বলীউডৰ অভিনেত্ৰী তথা ‘বিগ বছ ৯’ৰ দ্বিতীয় ৰানাৰ্ছ আপ মন্দানা কৰিমীৰ জীৱনত অন্ধকাৰ অধ্যায় নামি আহিছে নেকি? বিগত প্ৰায় ৬ বছৰ ধৰি এজন অচিনাকি নজৰদাৰীয়ে তেওঁক অনুসৰণ কৰাৰ লগতে তেওঁৰ কেৰিয়াৰ আৰু ব্যক্তিগত জীৱন ধ্বংস কৰাৰ চেষ্টা চলাই অহাৰ অভিযোগ কৰিছে অভিনেত্ৰীগৰাকীয়ে। শেহতীয়াকৈ ইনষ্টাগ্ৰামত কেইবাটাও ভিডিঅ’ আৰু স্ক্ৰীণশ্বট শ্বেয়াৰ কৰি মন্দানাই এই চাঞ্চল্যকৰ দাবী কৰিছে। তেওঁৰ অভিযোগ অনুসৰি, অচিনাকি এজন ব্যক্তিয়ে তেওঁৰ প্ৰযোজক, সহ-অভিনেতা আৰু বন্ধু-বান্ধৱীলৈ আপত্তিজনক ই-মেইল আৰু বাৰ্তা প্ৰেৰণ কৰি আহিছে। এই বাৰ্তাসমূহৰ জৰিয়তে মন্দানাৰ পৰা আঁতৰি থাকিবলৈ লোকসকলক কোৱা হৈছে। অভিনেত্ৰীগৰাকীৰ দাবী, এই সমগ্ৰ ঘটনাৰ মূল উদ্দেশ্য হৈছে বলীউডত তেওঁৰ সুনাম নষ্ট কৰা আৰু তেওঁ যাতে নতুন কাম নাপায়, তাৰ বাবে বাধা সৃষ্টি কৰা।
এটা ভিডিঅ’ত নিজৰ ক্ষোভ আৰু দুখ প্ৰকাশ কৰি মন্দানাই কয় যে তেওঁৰ বিচ্ছেদৰ পিছৰে পৰা এই সমস্যা চলি আছে। যোৱা ছয় বছৰ ধৰি কোনো এজন ষ্টাকাৰে তেওঁক হাৰাশাস্তি কৰি আহিছে বুলি তেওঁ দাবী কৰে। মন্দানাৰ মতে, অচিনাকি একাউণ্টৰ পৰা তেওঁৰ প্ৰযোজক আৰু সহ-অভিনেতাসকললৈ বাৰ্তা পঠিওৱা হয়। আনকি তেওঁলোকক মন্দানাৰ পৰা আঁতৰি থাকিবলৈও কোৱা হয়। অভিনেত্ৰীগৰাকীয়ে প্ৰশ্ন কৰে—কোনে তেওঁক ইমান ঘৃণা কৰে যে তেওঁৰ কাম, উপাৰ্জন আৰু কেৰিয়াৰ সকলো শেষ কৰি দিব বিচাৰে?
মন্দানাই প্ৰকাশ কৰা অনুসৰি, প্ৰায় ৪ বছৰ পূৰ্বে তেওঁ বিষয়টোৰ সত্যতা জানিবলৈ এজন ব্যক্তিগত তদন্তকাৰীৰ সহায় লৈছিল। তদন্তৰ সময়ত কোনোবাই তেওঁৰ ছ’চিয়েল মিডিয়া একাউণ্টসমূহ ২৪ ঘণ্টাই নিৰীক্ষণ কৰিবলৈ এজন পেছাদাৰী হেকাৰক নিয়োগ কৰাৰ তথ্য পোৱা গৈছিল বুলি তেওঁ দাবী কৰে। তেওঁৰ অভিযোগ অনুসৰি, মন্দানাৰ সৈতে যোগাযোগ কৰা বা তেওঁৰ ছ’চিয়েল মিডিয়া পোষ্টত টেগ কৰা লোকসকলেও ‘মীনাক্ষী’ নাম ব্যৱহাৰ কৰা এটা অচিনাকি ই-মেইল একাউণ্টৰ পৰা বাৰ্তা লাভ কৰিছিল।
মন্দানাই কয় যে তেওঁ ভাৰত এৰি ডুবাইত বসতি স্থাপন কৰাৰ পিছতো এই সমস্যাৰ অন্ত পৰা নাই। তেওঁৰ দাবী অনুসৰি, ভাৰতত থকা তেওঁৰ বন্ধুসকললৈ এতিয়াও এনে ইমেইল আহি আছে। অভিনেত্ৰীগৰাকীৰ অভিযোগ, কোনোবাই পৰিকল্পিতভাৱে তেওঁৰ নাম, সুনাম আৰু কেৰিয়াৰ ধ্বংস কৰাৰ চেষ্টা চলাই আছে। এই ঘটনাক লৈ তেওঁ উদ্বেগ প্ৰকাশ কৰাৰ লগতে ভাৰতীয় আৰক্ষীৰ পৰা পৰ্যাপ্ত সহায় নোপোৱাৰো অভিযোগ উত্থাপন কৰিছে। অৱশ্যে, মন্দানাই কৰা এই অভিযোগসমূহৰ আঁৰত প্ৰকৃততে কোন আছে, সেয়া এতিয়াও স্পষ্ট হোৱা নাই। ‘মীনাক্ষী’ নামৰ ইমেইল একাউণ্টটো কোনে ব্যৱহাৰ কৰিছে বা ষ্টাকাৰজনৰ পৰিচয় কি, সেই বিষয়েও কোনো নিশ্চিত তথ্য পোহৰলৈ অহা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
