বৃদ্ধ পেঞ্চনক লৈ এক চাঞ্চল্যকৰ ঘটনা পোহৰলৈ আহিছে। চৰকৰী নথিত প্ৰকৃত বয়সতকৈ ২৪ বছৰ বেছি দেখুৱাই ১০ বছৰে বৃদ্ধ পেঞ্চন লৈ অহাৰ তথ্য পোহৰলৈ আহিছে। এই ঘটনা সংঘটিত হৈছে উত্তৰ প্ৰদেশত। অভিযোগ অনুসৰি, ৰাজ্যখনৰ বাদপুৰা ব্লকৰ বিচাৰপুৰা গাঁও পঞ্চায়তৰ এগৰাকী মহিলাই চৰকাৰী নথি-পত্ৰত নিজৰ বয়স ৬০ বছৰ বুলি দেখুৱাই প্ৰায় ১০ বছৰ ধৰি বৃদ্ধ পেঞ্চনৰ সুবিধা লৈ আহিছিল। কিন্তু তদন্তত মহিলাগৰাকীৰ প্ৰকৃত বয়স প্ৰায় ৩৬ বছৰ বুলি জানিব পৰা গৈছে। ঘটনাটোক কেন্দ্ৰ কৰি এতিয়া কেৱল মহিলাগৰাকীৰ বিৰুদ্ধেই নহয়, চৰকাৰী আঁচনিৰ হিতাধিকাৰী নিৰ্বাচন আৰু পৰীক্ষণ প্ৰক্ৰিয়াক লৈও প্ৰশ্ন উত্থাপন হৈছে।
এই ঘটনাৰ সৈতে জড়িত মহিলাগৰাকী হৈছে শিৱৰাজ সিঙৰ পত্নী উমা দেৱী। অভিযোগ অনুসৰি, চৰকাৰী নথিত তেওঁৰ বয়স ৬০ বছৰ বুলি উল্লেখ কৰা হৈছিল। এই তথ্যৰ ভিত্তিত তেওঁ বৃদ্ধ পেঞ্চন আঁচনিৰ অধীনত পেঞ্চন লাভ কৰি আছিল। কিন্তু পিছত উত্থাপিত অভিযোগ আৰু তদন্তৰ সময়ত তেওঁৰ বৰ্তমান প্ৰকৃত বয়স প্ৰায় ৩৬ বছৰ বুলি জানিব পৰা যায়। অৰ্থাৎ ২৬ বছৰৰ পৰাই বিগত ১০ বছৰে মহিলাগৰাকীয়ে লাভ কৰি আছিল বৃদ্ধ পেঞ্চনৰ চৰকাৰী ধন। তদন্তত চৰকাৰী ৰেকৰ্ডত উল্লেখ কৰা বয়স আৰু প্ৰকৃত বয়সৰ মাজত প্ৰায় ২৪ বছৰৰ পাৰ্থক্য ধৰা পৰে।
ইয়াৰ পিছতে স্বাভাৱিকভাৱেই প্ৰশ্ন উঠিছে—ইমান বয়সৰ অমিল থকাৰ পিছতো মহিলাগৰাকীৰ নাম কেনেকৈ বৃদ্ধ পেঞ্চনৰ হিতাধিকাৰীৰ তালিকাত অন্তৰ্ভুক্ত হ’ল? তদুপৰি, প্ৰায় এটা দশক ধৰি চলা পৰীক্ষণ প্ৰক্ৰিয়াত এই বিষয়টো কিয় ধৰা নপৰিল? সম্প্ৰতি বিচাৰপুৰা গ্ৰাম পঞ্চায়তৰ গাঁওৰ মুৰব্বী প্ৰতিনিধি মুকেশ কুমাৰে বিষয়টো জানিব পাৰি জিলা দণ্ডাধীশৰ জৰিয়তে জিলা সমাজ কল্যাণ বিভাগত লিখিত অভিযোগ দাখিল কৰে।
অভিযোগ লাভ কৰাৰ পিছতে সমাজ কল্যাণ বিভাগে বিষয়টো তদন্ত কৰিবলৈ আৰম্ভ কৰে। ২০২৬ চনৰ ১৩ আগষ্টত বিভাগৰ ফালৰ পৰা দিয়া উত্তৰত উল্লেখ কৰা হয় যে ২০২৪-২৫ বৰ্ষৰ বাৰ্ষিক পৰীক্ষণৰ সময়ত উমা দেৱীক বৃদ্ধ পেঞ্চনৰ বাবে অযোগ্য বুলি চিনাক্ত কৰা হৈছিল। ইয়াৰ পিছতে তেওঁৰ বৃদ্ধ পেঞ্চন বন্ধ কৰি দিয়া হয়। এই ঘটনাৰ আটাইতকৈ গুৰুত্বপূৰ্ণ প্ৰশ্নটো হৈছে—যদি মহিলাগৰাকীৰ প্ৰকৃত বয়স বৃদ্ধ পেঞ্চন লাভৰ বাবে নিৰ্ধাৰিত বয়সৰ সীমাৰ ভিতৰত নপৰে, তেন্তে তেওঁৰ নাম প্ৰথমে কেনেকৈ আঁচনিখনত অনুমোদিত হ’ল? ইয়াৰ লগতে, প্ৰতি বছৰে হিতাধিকাৰীৰ তথ্য পৰীক্ষা কৰা সত্ত্বেও ইমান ডাঙৰ বয়সৰ পাৰ্থক্য কিয় আগতেই ধৰা নপৰিল, সেই বিষয়টোও তদন্তৰ আওতালৈ আহিছে।
ইফালে, জিলা সমাজ কল্যাণ বিষয়া সন্ধ্যা ৰাণী বাঘেলে জানিবলৈ দিয়ে যে মহিলাগৰাকীক অযোগ্য বুলি চিনাক্ত কৰাৰ পিছতে তেওঁৰ পেঞ্চন বন্ধ কৰা হৈছে। বৰ্তমান বিষয়টো তদন্তাধীন হৈ আছে। তদন্তত যদি অভিযোগসমূহ সত্য বুলি নিশ্চিত হয়, তেন্তে নিয়ম অনুসৰি পূৰ্বতে লাভ কৰা পেঞ্চনৰ ধন উদ্ধাৰৰ ব্যৱস্থা গ্ৰহণ কৰা হ’ব বুলি বিভাগৰ ফালৰ পৰা জানিবলৈ দিয়া হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
