তি পোৱাৰ পিছত তেওঁ সংগৰেড্ডী জিলা সদৰৰ এটা ব্যক্তিগত হোষ্টেলত থাকিবলৈ লৈছিল। তাতেই তেওঁ আত্মহ*ত্যা কৰে।

জানিব পৰা মতে, বিগত ২৪ জানুৱাৰীত যচাৰাম গাঁৱত সুৰেখাৰ পিতৃ দশৰথ আৰু মাতৃ লক্ষ্মীক মৃ*ত অৱস্থাত উদ্ধাৰ কৰা হৈছিল। প্ৰথমতে তেওঁলোকৰ মৃ*ত্যু স্বাভাৱিক যেন লাগিছিল। কিন্তু ঘটনাস্থলীত আৰক্ষীয়ে চিৰিঞ্জ আৰু খালী বেজী উদ্ধাৰ কৰাৰ পিছত সন্দেহৰ সৃষ্টি হয়। তদন্ত আগবঢ়াৰ লগে লগে পিতৃ-মাতৃৰ মৃত্যুৰ সৈতে সুৰেখা জড়িত থকাৰ অভিযোগ উত্থাপন হয়। আৰক্ষীৰ তদন্ত অনুসৰি, সুৰেখা এজন যুৱকৰ প্ৰেমত পৰিছিল আৰু যুৱকজনৰ সৈতে বিৱাহপাশত আৱদ্ধ হব বিচাৰিছিল। কিন্তু এই সম্পৰ্কত সুৰেখাৰ পিতৃ-মাতৃয়ে আপত্তি কৰিছিল বুলি অভিযোগ উঠিছিল। ইয়াৰ পিছতে সুৰেখাই পিতৃ-মাতৃক বিষৰ বেজী দি হ*ত্যা কৰাৰ অভিযোগত গ্ৰেপ্তাৰ হয়। ২০২৬ চনৰ জানুৱাৰী মাহত গ্ৰেপ্তাৰ হোৱাৰ পিছৰে পৰা সুৰেখা কাৰাগাৰত আছিল।

শেহতীয়াকৈ আদালতৰ পৰা জামিন লাভ কৰি কাৰাগাৰৰ পৰা ওলাই অহাৰ পিছত সুৰেখাই সংগৰেড্ডীৰ এটা ব্যক্তিগত হোষ্টেলত থাকিবলৈ লৈছিল। কিন্তু কিছুদিন পিছতেই হোষ্টেলৰ কোঠাত তেওঁক মৃ*ত অৱস্থাত উদ্ধাৰ কৰা হয়। খবৰ পোৱাৰ লগে লগে সংগৰেড্ডী আৰক্ষী ঘটনাস্থলীত উপস্থিত হয়। আৰক্ষীৰ প্ৰাথমিক তথ্য অনুসৰি, পিতৃ-মাতৃক হ*ত্যা কৰিবলৈ ব্যৱহাৰ কৰা একেধৰণৰ বিষৰ বেজী ব্যৱহাৰ কৰিয়েই সুৰেখাই আত্মহ*ত্যা কৰা বুলি সন্দেহ কৰা হৈছে। অৱশ্যে তেওঁ কিয় এনে চৰম সিদ্ধান্ত ল’লে, সেয়া এতিয়াও স্পষ্ট হোৱা নাই।

সুৰেখাৰ আত্মহ*ত্যাৰ আঁৰত কাৰাগাৰত থকা সময়ৰ মানসিক চাপ, জামিনত মুক্তি পোৱাৰ পিছৰ পৰিস্থিতি নে আন কোনো ব্যক্তিগত কাৰণ জড়িত আছিল, সেই বিষয়েও আৰক্ষীয়ে তদন্ত কৰি আছে। আৰক্ষীয়ে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰিছে আৰু ঘটনা সন্দৰ্ভত এটা গোচৰ ৰুজু কৰা হৈছে। লগতে সুৰেখাৰ মৃ*ত্যুৰ খবৰ পৰিয়ালৰ লোকক জনোৱা হৈছে। পিতৃ-মাতৃৰ হ*ত্যাৰ অভিযোগত কাৰাগাৰৰ পৰা জামিনত মুক্তি পোৱাৰ কিছুদিন পিছতে সুৰেখাৰ এইদৰে মৃত্যু হোৱাত সমগ্ৰ ঘটনাটোৱে নতুনকৈ চৰ্চা লাভ কৰিছে। আত্মহ*ত্যাৰ প্ৰকৃত কাৰণ কি আছিল, সেয়া আৰক্ষীৰ তদন্ত সম্পূৰ্ণ হোৱাৰ পিছতহে স্পষ্ট হ’ব।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ